A traizón a un rei ten un prezo

Inacio e Iván Suárez, dous autores que xa teñen unha boa presada de libros de cómic ás costas, adaptan á banda deseñada O reiciño de Galiza (Le Petit Roi de Galice), un relato orixinal do coñecido escritor Victor Hugo que forma parte da colección de poemas La Légende des siècles (1859). A obra orixinal foi traducida para o galego por Henrique Harguindey e, precisamente, é sobre esa tradución sobre a que Inacio e Iván traballaron para trasladar unha das mellores plumas do romanticismo francés aos cadriños. A historia sucede no momento histórico no que o Reino de Galiza loita por seguir sendo independente, sete infantes raptan o herdeiro do trono, Nuno, o fillo primoxénito do rei García II, mais Roldán, un cabaleiro francés, inicia a misión de rescate do fillo do rei. O traballo de adaptación de Inacio é excelente e ámbolos dous autores son quen de converter en cadriños-gourmet á mirada do romántico francés sobre o derradeiro rei de Galiza, respectando as rimas deste épico e poético relato que resulta nunha entretida –e algo sanguenta– epopea medieval. Iván, que non deixa de evolucionar e medrar en cada obra, inspirouse nos códices e no labor dos miniaturistas medievais para desenvolver un traballo gráfico que resulta realmente excelente. Esta escolla é un acerto enorme. A conxunción dos elementos que compoñen cada imaxe, liña e cor forman un todo de gran calidade que nos somerxe de inmediato no ambiente e na historia. Non podemos obviar que esta non é unha banda deseñada ao uso e que nun principio batemos frontalmente cun modelo gráfico e narrativo que se nos fará estraño e que precisa de certa vontade, mais unha vez superado esta traba inicial, non relativa á calidade senón a usos e costumes na composición e narratividade do cómic actual, gozaremos dunha obra ben interesante que nos ofrece a modo de plus unha lección de historia. Este proxecto complétase con dúas pezas divulgativas que poderemos atopar de balde na web da editorial. Un pequeno documental e unha unidade didáctica fantástica sobre o universo desta obra e o proceso de creación dunha banda deseñada.