Trump ameaza a China con aranceis de 104%, as bolsas caen e a UE perfila as primeiras represalias

“Non haberá conversa a menos que nos paguen moitos cartos”, insistiu na madrugada da segunda feira o presidente dos Estados Unidos, Donald Trump, ao respecto dos aranceis universais ás importacións anunciados por Washington a pasada semana, ao tempo que o seu equipo trasladou que máis de 50 estados xa se puxeron en contacto para demandar negociacións coa esperanza de reducilos. Asemade, criticou a China, que respondeu pouco despois con aranceis a produtos estadounidenses de 34%, o mesmo que Trump lle aplicou nesa rolda de medidas coercitivas, e ameazou con que se antes da terza feira non retira a represalia aprobará novos aranceis de 50%, elevando a 104% o gravame ás súas mercadorías. Sexa como for, a fin do libre comercio que o propio país americano impuxera ao mundo para o seu beneficio hai oito décadas levou a segunda feira por terceira xornada consecutiva a caídas nas bolsas mundiais, e a axencia Bloomberg estimou pola mañá que perderon 8,7 billóns de euros desde a quinta feira. Seis deses billóns corresponden ás bolsas dos Estados Unidos nos últimos dous días laborábeis da pasada semana, cunha forte baixada entre outros das empresas tecnolóxicas. “Non quero que baixe nada, mais ás veces hai que tomar medicamentos para solucionar algo”, reaccionou Trump en alusión ao déficit comercial, quen a pesar dos datos nos Estados Unidos fixo énfase en que os mercados chineses “están a colapsar”. O mandatario referíase á caída de 13,2% no Hang Seng, o principal índice de Hong Kong (a maior baixada desde 1997), e de 7,34% no de Shanghai, que non traballaron a pasada sexta feira ao tratarse dun festivo no país. Con todo, a diferenza do S&P 500, o principal indicador estadounidense, que estaba 2,5% por baixo do seu nivel hai un ano antes do comezo da sesión, o Hang Seng gañou 18,6% nese tempo. Asia, primeiro exportador do mundo e principal obxectivo dos aranceis de Trump No continente, a caída foi xeneralizada, de 7,8% no principal indicador xaponés, 9,7% no de Taiwán, 4,2% no de Australia, 7,5% no de Singapur ou 5,5% no de Corea do Sur, o que tamén se estendeu a Europa, cos indicadores da Unión Europea (UE), Alemaña, Francia, o Estado español e o Reino Unido perdendo entre 4,3% e 5,1%, e logo acabou por repetirse após a apertura das bolsas en América, mais cunha menor intensidade, cunha baixada de 2% na Arxentina, 3% en Chile ou 1% nos Estados Unidos. A reacción no resto do mundo á guerra comercial desatada por Trump segue a ser mixta incluso despois da primeira contramedida chinesa, liderando a contestación no continente que máis exporta. A segunda economía da rexión e un aliado chave de Washington, o Xapón, advertiu dunha resposta “sen precedentes”, mentres que, pola contra, a India transmitiu que polo de agora non tomará ningunha medida de represalia. Ao tempo, Malaisia comunicou que impulsará unha resposta unida da Asociación de Nacións do Sueste Asiático (ASEAN), cuxos membros foron vítimas do conxunto de aranceis máis alto do planeta por parte dos Estados Unidos, como o 49% de Camboxa ou o 46% de Vietnam. Nese sentido, o responsábel de Comercio da Comisión Europea, Maros Sefcovic, admitiu a segunda feira que a decisión de Trump implica “un cambio de paradigma do sistema global de comercio”. As e os ministros do ámbito na UE trataron precisamente “como preparar os nosos próximos movementos con relación aos Estados Unidos", e tamén "como preparar o sistema de intercambio para evitar desvíos no comercio” entre a falta de consenso, con parte dos membros instando a negociar cos Estados Unidos antes de pór en marcha represalias e a outra optando por unha resposta máis directa. Irlanda, os Países Baixos ou Suecia encabezarían o primeiro grupo, á vez que Francia ou Alemaña estarían a desmarcarse no liderado do segundo. Laurent Saint-Martin, titular de Comercio Exterior de París, aseverou que non se pode “descartar ningunha opción”, alertando da posibilidade de que a resposta sexa “extremadamente agresiva”. No caso de Berlín, que leva dous anos en recesión tras perder o acceso a gas natural ruso a baixo prezo ao aplicar a posición marcada por Washington no tocante á guerra de Ucraína, o que todo indica que será o futuro chanceler, Friedrich Merz, reclamou unha acción rápida para que o país “recupere a súa competitividade internacional o antes posíbel”. Os Estados Unidos ultiman a declaración dunha guerra comercial ao resto do mundo Alemaña é o cuarto maior importador de mercadorías aos Estados Unidos, só por detrás de México, a China e o Canadá. Nesa liña, a presidenta da Comisión, Ursula von der Leyen, aposta pola negociación, e comunicou que ofreceu aos Estados Unidos un pacto para que ambas as partes eliminen os aranceis para bens industriais, pouco antes de que Sefcovic anunciara que o 15 deste mes entrarían en vigor as primeiras medidas de represalia, un mes antes de activarse o resto. BNG e PSdeG piden a Rueda que actúe Xa na Galiza, a líder da oposición e do Bloque Nacionalista Galego (BNG), Ana Pontón, e mailo secretario xeral do Partido dos Socialistas de Galicia (PSdeG), José Ramón Gómez Besteiro, urxiron o presidente galego, Alfonso Rueda, do Partido Popular (PP), a que poña en marcha medidas dirixidas aos sectores produtivos que máis exportan aos Estados Unidos, e que polo tanto se verían afectados polos aranceis de Trump, após defender María Jesús Lorenzana, conselleira de Economía e Industria, que non tomarían ningunha decisión até comprobar se o Executivo español emite unha convocatoria de axudas públicas. 45% de probabilidade de recesión nos Estados Unidos, di Goldman Sachs Unha parte importante das multinacionais privadas dos Estados Unidos, as máis beneficiadas polas políticas gobernamentais, están a avisar dos riscos das medidas de Trump para a economía do país. Goldman Sachs, un dos bancos de investimento máis grandes do mundo, incrementou por segunda vez nunha semana as probabilidades dunha recesión nos Estados Unidos até 45%, menos en todo caso do 60% no que as fixou JP Morgan. Outras cinco entidades máis tamén elevaron a súa previsión de recesión. Ademais, o conselleiro delegado de JP Morgan, Jamie Dimon, remarcou que “aínda non está claro se o paquete de aranceis provocará unha recesión, mais si desacelerará o crecemento”, destacando a desregulación como un aspecto positivo das “turbulencias” na economía. Bill Ackman, que apoiou a candidatura de Trump e xestiona Pershing Square Capital Management, aseverou que o mandatario está a perder a confianza das elites corporativas, facendo un chamamento a frear 90 días o conflito comercial, que cualificou de “guerra nuclear económica”. Despois de que a poboación se aprestara a facer compras masivas de produtos que se prevé suban de prezo por mor dos aranceis, o sábado decorreu a maior xornada de protesta contra as políticas de Trump desde a súa volta á Casa Branca hai dous meses e medio, nunha xornada na que se produciron arredor de 1.200 mobilizacións de estadounidenses ao longo de todo o territorio, e que tamén se rexistraron no Canadá e México, así como en capitais europeas como Berlín, París ou Londres.