Puigdemont acusa de corrupción as e os fiscais do Supremo tras inculpalo por terrorismo

Non “teño ningunha dúbida de que entre xuíces, fiscais, policías e determinados políticos e medios abundan os artificieiros do Estado de dereito, que cren que calquera medio é lícito para defender España”, sostivo hoxe o ex presidente catalán Carles Puigdemont (Junts), que inculpou as e os fiscais do Tribunal Supremo español por constituír unha “trama corrupta” delituosa. Facendo fincapé en que só hai dúas opcións para “que un fiscal español conclúa que eu son o xefe absoluto dunha organización terrorista”, Puigdemont explicou que, ou dan “credibilidade a unha información delirante e manipulada dos servizos policiais”, algo que cualificou de “habitual cando se trata do independentismo”, ou son conscientes de que é “unha información delirante e manipulada” mais aceptan utilizala “para un propósito puramente político”. Con todo, confiou na “vontade e coraxe” das e dos profesionais que non colaboran nestas confabulacións á hora de “perseguir estas condutas”. Pouco antes, o portal El Español filtrara o informe da Xunta de Fiscais do Supremo que decorreu hai dúas semanas, na que 11 de 15 integrantes desta sección do Ministerio Público afirmaron que existen indicios dabondo para imputar o ex mandatario catalán e Ruben Wagensberg, ambos os dous aforados, e 12 avalaron que se lles atribúa un delito de terrorismo. Nesa xuntanza, na que desbotaron o informe de Álvaro Redondo, fiscal responsábel da causa no Supremo, e que como o fiscal Miguel Ángel Carballo, que encabeza o Ministerio Fiscal no caso na Audiencia Nacional, subliñara que non existen indicios para acusar Puigdemont, o fiscal Fidel Cadena recolleu nun documento como a meirande parte da Xunta recalcou que Puigdemont era o “líder absoluto” de Tsunami Democràtic, a entidade catalá que liderou en 2019 as protestas contra as sentenzas a membros do Executivo catalán por organizar un referendo de independencia. O grupo, coordinado a través das novas tecnoloxías -sen ningunha persoa que exercera como voceira- para impulsar as mobilizacións, é definido como “un grupo organizado de carácter terrorista”, algo que xustifican pola intención de Tsunami de “subverter a orde constitucional, alterar a paz pública, provocar terror nunha parte da poboación e a desestabilización grave das institucións políticas do Estado”. Nese sentido, afirman que o ex líder da Generalitat podería ter freado o “desenvolvemento dos delitos presuntamente cometidos” se retirase o “seu apoio carismático”, mais “animou a seguir coas accións violentas que se levaron a cabo co seu coñecemento e consentimento”, insistindo na liña marcada polo xuíz da Audiencia Nacional Manuel García-Castellón de vincular a morte por un infarto dun cidadán francés no aeroporto Josep Tarradellas Barcelona-El Prat coa manifestación de Tsunami, da que aseveran que hai indicios para tratala como unha detención ilegal terrorista polo bloqueo da terminal. O certo é que García-Castellón, un maxistrado vinculado co Partido Popular (PP), non imputou por terrorismo Puigdemont, Marta Rovira (secretaria xeral de Esquerra Republicana de Catalunya [ERC] exiliada en Suíza), Wagensberg, membro da Mesa do lexislativo catalán por ERC, e outras persoas até novembro do pasado ano, máis de catro anos despois do comezo do proceso xudicial e xusto cando estaba a ultimarse o pacto entre o PSOE e as forzas soberanistas catalás para investir Pedro Sánchez como presidente do Estado español a cambio, entre outras cuestións, dunha lei de amnistía que beneficiase as persoas independentistas represaliadas. Antes, a Garda Civil acusara Rovira de liderar Tsunami Democràtic. Rapidamente, e no marco das críticas do fiscal responsábel do caso pola súa instrución xudicial, o xuíz demandou ao Supremo que asumise a causa ao estar entre os acusados Puigdemont e Wagensberg, aforados por desempeñarse como eurodeputado o primeiro e deputado no Parlament o segundo, que se exiliou en Suíza após ser imputado. Hoxe, García-Castellón revolveuse contra a negativa da Confederación Helvética a executar a comisión rogatoria na que reclamaba que se localizase e facilitase a información bancaria de Rovira, detallando que ten que determinar se a súa petición reviste “carácter político” e instándoo a debullar as consecuencias da lei de amnistía sobre o proceso xudicial, amais de apuntar que non está clara nin a pertenza de Rovira a Tsunami nin o suposto delito de terrorismo cometido. O xuíz da Audiencia proclamou nunha resolución que é “inadmisíbel” a demanda de información sobre as implicacións da amnistía, acusando Suíza de “nesgo político” e rexeitando brindar esta documentación por non ter relación coa súa “función”, a pesar de formar parte da ofensiva contra a norma lanzada polo sistema xudicial español. Ao tempo, asegurou que os tratados internacionais impiden rexeitar a asistencia xudicial por motivos políticos en causas de terrorismo. Distintos tribunais da Unión Europea (UE) rexeitaron as peticións españolas para extraditar persoas independentistas catalás perseguidas por Madrid. Pola súa parte, Vicente Guilarte, presidente provisorio do Consello Xeral do Poder Xudicial, que leva máis de cinco anos co mandato caducado polo bloqueo do PP, o que mantén a maioría conservadora no órgano, admitiu que “no propio Consello non demos un exemplo de independencia”, incidindo en que se “fomentou a bipolarización entre conservadores e progresistas”. Sánchez en Marrocos O presidente español reuniuse hoxe co rei marroquí, Mohamed VI, na súa visita a Rabat, na que abordaron varios temas como a apertura das aduanas en Ceuta e Melilla, un dos puntos da folla de ruta para intensificar a relación con Marrocos após aceptar Sánchez a soberanía alauita sobre o Sáhara Occidental para reactivar as relacións bilaterais.