O réxime israelí centra a agresión en Cisxordania tras o fracaso na Faixa de Gaza

Como mínimo 10 persoas, unha de 16 anos, foron asasinadas en Xinin, na Cisxordania ocupada, polos militares israelís até a cuarta feira, na segunda xornada dunha incursión masiva dos sionistas contra o territorio palestino. A operación militar, poucos días despois do comezo do alto o fogo en Gaza entre Hamás e o Executivo de ultradereita israelí, que puxo fin polo de agora ao xenocidio, inclúe “abusos, ataques e ameazas xeneralizadas contra os cidadáns, así como actos de vandalismo e destrución nos fogares”, sinalou a Comisión de Asuntos de Detidos e Ex Detidos e a Sociedade de Prisioneiros Palestinos, e efectuáronse máis de 80 arrestos en múltiples puntos da zona, incluído o dunha trintena de traballadores que construían unha estrada. Até 600 persoas levaban a cuarta feira retidas máis de 24 horas polas tropas do réxime israelí no Hospital Gobernamental de Xinin, reportou a axencia Wafa, e Muhammad Jarar, alcalde da cidade, denunciou que obrigaron múltiples palestinas a marchar do campo de refuxiadas de Xinin e desprazarse a Wadi Burqin, na periferia da urbe. Tamén informou de que impiden o movemento dos equipos municipais, e un traballador da Media Lúa Vermella Palestina confirmou á axencia EFE que tamén están a bloquear o paso das ambulancias. Adel Besher, residente en Xinin, explicou que ninguén puido rescatar “tres ou catro persoas feridas perto da miña casa” posto que “as forzas israelís dispararon contra calquera que se lles achegase”. Como é habitual, os soldados e os vehículos blindados foron acompañados de escavadoras militares, que arrasaron rúas e danaron a infraestrutura eléctrica do campo de persoas refuxiadas, no que viven arredor de 14.000 palestinas e palestinos que proceden da limpeza étnica que seguiu á fundación do Estado de Israel, e que é un dos principais focos de resistencia á ocupación no territorio. Logo de sucesivos ataques nos últimos meses, a incursión desta semana deixou o campamento “case inhabitábel”, incidiu Roland Friedrich, da misión da Organización das Nacións Unidas (ONU) para as refuxiadas e refuxiados palestinos, e case 2.000 persoas foron desprazadas. Ademais, unha palestina que sufriu un ataque cardíaco morreu perto de Hebrón despois de que as forzas israelís bloquearan un posto de control. Cisxordania, en teoría rexida pola Autoridade Nacional Palestina (ANP), é un territorio ocupado que os sionistas buscan anexionar e no que aplican un sistema de apartheid que “constitúe unha discriminación sistémica” contra as e os palestinos, concluíu en xullo de 2024 o Tribunal Internacional de Xustiza. Ademais de roubar terras e recursos chave como a auga, Israel desenvolveu asentamentos ilegais por toda a área nos que instalou máis de medio millón de colonos, que atacan repetidamente a poboación palestina co aval do réxime e das forzas sionistas. Só esta semana feriron máis dunha vintena de persoas e incendiaron vehículos, casas, unha gardaría e un taller, en paralelo á revogación nos Estados Unidos por parte do presidente Donald Trump das limitadas sancións a colonos que impuxera Joe Biden. Israel amplía en Cisxordania o peor ataque en dúas décadas e xa usando "estándares de guerra" De forma paradoxal, o ministro de Defensa sionista, Israel Katz, relacionou a operación coa defensa da vida dos colonos, e asegurou que están a aplicar as "leccións" de Gaza para acabar co terrorismo, como designan á resistencia palestina, que se está a enfrontar á incursión. Asemade, os sionistas valaron as poboacións palestinas e instalaron 898 postos de control e portas para segregar as áreas palestinas. Desde o inicio en outubro de 2023 do xenocidio en Gaza instaláronse máis de 170 portas de ferro, sinalou a Comisión de Colonización e Resistencia ao Muro da ANP, e os colonos lanzaron 1.800 ataques que, como as incursións israelís, xa eran comúns antes da agresión militar a Gaza. Neste período como mínimo 870 persoas, 177 nenas e nenos, foron asasinadas por militares ou colonos israelís en Cisxordania, 6.700 feridas, 13.572 arrestadas e 2.168 estruturas palestinas demolidas. "Sobrecompensar" Gaza Hamás acusou a ANP de “participar” na operación israelí en Xinin, onde desenvolveu nas últimas semanas varias intervencións contra as milicias que resisten á ocupación, o que Fatah, a principal forza do organismo, rexeitou como un intento de “distorcer”. O analista Mohamad Elmasry subliñou á canle Al Jazeera que, despois do inicio dunha tregua que é “unha especie de derrota” para o primeiro ministro israelí Benjamin Netanyahu, posto que Hamás está “vivo e funcionando en Gaza” a pesar das súas promesas de destruír a organización, agora “trata de distraer a atención” e “en certo modo sobrecompensar intensificando a situación en Cisxordania”. Netanyahu amaga con impedir a última hora, outra vez, o alto o fogo en Gaza Ao respecto, a relatora especial da ONU para Palestina, Francesca Albanese, alertou de que, “se non se lle obriga a deterse, o xenocidio de palestinos por parte de Israel non se limitará a Gaza”. O presidente da Asociación galaico-árabe Jenin, Sami Ashour, orixinario de Khan Younis, no sur de Gaza, vén de estar en Exipto e Xordania, e incide en que “agardábase máis” dos países árabes, matizando que “os pobos son irmáns” e que “a nivel de gobernantes” están obrigados a “aceptar as regras do xogo” para ser parte do sistema internacional, e “non poden desafiar os Estados Unidos por exemplo”. Nesta “nova etapa” espera un maior apoio na reconstrución de Gaza, “absolutamente destruída” e na que non “quedan infraestruturas, casas, hospitais”. O presidente dos xornalistas palestinos reclama "xustiza" O presidente do Sindicato de Xornalistas Palestinos e vicepresidente da Federación Internacional de Xornalistas, Nasser Abu Baker, visitou a terza feira o Concello de Compostela, no que foi recibido pola alcaldesa Goretti Sanmartín (Bloque Nacionalista Galego), que lle trasladou a “relación moi sólida entre o pobo galego e o palestino”. No acto, Baker defendeu que apoiar Palestina é “apoiar a xustiza”, facendo énfase en que “precisamos convivir, pero precisamos xustiza”, e desexando que “a paz chegue pronto”. O xornalista brindou a cuarta unha conferencia na capital galega organizada pola Asociación de xornalistas de Compostela, na que abordou o papel chave da información nos conflitos armados. No xenocidio en Gaza, Israel asasinou máis de 200 xornalistas, indican os datos das autoridades gazatís, no medio dunha ofensiva contra as e os profesionais que permitiron que o mundo coñecera os crimes sionistas, e que converteu o réxime nun dos estados do mundo con máis xornalistas presos. Precisamente sobre Gaza, e poucos días antes de que dean inicio as conversas entre Hamás, que controla o enclave, e o Executivo israelí de cara á segunda fase do alto o fogo, prevista seis semanas despois do comezo da primeira etapa o domingo, David Amsalem, ministro de Cooperación Rexional do Gabinete sionista, asegurou que “non se levará a cabo a segunda fase”. De feito, a cuarta feira transcenderon novas violacións do alto o fogo por parte de Israel, con ataques na costa da cidade de Gaza e en Rafah, no sur do territorio, onde morreu cando menos unha persoa.