Trump recúa ante os mercados e Irán e renuncia a atacar as centrais eléctricas do país

A xornada de onte arrancou cunha importante caída das bolsas de valores en todo mundo e unha alza no prezo dos hidrocarburos diante do temor dos mercados a unha escalada no conflito en Oriente Medio. O seu comportamento estaba marcado polas declaracións do mandatario estadounidense na madrugada do domingo e a resposta iraniana da mañá de onte, que avanzaban unha nova fase na guerra e a posibilidade dunha intervención terrestre das forzas armadas de Estados Unidos e Israel sobre chan persa, o que implicaría un alongamento do conflito. Donald Trump ameazou Irán nas súas redes sociais na madrugada do domingo. Neste sentido, asegurou que "se Irán non abre completamente, sen ameazas, o estreito de Ormuz, en 48 horas desde este preciso momento, Estados Unidos atacará e destruirá as súas centrais eléctricas empezando pola máis grande", en referencia á planta de xeración enerxética de Damavand, situada nas proximidades de Tehran e cunha potencia instalada de máis de 2.300 megawatts, unha das máis de 90 coas que conta o país. Ao tempo, avanzou un incremento dos efectivos militares terrestres na rexión. Trump ordena deter os ataques a infraestruturas enerxéticas no Irán após dispararse o prezo do petróleo A presión aumentou cunha información publicada por Axios, un dos medios de prensa de referencia para información sobre a Casa Branca, na súa edición de onte. Na mesma asegurábase que a Administración estadounidense estaría estudando dentro do seu operativo para forzar a apertura do estreito de Ormuz a invasión da illa de Kharg, emprazada no golfo Pérsico e considerada como o principal centro petroleiro do Irán. Nesta lóxica, explicaríase que Estados Unidos decidira enviar á rexión un grupo de buques anfibios e un corpo de 5.000 infantes de mariña. As palabras de Donald Trump do domingo foron respondidas na xornada de onte polas autoridades iranianas. Neste sentido, o Goberno de Tehran asegurou que no caso dun ataque estadounidense ás súas instalacións enerxéticas "responderá atacando as centrais do réxime ocupante", en referencia a Israel, "e as dos países da rexión que abastecen de electricidade ás bases estadounidenses". A este respecto, fixo pública unha relación das infraestruturas de xeración eléctrica existentes en Oriente Medio que Irán consideraría como obxectivos militares. Irán responde a Trump: "Seremos nós quen determinemos cando acaba a guerra" O Executivo do Irán apuntou que "calquera intento de atacar as costas ou illas iranianas provocará que sexan minadas as vías de acceso e liñas de comunicación no golfo Pérsico con varios tipos de minas, incluíndo minas flotantes que poden ser lanzadas desde terra". Neste sentido, concretou que "practicamente todo o golfo Pérsico experimentará unha situación similar á do estreito de Ormuz, e esta vez, xunto ao estreito, o golfo Pérsico quedará efectivamente bloqueado, sendo responsábel desta situación quen lanzou a ameaza". As bolsas de todo o mundo reaccionaron ás ameazas de Trump e a resposta do Irán cunha nova caída. Sen ir máis lonxe, os índices de referencia no espazo comunitario chegaron a rexistrar a primeiras horas da mañá caídas de máis 1,5%, alcanzando o Ibex 35 un descenso de 2,6%. Ao tempo, o prezo do barril de Brent, de referencia para os mercados dos Estados europeos, alcanzou 113 dólares e o gas natural situouse por riba dos 61 dólares tras marcar un incremento na xornada de 3% e unha suba total desde o comezo o conflito de perto de 80%. A situación mudou a media mañá cunha nova mensaxe do mandatario estadounidense nas súas redes sociais. No mesmo, daba marcha atrás ao seu ultimato ao Irán, asegurando que "me comprace informar que Estados Unidos e Irán mantiveron, durante os últimos dous días, conversacións moi positivas e produtivas sobre a resolución total das nosas hostilidades en Oriente Medio. En vista do ton destas conversacións profundas, detalladas e construtivas, que continuarán ao longo da semana, instruín o Departamento de Guerra a que pospoña todos os ataques militares contra centrais eléctricas e infraestruturas enerxéticas iranianas durante un período de cinco días". A s declaracións de Trump foron desmentidas pola axencia de prensa iraniana Fars, a máis importante do país, quen asegurou, citando fontes do Goberno do Irán e da Garda da Revolución, que "non existen comunicacións directas nin indirectas con Estados Unidos". Neste sentido, apuntou que o mandatario estadounidense "recuou" tras advertir Irán que respondería "atacando instalacións de enerxía" en todo Oriente Medio. Na mesma dirección, manifestouse Tasnim, outra axencia iraniana, quen destacou que "non houbo, nin hai negociacións en curso", "con este tipo de guerra psicolóxica nin o estreito de Ormuz volverá ás condicións previas á guerra, nin haberá tranquilidade nos mercados enerxéticos". Alberte Blanco: "Irán actúa con frialdade a pesar dos golpes tremendos que sofre" A xornada fechouse cunha alza nas bolsas de valores e unha caída no prezo dos hidrocarburos. Así, o prezo do barril de Brent finalizou a xornada en 97,1 dólares, tras caer 9,2% e do gas rematou en 59 dólares, rexistrando unha suba as bolsas de valores da Unión Europa e Estados Unidos. A illa de Kharg, punto chave do conflito en Oriente Medio A illa de Kharg é un punto neurálxico no conflito que enfronta Estados Unidos e Israel contra Irán. O emprazamento, situado a 25 quilómetros da costa de iraniana e nun lugar estratéxico do golfo Pérsico, acolle a maior terminal petroleira do país, sendo un dos espazos chave do negocio dos hidrocarburos. Ao tempo, a súa posición privilexiada convértea nun lugar central para o control do estreito de Ormuz, sendo sitio obrigado de paso para as embarcacións que percorren a rexión. Tanto é así, que os petroleiros que parten da nación persa con combustíbel están obrigados a parar na illa para inspeccionar a carga e pagar as peaxes do transporte. O carácter estratéxico da illa situouna no foco do plan militar de Estados Unidos e Israel, sendo xa obxectos de bombardeos pola aviación estadounidense o pasado 14 de marzo. Neste sentido, explícase que a Casa Branca teña en marcha un operativo para facerse co emprazamento, se ben as fontes militares estadounidenses advirten dos riscos da operación, que levaría a guerra a unha fase terrestre, elevaría os prezos do petróleo a uns niveis descoñecidos e daría o conflito un carácter de desgaste, en liña coa táctica seguida polo Goberno de Tehran desde un comezo, coherente co concepto de guerra asimétrica