A ONU conclúe que Israel comete un xenocidio en Gaza desde 2023: a comunidade internacional debe "evitar e castigar o delito"
A Comisión Internacional Independente de Consulta das Nacións Unidas, nun informe publicado a primeira hora desta terza feira, concluíu, "en termos razoábeis", que Israel "cometeu xenocidio" contra o pobo palestino en Gaza desde 7 outubro de 2023.
A Comisión atopa que catro actos xenocidas foron levados a cabo: asasinatos, a provocación de danos corporais e mentais, a provocación deliberada dun empeoramento das condicións de vida de forma calculada para levar destrución ao territorio, e a imposición de medidas para evitar nacementos.
Estes actos, prosegue a Comisión Internacional Independente de Consulta das Nacións Unidas, "foron cometidos por parte das autoridades israelís e as forzas de seguranza cunha intención específica de destruír o pobo palestino en Gaza".
Os descubrimentos da Comisión son baseados en evidencias extensa de asasinatos "sistemáticos e inéditos", destrución de casas e sitios culturais, inanición deliberada, denegación de servizos médicos, violencia sexual e baseada no xénero, e apuntar directamente crianzas como obxectivo das armas.
Así mesmo, afirmacións do presidente, do primeiro ministro e do ministro de Defensa de Israel son citados no informe realizado pola comisión independente das Nacións Unidas como evidencias directas da intencionalidade do xenocidio.
A Comisión conclúe que o xenocidio intencionado "é a inferencia razoábel única da totalidade da evidencia". Neste sentido, o informe lembra que os dirixentes políticos e militares israelís son axentes do Estado de Israel e que, polo tanto, "os seus actos son atribuíbeis ao Estado de Israel". Por tanto, Israel, como Estado, "é culpábel da comisión de xenocidio, de errar na súa prevención e de errar no seu castigo".
O informe tamén afirma que todos os estados da comunidade internacional teñen un deber legal inmediato baixo a Convención de Xenocidio "de empregar todos os medios dispoñíbeis para evitar e castigar o delito de xenocidio". Non empregar estes medios, conclúe o informe, implica "consecuencias legais e morais".