O SPD alemán anuncia impulsar a ilegalización do partido de ultradereita AfD
O Congreso do Partido Socialdemócrata Alemán (SPD) decorrido este domingo en Berlín aprobou finalmente apoiar a tramitación da ilegalización do partido de ultradereita Alternativa por Alemaña (AfD).
Os delegados aprobaron a moción presentada pola Executiva do partido para apoiar a creación dun grupo de traballo que reúna as probas que demostrarían a inconstitucionalidade do partido. De lograr estas probas, o SPD presentaría a solicitude de ilegalización ante o Tribunal Constitucional Federal, informa a televisión pública alemá ARD.
O secretario xeral do SPD, Lars Klingbeil, resaltou que esta é unha "tarefa histórica para expulsalos outra vez do Parlamento". "Segundo a nosa experiencia histórica, temos unha Constitución que nos dá as ferramentas necesarias" e "é o noso deber democrático utilizar estes instrumentos para protexer a Constitución", argumentou.
O Partido Socialdemócrata considera que AfD representa unha seria ameaza para os valores democráticos que defende a Constitución alemá. De feito, a súa iniciativa para ilegalizar o partido de ultradereita baséase no artigo 21 desa norma fundamental, que permite a disolución de partidos que "polos seus obxectivos ou o comportamento dos seus adherentes busquen menoscabar ou abolir a orde democrática libre ou poñer en perigo a existencia da República Federal de Alemaña".
Non máis "vacilacións"
A Oficina Federal para a Protección da Constitución (BfV) será clave neste proceso, destacou Klingbeil. "Se din que é un partido extremista, de extrema dereita, non debería haber máis vacilacións", expuxo, á vez que acusou o seu compañeiro de coalición, a Unión Demócrata Cristiá (CDU), permitir manobras dilatorias coa seu defensa do combate "político" contra AfD porque "non se pode ilegalizar a frustración".
AfD denunciou a BfV amparándose na súa forte implantación en rexións como a antiga Alemaña Oriental e espera saír reforzada se finalmente os tribunais fallan en contra da súa ilegalización.