Sakura, sakura, noyama mo sato mo

Chiharu é unha moza orfa a quen Kameko, unha misteriosa rapaza cunha serie de habilidades impresionantes na loita, salva a vida. Ambas iniciarán un percorrido xuntas que as levará a vivir intensas aventuras nunha obra que é unha homenaxe continua á cultura xaponesa e que, sen dúbida, bebe directamente das fontes do manga. Abel e Jorge son xa veteranos no mundo da BD galega, ambos teñen obra publicada tanto en solitario como con distintas parellas artísticas. Lembremos aquela impresionante Alter-Nativo de (Aira editorial, 2017) de Jorge cos seus máis de catro metros de mural e a divertida A Tumba de Breogán (Demo editorial, 2018) de Alves e Tolj, por citar tan só dous exemplos. Desta volta xuntan talentos e experiencia, Abel no guión e Jorge no lapis forman equipo creativo para traernos unha BD xuvenil ambientada na terra onde nace o sol. Unha proposta moi interesante que abre a ollada a novos mundos dende o noso. Unha obra que nos ofrece todo o que agardamos dunha historia do Xapón feudal, katanas, ninjas, loitas, espíritos e unha historia que xunta todo coas doses xustas, ademais, co plus de ter a dúas rapazas e unha tartaruga como protagonistas. Sen dúbida, unha escolla que é un acerto. O guión de Alves constrúe unha narración que dá poucos descansos e que avanza con rapidez. Usa unha linguaxe moi asumíbel para o público preadolescente que marida á perfección co debuxo de Campos, quen opta por un estilo moi desenfadado e, mesmo, cun punto naif que semella moi axeitado para lectores e lectoras xuvenís. A cor mellora todo o conxunto e fuxindo de estridencias achega o valor engadido que ten que achegar, sen facer de menos narración e o debuxo, sen desentoar con estes, sumando valor. O feito de ambientar a historia no Xapón pode ser un acerto que aproxime a obra ao seu público obxectivo, tan afeito ás obras e códigos do Manga e o Anime. Ademais a editorial Aira, unha das máis novas do país pero que está a desenvolver un traballo moi serio e digno, edita a obra cunha boa calidade na impresión e no papel e, sobre todo, a un prezo moi axustado que se agradece nestes tempos incertos. O destino de Kameko Abel Alves e Jorge Campos / Aira Editorial / 2021 / 100 páxs. / 15 euros