O presidente de Irán promulga a lei que suspende a cooperación coa OIEA
O presidente de Irán, Masud Pezeshkian, promulgou esta cuarta feira a lei apoiada polo Parlamento para suspender a cooperación co Organismo Internacional para a Enerxía Atómica (OIEA), unha medida que entra en vigor no medio das tensións tras a ofensiva militar lanzada o 13 de xuño por Israel contra o país persa.
A decisión de Pezeshkian chegou perto dunha semana despois de que a Asemblea Consultiva Islámica –nomee oficial do Parlamento– aprobase dito proxecto de lei, que prohibirá que os inspectores do organismo entren ao país se non se garante a seguridade das instalacións nucleares, segundo informou a cadea de televisión pública iraniana, IRIB.
Alireza Salimi, membro da presidencia do Parlamento de Irán, confirmou que a lei foi aprobada despois de que os lexisladores desen o seu visto e prace, o que levou ao presidente da Asemblea Consultiva Islámica, Mohamed Qalibaf, a asegurar o 26 de xuño que o organismo xa elevara o texto para a súa ratificación.
A orixe do conflito
O Goberno de Irán acusou o director xeral do OIEA, Rafael Grossi, de "escurecer a verdade" cun "informe nesgado" que foi "instrumentalizado" polo E3 –Francia, Reino Unido e Alemaña– e os Estados Unidos para preparar a resolución aprobada o 12 de xuño pola Xunta de Gobernadores do OIEA, que sostivo que Irán estaba a violar as súas obrigas por primeira vez en dúas décadas.
O conflito estalou apenas un día despois, o 13 de xuño, cando Israel lanzou unha ofensiva militar contra Irán –que respondeu disparando mísiles e drones contra territorio israelí–, á que se sumaron o 22 de xuño os Estados Unidos cunha serie de bombardeos contra tres instalacións nucleares iranianas –as de Fordo, Natanz e Isfahán–, aínda que desde o 24 de xuño hai un cesamento do fogo en vigor.
Israel afirmou que o obxectivo da súa ofensiva era facer fronte a un suposto programa de armamento nuclear por parte de Teherán, que rexeitou en todo momento estas acusacións e negou que conte cun programa nuclear militarizado, lembrando que mesmo o seu líder supremo, o aiatolá Ali Khamenei, aprobou hai anos un edicto relixioso prohibindo o desenvolvemento de armas nucleares.
Ademais, a onda de bombardeos foi desencadeada apenas dous días antes dunha nova reunión programada entre Irán e os Estados Unidos, que ía ser a sexta, para tentar alcanzar un novo acordo sobre o programa nuclear iraniano, despois de que Donald Trump anunciase en 2018, durante o seu primeiro mandato, a retirada unilateral de Washington do histórico pacto alcanzado en 2015 que incluía numerosas inspeccións e limitacións ao programa de Teherán.