Forzas israelís elevan a 48 os palestinos asasinados neste ano

Os disparos do Exército israelí na madrugada desta segunda feira nunha importante incursión dos militares en Nablus, en Cisxordania, acabaron coa vida de Ameer al-Bustami, nun ataque no que sete persoas ficaron feridas. O día antes, no campo de refuxiados de Xinín, outra invasión militar israelí matou  unha crianza palestina de 14 anos.

Desde o comezo de 2023 as forzas israelís asasinaron 48 palestinos, 10 deles crianzas. En paralelo, foron reportados novos bombardeos contra a Faixa de Gaza.

O presidente palestino, Mahmud Abbas, subliñou que a poboación está a enfrontar un "asalto letal" por parte de Israel e reclamou "protección" á comunidade internacional, así como presión para deter os crimes perpetrados por Israel.

Pola súa parte, distintas formacións palestinas reuníronse en Ramala, desde onde fixeron un chamamento a incrementar a resistencia popular contra as permanentes agresións israelís.

Entrementres, Israel legalizou nove asentamentos de colonos en territorio palestino, considerados ilegais pola Organización das Nacións Unidas.