"O que fixen foi traballar servindo ao meu país"

A editorial Galaxia vén de publicar esta biografía en banda deseñada dedicada ao homenaxeado no Día das Letras Galegas deste ano, titulada Francisco Fernández del Riego, o home que valía por mil. O título xa dá pistas de como era Don Francisco, o que hoxe chamariamos hiperactivo. Foi, non necesariamente nesta orde: membro das Irmandades da Fala, colaborador do Seminario de Estudos Galegos, fundador do Partido Galeguista, profesor –represaliado– da Universidade de Santiago, xornalista, escritor, editor, etc. E aínda tivo tempo de participar na redacción do Estatuto de Galiza na República, ser presidente da Real Academia Galega –e académico– e fundador da Editorial Galaxia. A imaxe que moitos de nós gardamos na memoria é a dunha entrevista na televisión, precisamente, nun Día das Letras de cando Gayoso aínda tiña pelo. Xa era un home maior, co cabelo branco e grandes gafas cadradas de pasta, moi culto e que falaba fiando ben as palabras, contando anécdotas da súa intensa vida cun cigarro na man. Un intelectual de ideas claras e de pensamento progresista, que se definía a si mesmo como galeguista. Mascato e Carreiro fan unha BD (demasiado) breve, destinada aos públicos máis novos, na que debullan a trazo groso a complexa, ás veces mesmo arriscada, vida de Del Riego. Dende a súa nenez en Lourenzá, os estudos en Madrid e Compostela, o recrutamento forzoso e a Guerra Civil e, finalmente, a madurez en Vigo, xa dedicado plenamente ao labor intelectual. O guión segue os momentos máis destacábeis da vida do escritor, é unha narración puramente descritiva e como tal funciona ben, sen máis. Os deseños de Carreiro son sinxelos, de trazo fresco mais, como sempre na súa obra, funcionais e elegantes. Cumpren ben o seu cometido e as notas de cor enriquecen o conxunto. Formalmente está ben feito, secasí, un non pode deixar de pensar que arrecende a traballo de encargo e, porén, fáltalle algo máis de alma ao conxunto. Iso si, o libro, aínda estando dirixido a lectores novos, proporciona un tempo de boa lectura para calquera idade, é entretido e vén co valor engadido da didáctica e coa reivindicación dun dos nosos meirandes intelectuais. Tal vez a única falla deste cómic é o prezo, dezasete euros por menos de corenta páxinas semella un bocadiño excesivo. No destacábel poñemos a volta de Galaxia ao medio da banda deseñada, algo que agardamos non quede en feito testemuñal e que este libro sexa o punto de partida para futuras coleccións de BD nunha das nosas grandes e históricas editoras.