A unidade de España, eixo da moción de censura no Congreso

Na segunda moción de censura presentada pola extrema dereita española nesta lexislatura, e que como na primeira prevese que apenas sexa apoiada polos deputados de Vox, o candidato á Presidencia da formación, Ramón Tamames, xustificou a iniciativa principalmente pola preservación da unidade do Estado español, que contrapuxo aos pactos coas forzas soberanistas aos que chegou o Executivo de coalición entre PSOE e Unidas Podemos liderado por Pedro Sánchez para poder gobernar, aspecto no que concentrou as súas críticas ao Gabinete. Citando o ex secretario xeral do PSOE Alfredo Pérez Rubalcaba, Tamames incidiu en que “os socialistas non poden ir á investidura da man de partidos independentistas, que queren romper aquilo que eles queren gobernar”, antes de apelar ao ex vicepresidente Alfonso Guerra, tamén do PSOE, e sinalar o malestar na forza política pola “cesión permanente aos condenados por sedición e malversación”, en referencia ao independentismo catalán, que denuncia o abuso destes tipos penais para perseguilos pola súa actividade política. “A autodeterminación non existe”, aseverou Tamames, impugnando as formacións que buscan “acabar coa monarquía parlamentar, a figura de Felipe VI e a unidade de España”, insistiu o candidato de 89 anos, que tamén censurou a “corrupción de última hora” por parte do Goberno español, en relación ao caso Mediador; o que considera unha falta de respecto á división de poderes, a subida do salario mínimo ou a memoria histórica. Na súa resposta, o presidente estatal fixo alusión á evolución política de Tamames, que pasou do Partido Comunista español ao Centro Democrático y Social para representar unha moción impulsada polos “sucesores de Blas Piñar”, fundador do partido de extrema dereita Fuerza Nueva, disolto en 1982. “Non foi a súa mellor idea”, resolveu Sánchez. No que cualificou como unha moción “estrambótica” e “delirante”, o mandatario sinalou que Tamames é un “anzol” de Vox para “branquear” un proxecto “infumábel” que rexeita a igualdade entre homes e mulleres, nega o cambio climático ou apoia ilegalizar formacións políticas ao non coincidir as súas ideas, constatou. En paralelo, puxo o foco en que Vox achega un “extra de brutalidade” ao Partido Popular (PP) ao estender o odio entre a poboación, e explicou a abstención na moción de censura anunciada polos conservadores como un “pago por diferido” polo papel de “comodín” que xoga a extrema dereita nun potencial Goberno alternativo ao actual, e advertiu ao PP que “a ultradereita lles vai exixir un segundo pago”. No que atinxe ao PP, tratou de ofrecer un perfil baixo após rexeitar implicarse nas ofertas de Vox para sumar forzas na moción, como amosou a ausencia do líder conservador Alberto Núñez Feixoo do Congreso. A secretaria xeral da formación, Cuca Gamarra, insistiu en que os “ataques” de PSOE e Vox demostran que están moi “nerviosos” por enfrontarse ao PP nas urnas, e apuntou que os “problemas dos españois” quedaron á marxe na moción de censura, que considera que serviu para que Sánchez “sobreviva, para que [a vicepresidenta segunda] Yolanda Díaz se luza e para que Vox apareza”. Muralla contra o fascismo O deputado do Bloque Nacionalista Galego (BNG) no lexislativo estatal, Néstor Rego, arremeteu contra unha moción que “responde exclusivamente á axenda política e mediática da ultradereita na súa estratexia de extensión das políticas de odio”, e proclamou que o modelo de Vox, “machista, homófobo, supremacista españolista e profundamente antidemocrático” vai seguir sen obter representación na Galiza “porque o BNG volverá ser a muralla contra o fascismo”. Ao tempo, puxo en dúbida o autonomismo que a extrema dereita atribúe a Feixoo. “Nin moderado, nin bo xestor, nin sequera autonomista”, sinalou, pondo como exemplo que “en 14 anos [como presidente galego] non asumiu nin reclamou unha soa competencia das moitas pendentes”. Porén, encabezou un “ataque permanente á nosa lingua até o punto de que na Galiza está prohibido dar aulas en galego en materias como matemáticas”. Na súa intervención tamén destacou que as supostas políticas progresistas do Executivo estatal son “insuficientes”, e resolveu que cando as decisións que afectan ao país se toman a 600 quilómetros de distancia polo xeral son contrarias aos intereses galegos. Unha mensaxe semellante trasladaron o resto de forzas soberanistas, que rexeitaron en bloque a moción. O voceiro do Partido Nacionalista Vasco, Aitor Esteban, criticou a tese da extrema dereita de que as forzas nacionalistas están sobre representadas nas institucións, debullando que cada escano da formación precisou máis votos que os de Vox. Á vez, o líder parlamentar de Esquerra Republicana de Catalunya, Gabriel Rufián, alertou do perigo das ideas difundidas pola extrema dereita de que “non somos fascistas, somos patriotas”, e puxo en cuestión as accións do Goberno español para enfrontar asuntos chave como o incremento do prezo dos alimentos. Na Galiza, o presidente Alfonso Rueda, do PP, trasladou o seu “completo apoio” á decisión de absterse na moción de censura, e asegurou que con outra proposta sería diferente posto que “hai moitísimas razóns para que Sánchez sexa censurado”. Á vez, salientou que semella unha iniciativa “máis pensada en reforzar o Goberno [español] que en criticalo”. A líder da oposición no Parlamento e do BNG, Ana Pontón, recalcou que perante o “discurso de odio, racista, xenófobo, machista e anti galego da extrema dereita” na moción de censura “non vale pórse de perfil”, poñendo o foco en que “quen vía en Feixoo un moderado volve tropezar coa realidade”. Pola súa parte, o secretario xeral do Partido dos Socialistas de Galicia, Valentín González Formoso, non fixo declaracións esta terza feira en relación coa moción de censura no Congreso español. "Coalición electoral entre Vox e PP" "O que hoxe [pola terza feira] se subscribe aquí e a coalición electoral entre Vox e PP", indicou a voceira de EH Bildu no Congreso, Mertxe Aizpurua, que engadiu que "nin as forzas máis dereitistas [en Europa] se alían co fascismo para gobernar". A deputada fixo un chamamento a enfrontar a extrema dereita e facer todo o posíbel para parala, explicando que a moción de censura só trata de ser un "altofalante" desas posicións, que apuxo á falta dunha ruptura real co réxime franquista e dunha transición democrática, que non tería permitido que a extrema dereita se mantivera latente até rexurdir.