A operación contra o maior cártel de México deixa 26 mortes, incluída a do capo do grupo

México volve de maneira paulatina a unha situación de normalidade tras a onda de violencia desatada logo do abatemento de Nemesio Oseguera Cervantes, alias 'El Mencho', que deixou un mínimo de 26 mortes entre axentes, civís e integrantes do Cártel Jalisco Nueva Generación, o maior de todo México. O domingo, un operativo das forzas federais capturaron o xefe da banda de narcotráfico, quen non puido superar as feridas derivadas do abatemento, o que provocou a súa morte cando estaba sendo trasladado a un hospital de Jalisco para ser atendido. A operación de captura provocou accións de represalia por parte da violencia organizada. Neste contexto, até 17 axentes das forzas de seguridade faleceron en diferentes incidentes que foron xurdindo en resposta á morte de 'El Mencho' tras caer preso en Tapalpa, no estado de Jalisco. Así mesmo, confirmouse a morte dunha muller que se viu atrapada nun tiroteo en Zapopan, e a dun garda de seguridade nun motín que se produciu no cárcere de Ixtapa, en Puerto Vallarta, na que homes armados propiciaron a fuga dun número aínda por confirmar de presos, como parte dos disturbios que se produciron en varias zonas do país pola morte deste capo. Os Estados Unidos designan como terroristas cárteles mexicanos Pola súa parte, oito membros do Cártel Jalisco Nueva Generación, entre eles o propio líder, faleceron durante os enfrontamentos que se rexistraron por todo Jalisco. Ademais, as autoridades informaron da detención de 27 persoas por cometer feitos violentos, desde a participación en bloqueos e ataques até actos de pillaxe en bancos e tendas. O operativo concentrouse en Tapalpa, a uns 150 quilómetros ao sur da capital de Jalisco, Guadalaxara, mais abrangueu practicamente toda a costa deste Estado, incluíndo Puerto Vallarta, municipios do sur e, en particular, Guadalaxara e as localidades próximas, onde o servizo de transporte público foi suspendido desde as 9 horas do domingo e pediuse á poboación que evitase saír das vivendas. "É importante que se saiba que a intención era a detención [de 'El Mencho'] e que se respondeu á agresión [do cártel], iso é moi importante, porque é no marco da lei, no marco do noso sistema penal, da Constitución e das leis como se actúa e se opera", reivindicou onte a presidenta de México, Claudia Sheinbaum. Alén de Jalisco, os incidentes provocaron o bloqueo de varias estradas no país. Con todo, 100% da rede viaria estaba operativa o 23 de febreiro, segundo o Goberno. Ademais, as clases foron suspendidas durante a xornada de onte en numerosos centros de ensino de todos os niveis educativos, incluído o universitario. Tamén as citas para a vacinación foron canceladas en varios centros de saúde, aínda que os servizos de urxencia e a atención médica continuaron funcionado. Por outra parte, o Aeroporto Internacional de Puerto Vallarta viu cancelados os voos internacionais e a maioría dos estatais, mentres que outras terminais tamén rexistraron algunhas cancelacións. Apoio dos Estados Unidos A portavoz da Casa Branca, Karoline Leavitt, confirmou onte que a operación militar de México contou co apoio da Intelixencia estadounidense. "Os Estados Unidos proporcionaron apoio en materia de intelixencia ao Goberno mexicano para axudar nunha operación en Tapalpa, Jalisco, na que foi eliminado 'El Mencho', un infame narcotraficante", dixo. "Os Estados Unidos aseguraranse de que os narcoterroristas que envían drogas mortais ao noso país enfronten a ira da xustiza que tanto se merecen", agregou a portavoz da Casa Branca. "O proceso de intelixencia é moi complicado, requírese de moito tempo, require solicitar información, indicios, de diversas fontes nacionais e internacionais. Como Forzas Armadas fortalecemos a relación co Comando Norte dos Estados Unidos, e é importantísimo ese intercambio de información", explicou o secretario de Defensa Nacional de México, Ricardo Trevilla Trejo. Grazas a ese traballo, precisou, a pasada sexta feira situouse un home de confianza dunha das parellas sentimentais de 'El Mencho' en Tapalpa. O sábado, despois de reunirse con el, a muller retirouse e o capo permaneceu custodiado cun círculo de seguridade. Cuba, Venezuela e México rexeitan as ameazas arancelarias de Trump contra os países que fornezan A Habana de petróleo Ese mesmo día, forzas especiais organizaron o operativo de detención coa participación de membros do Exército e a Garda Nacional e o apoio de seis helicópteros e avións da Forza Aérea Mexicana. "Unha vez que se corrobora a presenza de 'El Mencho', a forza terrestre desprázase ao lugar onde se atopaba para efectuar a detención. Íase facer un cerco", sinalou Trevilla Trejo ao lembrar que o xefe do cártel tiña dúas ordes de detención por delincuencia organizada. Co operativo en marcha, os custodios do capo comezaron a disparar. "Foi unha ataque moi violento que realizou o persoal de delincuencia organizada. O persoal militar repeleu a acción, e faleceron alí oito delincuentes", engadiu. Despois, 'El Mencho' e o seu círculo próximo fuxiron cara a unha zona boscosa e os militares atopáronos ocultos entre a vexetación armados con lanzafoguetes que non alcanzaron a disparar contra os efectivos, mais si contra un helicóptero que tivo que aterrar de emerxencia. Foi nese momento no que o capo e dous escoltas quedaron feridos. "Estaban moi graves", confirmou Trevilla Trejo. Ante a situación, os tres narcos e un militar foron trasladados rumbo a un hospital en Jalisco, mais faleceron no traxecto, polo que se decidiu mudar o destino a Cidade de México. Sheinbaum defende unha situación de normalidade na maioría do país Claudia Sheinbaum, a presidenta de México, deu o 23 de febreiro o "pésame" e ofreceu o seu "recoñecemento" aos efectivos que perderon a vida durante o operativo que acabou coa vida do xefe do Cártel Jalisco Nueva Generación, Nemesio Oseguera Cervantes, alias 'El Mencho'. A líder reivindicou a situación de normalidade, afirmando que "todas as estradas están libres, non teñen problema, xa se pode circular". "Suspendéronse algúns voos de forma preventiva polas propias liñas aéreas, particularmente en Puerto Vallarta, e esperamos que, a máis tardar mañá [hoxe] xa se restabelezan todos os voos", dixo. "Algunhas universidades decidiron suspender as clases, esperemos que no día de mañá [hoxe] se poidan recuperar", acrecentou. "Todas as operacións se realizaron polas forzas federais, non houbo participación no operativo de forzas dos Estados Unidos, o que houbo é moito intercambio de información, como xa dixemos moitas veces, o entendemento cos Estados Unidos baséase fundamentalmente en intercambio de intelixencia de información. Neste caso, houbo información que prestou o Goberno dos EUA, mais toda a operación e a súa planificación é responsabilidade das forzas federais, neste caso da Secretaría da Defensa Nacional", explicou a presidenta. "Hai calma e paz, e o máis importante é que estamos traballando, e se hoxe [por onte] se dá calquera situación, hai un centro de mando, no que están todas as forzas federais coordinadas", destacou Sheinbaum. "O día de mañá [hoxe] esperamos que todo volva a normalidade en todas as entidades federativas, mais hai que dicir que na maioría non houbo ningún problema", concluíu.