Unha trintena de países piden en Colombia un embargo de armas contra Israel

Bogotá, a capital de Colombia, acolleu onte e antonte un encontro sobre a Faixa de Gaza onde participaron representantes de máis de 32 Estados. Ademais de Bolivia, Colombia, Cuba, Honduras, Malaisia, Namibia, Senegal e Suráfrica, nacións que integran o denominado Grupo da Haia, estiveron presentes outros países americanos, como Brasil, Chile, Uruguai ou Venezuela; africanos, como Alxeria ou Exipto; asiáticos, como Catar, China, Exipto ou Turquía, e europeos, como Estado español, Eslovenia ou Irlanda. O cumio, en cuxo impulso xogou un papel decisivo o presidente colombiano, Gustavo Petro, rematou cunha declaración final na que se demanda "aplicar as decisións da Corte Penal Internacional e da Corte Internacional de Xustiza contra Israel, incluída a orde de detención de Benjamin Netanyahu"; establecer "un embargo de armas e municións ao Estado israelí", e "impedir a atracada nos seus portos de barcos vinculados ao traslado de armamento e combustíbel cara ao réxime de ocupación". As conclusións do encontro coinciden no esencial coas reivindicacións do Grupo da Haia, constituído en xaneiro de 2024 para dar a resposta á crise humanitaria na Faixa de Gaza e ao xenocidio desenvolto por Israel contra Palestina. Precisamente, os países integrantes do Grupo da Haia lideran a estratexia contra Benjamin Netanyahu diante da Corte Internacional de Xustiza, sendo Suráfrica o primeiro Estado en denunciar o mandatario israelí por crimes de guerra diante da xustiza internacional á volta de novembro de 2023. A relatora especial da Organización de Nacións Unidas (ONU) para a Faixa de Gaza, Francesca Albanese, quen clausurou onte encontro de Bogotá, destacou na súa intervención que as decisións adoptadas polo Grupo da Haia desde xaneiro de 2024 foron "simbolicamente poderosas" e un sinal do "cambio discursivo e político necesario" sobre Palestina na comunidade internacional. A este respecto, apuntou que as súas propostas están baseadas "nas súas obrigas segundo o Dereito Internacional", recalcando que "son obrigas, non simpatía nin caridade". Albanese, sancionada a semana pasada pola Administración estadounidense por denunciar os crimes sionistas en Palestina, reclamou que "cada Estado revise e suspenda inmediatamente os seus vínculos co Estado de Israel, as súas relacións militares, estratéxicas, políticas, diplomáticas e económicas, tanto de importacións como de exportacións". Nesta dirección, asegurou que "tratar a ocupación como algo normal significa apoiar ou proporcionar axuda ou asistencia á presenza ilegal de Israel nos territorios palestinos ocupados". Fortes críticas a Israel A responsábel da ONU para a Faixa de Gaza mostrouse moi crítica coa actitude mantida pola Unión Europa (UE) con Israel. Neste sentido, afirmou que "está claro que a Unión Europea […] está a deixar de lado o dereito á vida, realmente o dereito á vida, á mera vida, de millóns de persoas". Precisamente, as declaracións de Albanese chegaron dous días despois que os Estados comunitarios rexeitaran impor sancións ao Estado israelí, por considerar, en palabras da súa Alta Representante para Política Exterior, Kaja Kallas, que se perciben "sinais positivos" na súa actitude en relación coa axuda humanitaria. Amnistía Internacional cargou, tamén onte, contra a posición adoptada polos Estados comunitarios no seu cumio da terza feira. A este respecto, a secretaria xeral da organización, Agnès Callamard, asegurou que "isto será lembrado como un dos momentos máis vergoñentos da historia da Unión Europea". Neste punto, aseverou que "os líderes europeos tiveron a oportunidade de adoptar unha postura de principios contra os crimes de Israel, pero no seu lugar déronlle luz verde para continuar co seu xenocidio en Gaza, a súa ocupación ilegal de todo o territorio palestino ocupado e o seu sistema de apartheid contra os palestinos". O encontro de Bogotá rematou cunha marcha desde a sede do Ministerio de Asuntos Exteriores de Colombia, onde se desenvolveu, até a praza de Bolívar, no centro histórico da capital do país. Na mesma participaron membros das delegacións diplomáticas presentes no cumio, así como representantes de organizacións populares e do movemento de solidariedade con Palestina, que trasladaron o seu apoio ás conclusións do conclave. O feche do cumio sobre Palestina desenvolvido na capital de Colombia coincidiu co asasinato dun mínimo de 21 persoas na cidade gazatí de Khan Younis. Segundo indicaron nun comunicado as autoridades da Faixa, "21 cidadáns caeron mártires, 15 deles asfixiados polo lanzamento de gases lacrimóxenos contra persoas famentas", cando se atopaban agardando por alimentos nun centro de distribución da Fundación Humanitaria para Gaza. A Organización de Nacións Unidas elevou a 876 as persoas mortas nas últimas seis semanas cando tentaban conseguir alimentos nos centros da referida fundación estadounidense apoiada por Israel. O Sur Global gaña peso como actor internacional O encontro de Bogotá é unha expresión da emerxencia dos denominados Estados do Sur Global como actores chave na política internacional en defensa dunha orde mundial baseada en regras e no respecto á lexislación. Precisamente, esta foi a idea traslada polo presidente colombiano Gustavo Petro nun artigo de prensa publicado o pasado 8 de xullo no xornal británico The Guardian para explicar os obxectivos do cumio. Alí escribía que, "para os miles de millóns de persoas do Sur Global que dependen do Dereito Internacional para a súa protección, hai moito en xogo". Petro analizaba que "a disxuntiva que temos ante nós é dura e implacábel. Podemos manternos firmes na defensa dos principios legais que buscan previr a guerra e o conflito, ou contemplar con impotencia como o sistema internacional se derruba baixo o peso dunha política de poder desenfreada". Neste punto, sinalaba que, nun "grave contexto humanitario, a conferencia de emerxencia de Bogotá convoca os Estados para pasar da condena á acción colectiva", apuntando que "podemos desafiar a visión de Donald Trump e de Netanyahu dun mundo onde a forza é a razón". Unha mensaxe coincidente cun dos eixos da proposta do Grupo dos Brics.