Os Estados Unidos tratan de lograr o apoio da ONU para controlar Gaza como mínimo dous anos

A segunda feira, os Estados Unidos enviaron a outros membros do Consello de Seguridade da ONU un proxecto de resolución co que buscan lexitimar no organismo internacional a despregadura dunha Forza Internacional de Seguridade (ISF) en Gaza e que unha denominada “Xunta de Paz” que estaría presidida polo presidente Donald Trump asuma o control do enclave palestino cando menos até finais de 2027, desvelou a terza o portal Axios logo de obter unha copia da proposta. Washington aspira a que ese documento, cualificado de “sensíbel mais non clasificado”, sexa a base para as negociacións no órgano, e confía en que o texto definitivo sexa aprobado nas vindeiras semanas, polo que os primeiros soldados chegarían á Faixa en xaneiro, apuntou un funcionario do país americano ao medio. O borrador debulla que a ISF tería como obxectivo asegurar os lindes de Gaza con Israel e Exipto, en “estreita consulta e cooperación” cos que desenvolvería as súas operacións, protexer os civís e corredores humanitarios e adestrar unha nova forza policial, ademais de asumir “tarefas adicionais que sexan necesarias en apoio do acordo de Gaza”. Tamén contempla unha das metas oficiais sionistas no xenocidio, a pesar do que ficou moi lonxe de conseguila, ao garantir a ISF “o proceso de desmilitarización da Faixa de Gaza, incluíndo a destrución e a prevención da reconstrución de infraestrutura militar, terrorista [en alusión á resistencia palestina] e ofensiva, así como o desarme permanente dos grupos armados non estatais”. En paralelo, demanda a creación da Xunta de Paz como unha “Administración de gobernación transitoria” até que a Autoridade Nacional Palestina (ANP) “complete satisfactoriamente o seu programa de reformas”, mentres Israel se retira gradualmente de varias áreas de Gaza, indica Axios. En todo caso, será esta Xunta, na que todos os nomes que transcenderon de posíbeis membros corresponde a pro sionistas, a que tería que dar o visto e prace para que a ANP tome o control do territorio palestino e considerar “aceptábel” o “mando unificado” da ISF. Aínda que se fixa finais de 2027 como prazo inicial para completar a transición, a proposta abre a porta a prórrogas. Israel, obrigado a permitir o acceso de axuda a Gaza, resolve o tribunal da ONU Esta Xunta “supervisará e apoiará un comité tecnocrático e apolítico palestino integrado por palestinos competentes da Faixa”, que estaría encargado das “operacións diarias da Administración e o servizo civil de Gaza”. Malia que a Casa Branca se sumou á desinformación israelí sobre a axencia da ONU para as persoas refuxiadas palestinas, o organismo internacional, canda a Cruz Vermella ou a Media Lúa Vermella, sería un dos responsábeis da entrega da axuda humanitaria. Non será unha "forza de mantemento da paz" O funcionario insistiu ao tempo en que a ISF será “unha forza de aplicación da lei e non unha forza de mantemento da paz”, nun duro golpe ás esperanzas palestinas de que a súa despregadura protexese a poboación de Gaza dos constantes incumprimentos israelís da tregua. Múltiples estados de maioría de poboación musulmá, como Turquía, Indonesia, Exipto e Acerbaixán, xa terían comunicado que están dispostos a despregar tropas na Faixa, mais o Goberno estadounidense remarcou que a composición da ISF debe ser aceptábel para o réxime israelí, que intenta vetar Turquía. Máis alá de que este texto aínda ten que ser negociado e avalado, amais de polo Consello de Seguridade, polos países árabes e de maioría musulmá que se agarda concentren a maioría dos militares no terreo, unha fonte involucrada nas negociacións fixo énfase na importancia de que Hamás, que goberna Gaza, dea “o seu consentimento”, posto que “se entras nunha contorna na que Hamás che ve como unha forza de ocupación será difícil”. Non obstante, pormenoriza o docente do Instituto de Estudos de Posgrao de Doha Mohamad Elmasry, “a linguaxe que vin suxire que [a ISF] intentará desarmar Hamás” a modo de “corpo coercitivo”, un marco que cuestionou que sexa apoiado por “estados musulmáns e árabes que non necesariamente queren unirse á loita contra Hamás en nome de Israel” e ante “a probabilidade significativa dun conflito violento”. Nese sentido, sinalou que non é probábel que acepten asumir un papel de “executores” en Gaza. Gaza, sen "tutelas" Así e todo, este non é o único punto de fricción coa proposta estadounidense, como deixaron claro a segunda feira os ministros de Exteriores de Turquía, Qatar, Arabia Saudita, os Emiratos Árabes Unidos, Xordania, Paquistán e Indonesia nunha reunión na cidade máis grande