A listaxe de chamadas de Pradas evidencia a ausencia de Mazón nas horas máis críticas da DINA

A listaxe das comunicacións da ex consellera de Xustiza e Interior Salomé Pradas o día da DINA –e que entregou á xuíza de Catarroja (País Valencià) que instrúe a causa– mostra que a primeira vez que falou co president da Generalitat, Carlos Mazón, foi ás 17.37 horas, cando este chamou e conversaron dous minutos. Despois volveuno facer en varias ocasións até as 18.30. A partir de aí constan dúas chamadas canceladas –ás 19.10 e ás 19.36 horas– até que contactaron ás 19.43 –48 segundos– e tamén ás 20.10, un minuto antes do envío da mensaxe É-Alert.

A recompilación de 118 páxinas –adiantada por Eldiario.es e á que tivo acceso Europa Press– dá o detalle das comunicacións telefónicas que mantivo Pradas na súa condición de titular de Xustiza e Interior da Generalitat Valenciana e reflicte que "desenvolveu unha intensa actividade en distintos lugares, en especial no Centro de Emerxencias de L'Eliana e Cecopi", segundo expón o documento.

Catro chamadas falidas

De acordo con esta relación, hai dous primeiros intentos errados de contactar co xefe do Consell, ás 12.52 horas e ás 16.29. A primeira chamada contestada é unha entrante de Mazón, ás 17.37 horas de dous minutos de duración. Despois hai máis intercambio: ás 18.16 –sete minutos de chamada saínte–; ás 18.25 –saínte, durante 43 segundos– e ás 18.30 –entrante, que dura 33 segundos–.

Posteriormente, recóllense dúas chamadas perdidas ás 19.10 e ás 19.36 e falan outra vez ás 19.43, cando o teléfono de Pradas recibe unha chamada entrante de Mazón de 48 segundos. Así mesmo, rexístrase outra ás 20.10, entrante, e que dura un minuto. A mensaxe de alerta aos móbiles da poboación enviouse ás 20.11 horas.

O rexistro telefónico mostra que Pradas falou durante aquela xornada con decenas de persoas, entre elas cargos de Emerxencias –como o secretario autonómico, Emilio Argüeso, investigado como a ex consellera na causa– con quen falou por primeira vez ás 8.58 durante un minuto; cargos de Presidencia, como o secretario autonómico de Comunicación e o xefe de Gabinete; a alcaldesa de València, María José Catalá –a primeira hora da mañá–; ou o presidente da Diputació de València, Vicent Mompó. Coa delegada do Goberno na Comunitat Valenciana, Pilar Bernabé, recóllense 14 chamadas –tres elas sen éxito–, a primeira unha entrante de cinco minutos ás 12.23 horas.

"Nunca estivo incomunicado"

Pola súa parte, fontes da Generalitat consideran que as chamadas de Salomé Pradas "demostran que Mazón nunca estivo incomunicado". "A pesar do intento de manipulación da esquerda, as chamadas demostran que é falso que Carlos Mazón estivese incomunicado a tarde da DINA", sosteñen.Neste sentido, remarcan que se dixo que o presidente estivo cinco horas "desaparecido" e agora téntase instaurar outro "bulo" dicindo que estivo unha hora e cuarto "ilocalizábel" para Pradas, entre as 18.30 e as 19.43 horas, cando as ex consellera, efectivamente, non conseguiu porse en contacto con Mazón.

Desde o Goberno autonómico din que isto é "falso" e sinalan que nese suposto período "ilocalizábel" a primeira chamada perdida é ás 19:10 horas e que ás 19:43 devólvelle a chamada. "É dicir, 33 minutos e resulta que neses 33 minutos Mazón fai outras dúas chamadas, ao secretario de Infraestruturas, que estaba conectado no Cecopi e estalle explicando a situación, e ao secretario de Presidencia".

"Así que, en resumo, as cinco horas ilocalizado reducíronse a 33 minutos nos que o presidente está a facer outras dúas chamadas relacionadas coa emerxencia. Carlos Mazón estivo pendente da emerxencia toda a tarde e a esquerda, unha vez máis, mente", conclúen estas fontes.