O Exército de Israel anuncia "preparativos operativos" para un repregamento de tropas na Faixa de Gaza mentres continúa cos bombardeos
O Exército de Israel anunciou esta quinta feira o inicio de "preparativos operativos" para proceder a un repregamento das súas tropas na Faixa de Gaza, despois de que o Goberno israelí e o Movemento de Resistencia Islámica (Hamás) alcanzasen un acordo para aplicar a primeira fase do plan para o futuro do enclave proposto polo presidente dos Estados Unidos, Donald Trump.
"Tras as instrucións por parte do elo político e en liña coa análise da situación, as Forzas de Defensa de Israel (FDI) iniciaron os preparativos operativos previos á aplicación do acordo", sinalou o exército a través dun comunicado publicado na súa conta na rede social X.
"Como parte deste proceso, están a levarse a cabo os preparativos e un protocolo de combate para a transición a liñas de despregamento axustadas proximamente", apuntou, antes de insistir en que "as FDI continúan despregadas na zona e preparadas para calquera acontecemento a nivel operativo".
O comunicado foi publicado pouco despois de que medios palestinos informasen sobre un ataque con artillería contra o campamento de refuxiados de Nuseirat (centro), sen que por agora haxa informacións sobre vítimas e sen que o Exército israelí se pronunciase ao respecto.
A poboación local espera que o cesamento do fogo acordado polas partes, segundo o anuncio realizado polo presidente dos Estados Unidos, sexa unha realidade a partir do mediodía destaq quinta feira, hora local –as 11 na Galiza–. A partir de entón, esperan confirmar tamén avances en materia de mobilidade e acceso a alimentos e axuda humanitaria.
Un novo acordo dous anos despois
Donald Trump desvelou na súa conta na rede Truth Social que as partes aceptaron a súa proposta tras as negociacións indirectas dos últimos días en Exipto, tras o que o primeiro ministro de Israel, Benjamin Netanyahu, falou de "un gran día para Israel" e anunciou que o seu Executivo reunirase hoxe para asinar o acordo. Pola súa parte, Hamás confirmou "un acordo para poñer fin á guerra en Gaza, retirar a ocupación, permitir a entrada de axuda humanitaria e intercambiar prisioneiros".
A ofensiva israelí contra a Faixa, lanzada tras os ataques do 7 de outubro de 2023, deixou até a data perto de 67.200 palestinos mortos –entre eles 460, incluídos 154 crianzas, por fame e desnutrición– segundo as autoridades gazatís, no medio das críticas internacionais sobre as accións do Exército de Israel, especialmente arredor do bloqueo á entrega de axuda, que levou a que o norte de Gaza fose declarado como zona de fame negra.