Washington eleva a tensión no Caribe e Caracas o acusa de busca "petróleo gratis"

Os Estados Unidos “veñen de verdade polo petróleo venezolano, quéreno gratis”, proclamou o presidente do país, o progresista Nicolás Maduro, que insistiu en que “ese petróleo non pertence a Maduro, e menos aos gringos, perténcevos”, subliñou á poboación en declaracións recollidas a cuarta feira por medios internacionais. Horas antes, o ocupante da Casa Branca, Donald Trump, asegurou que os militares estadounidenses despregados na costa do país suramericano, no mar Caribe, atacaron un barco en “augas internacionais” que “transportaba drogas”, o que resultou “na morte de 11 terroristas”. A lancha “saíu de Venezuela” e se dirixía aos Estados Unidos, porfiou. Trump sostivo que as Forzas Armadas de Washington identificaron a tripulación como membros do Tren de Aragua, reiterando que está controlado por Maduro. Con todo, non amosou ningunha proba desas afirmacións, e non se detallou quen eran as persoas que estarían no buque, se se produciu algunha advertencia antes de matalas, que tipo de drogas habería, cantidade ou o tipo de armas utilizadas. O certo é que bombardear un buque e non incautalo “é altamente inusual e evoca lembranzas da loita dos Estados Unidos contra grupos insurxentes como Al Qaeda”, afirmou a axencia Reuters. Até o de agora, a única evidencia teórica do declarado polo Goberno estadounidense é un vídeo de medio minuto, marcado como “Desclasificado” e que amosa supostamente a embarcación bombardeada en dous planos diferentes. No segundo, de súpeto percíbese unha explosión na lancha, tras a que reduce a súa velocidade. Freddy Ñáñez, titular de Comunicación venezolano, arremeteu contra o secretario de Estado estadounidense, Marco Rubio, ao que acusou de “alentar a guerra e intentar manchar as mans de sangue a Trump, Venezuela non é unha ameaza”, enfatizou, amais de defender que “semella” que Rubio “segue a mentir ao seu presidente”, e “tras metelo nun camiño sen saída agora dálle como ‘proba’ un vídeo con IA [intelixencia artificial]”. Unha análise do vídeo facilitado pola Casa Branca de AI Detector conclúe que o máis probábel é que o primeiro plano, no que aparece a curta distancia o navío e se aprecian persoas a bordo, se elaborara usando IA, mentres que na segunda toma non se detectan indicios dela. O líder colombiano, o progresista Gustavo Petro, ratificou que o ataque, se “é verdade”, constituíu un “asasinato”, reiterando que “os que transportan drogas non son os grandes narcos, senón mozos moi pobres do Caribe e o Pacífico”. Ao tempo, Adam Isacson, da entidade de dereitos humanos Oficina de Washington para América Latina (WOLA), sentenciou que “ser sospeitoso de transportar drogas non implica unha pena de morte”. Venezuela reforza os lindes con Colombia ante a despregadura militar dos Estados Unidos Está previsto que cheguen á rexión, senón están alí, até sete buques militares dos norteamericanos canda un submarino de propulsión nuclear, que superan os 4.500 soldados. A despregadura foi xustificada polo combate ao narcotráfico, aínda que para a Organización das Nacións Unidas (ONU) Venezuela non xoga ningún papel relevante na produción ou tráfico de drogas na zona, e a inmensa maioría vai desde Colombia e o Perú aos Estados Unidos a través do océano Pacífico, o que activou todas as alarmas en Venezuela ante unha eventual operación militar para tratar de derrubar o Goberno de Maduro. Sobre isto foi preguntado Rubio, que contestou que non vai “especular sobre o que poida suceder no futuro”. Algunhas forzas opositoras están a azuar esta narrativa, e unha das súas líderes, María Corina Machado, vinculada coa ultradereita internacional, remarcou que “falta pouco” para a caída do Executivo, sen mencionar o ataque militar. Maduro, suposto líder de dous cárteles xa Esta despregadura parte dun decreto de Trump que ordena ao Exército combater fóra do país os cárteles da droga que cualifique de terroristas. Máis alá do Tren de Aragua, un grupo criminal venezolano do que persoas expertas advirten que se está a sobredimensionar o seu impacto nos Estados Unidos, que repiten que Maduro está ao cargo, Washington tamén colocou o líder venezolano á fronte do descoñecido Cártel dos Soles e como colaborador do mexicano Cártel de Sinaloa. Todos foron declarados como terroristas. A do Cártel dos Soles “é a nova versión das armas de destrución masiva do Iraq”, sinala a Nós Diario Ana Mosquera, presidenta da Asociación Galego-Bolivariana Hugo Chávez (Agabo), que incide en que, a diferenza de Maduro, si que hai indicios da relación do ex presidente colombiano Álvaro Uribe, un conservador aliado de Washington, co narcotráfico, lembrando os asasinatos de testemuñas en procesos xudiciais contra el e a súa contorna. Uribe, nunha sentenza que xa apelou, foi condenado a 12 anos de prisión por fraude procesual e suborno de testemuñas, neste caso paramilitares, e é “un dos principais apoios de Machado”, ratifica. O investigador e politólogo venezolano William Serafino debulla a este xornal que “nin sequera nos informes da DEA [Administración para o Control de Drogas dos Estados Unidos] dos anos 2024 e 2025 fálase de algo denominado o Cártel dos Soles”, o que constata que é “unha construción narrativa que non ten bases”, ironizando con que, á hora de lanzar unha campaña contra Venezuela, o “mínimo” sería “un informe manipulado no que se falase” del, “mais nin tan só iso”. Unha "guerra psicolóxica" na que non se pode descartar ningunha opción A falta de que a evolución dos acontecementos confirme o motivo real da despregadura militar estadounidense na costa de Venezuela, Mosquera indica que “non creo que vaian facer nada [directamente contra o país], porque cando o fan non o fan desa maneira”, aseverando que é “unha guerra psicolóxica” e que, de intentar unha operación militar contra Caracas, “vano ter moi difícil”. Á vez, fai fincapé en que “Trump ten moitas cousas que tapar”, abrindo a porta a que se trate dunha “cortina de fume”. Nese sentido, Serafino considera que é “unha operación de demostración de forza” co fin de “fracturar o mando militar venezolano” e “catalizar algún movemento insurreccional” que debilite Maduro “con miras a un eventual golpe de Estado”. Malia que “non se pode descartar nada” nun “escenario de bastante incerteza”, “non hai nada que indique que vai haber un proceso de invasión” posto que “non dan os números [de buques e tropas]”. Así e todo, manifesta que Washington tamén podería lanzar “ataques focalizados e específicos” a “determinadas infraestruturas militares do país coa escusa de que están a desmantelar o Cártel dos Soles”, e até a navíos venezolanos que “non necesariamente teñen que ser militares” e si “falsamente acusados de transportar drogas”. No que atinxe ao debate na cúpula estadounidense, acha que “Trump non está convencido de todo de que hai que facer unha operación militar”, mais non desbota algunha clase de ataque sen declaración de guerra que lle “permita a el internamente vender a idea de que está a loitar contra o narcotráfico e logrando unha especie de vitoria en política exterior”.