de Turquía, Istambul. Carlos Aymerich: "O modelo de Israel vai colapsar, é un proxecto colonial europeo fóra de tempo" Unha vez finalizada, Hakam Fidan, responsábel de Exteriores do país anfitrión, remarcou que “o pobo palestino debe gobernarse e garantir a súa propia seguridade” sen que se impoña “un novo sistema de tutela”, afirmando que é “urxente” que Gaza sexa reconstruída e que as persoas desprazadas poidan volver. En última instancia, Fidan, que recibiu o sábado unha delegación de Hamás, trasladou a importancia da “reconciliación” entre o grupo palestino e a ANP, o que permitiría “fortalecer a representación palestina na comunidade internacional”. No que atinxe á ISF, apuntou que dependendo “da definición” das súas responsabilidades os países participantes decidirán “se enviarán soldados ou non”, un dos elementos clave xunto á preocupación sobre a falta de compromiso israelí co cesamento do fogo, un punto no que Fidan subliñou que houbo consenso en que o Goberno de extrema dereita sionista está a pór escusas para intentar acabar con el, amais de non cumprir as súas obrigas, polo que lle reclamou que acabe coas violacións e que permita o acceso da axuda humanitaria pactada. Pola súa banda, Tamim bin Hamad Al Thani, emir de Qatar, demandou á comunidade internacional que intensifique os esforzos para axudar á reconstrución de Palestina logo dos danos causados pola ocupación e o “sistema de apartheid” imposto por Israel. Amais, o secretario xeral da ONU, António Guterres, sen mencionar Israel, sinalou que está profundamente “preocupado” polas “violacións continuadas” da tregua desde que entrou en vigor o 10 de outubro. Á vez, confirmou que están en marcha “discusións” no Consello de Seguridade sobre o borrador de Washington, cuxo plan orixinal de 20 puntos para acabar co xenocidio non explicitaba unha vía clara para a constitución dun Estado palestino independente. Ao respecto, destacou que “non hai que esquecer a necesidade de estabelecer un camiño político críbel para pór fin á ocupación, materializar o dereito do pobo palestino á autodeterminación e avanzar cara a unha solución de dous Estados”. Xa en Gaza, producíronse bombardeos no leste de Khan Younis, no sur, e os militares sionistas informaron de que asasinaron un palestino máis no norte do enclave, aseverando, como é habitual sen amosar probas, que cruzou a liña amarela, á que se retiraron como parte da primeira fase do cesamento do fogo, a única asinada até o de agora, e que lles permite manter en todo caso o control de máis da metade do enclave. Os Estados Unidos, principal aliado e provedor armamentístico de Israel, chegaron a defender as violacións israelís da tregua. Desde o inicio do cesamento do fogo os sionistas asasinaron 240 persoas na Faixa, e desde o comezo do xenocidio en outubro de 2023 foron confirmadas case 69.000 mortes. Porén, prevese que a cifra real sexa moito máis alta. Na Cidade de Gaza, no norte do enclave, Hamás informou de que logrou atopar tras tres días de busca o corpo dun dos detidos israelís na Faixa, moitos do que foron asasinados polos bombardeos indiscriminados contra os civís do Exército sionista, a pesar dos obstáculos impostos polo réxime para o acceso da maquinaria necesaria. Aínda faltan por localizar sete corpos. Antes, cinco prisioneiros palestinos e os restos doutros 45 foron devoltos a Gaza no contexto do entendemento. Entrementres, en Cisxordania reportáronse novos ataques de colonos israelís contra oliveiras e persoas que participaban na colleita dun dos cultivos máis importantes de Palestina, e os ocupantes tamén realizaron unha incursión en Nablus que rematou con varios palestinos detidos. Israel persigue as filtracións e defende as torturas A principal avogada do Exército israelí até a pasada semana, Yifat Tomer-Yerushalmi, seguirá cando menos até a cuarta feira en prisión provisoria por fraude, abuso de confianza e obstrución á Xustiza, despois de que a semana pasada un integrante da Fiscalía admitira nunha proba co polígrafo que filtrou coa súa aprobación un vídeo no que se aprecia como militares sionistas torturan e violan un detido palestino no campo de concentración de Sde Teiman, nun comportamento que informes da ONU ratifican que é sistemático. Na súa carta de renuncia, Tomer-Yerushalmi indicou que “desafortunadamente” a “comprensión básica” de que “hai accións que nunca deben executarse nin sequera contra os detidos máis viles” xa “non convence todos”. A gravación foi difundida o pasado ano por medios do réxime, nos que co apoio gobernamental se está a desviar a atención das torturas ao caso da avogada. O primeiro ministro israelí, Benjamin Netanyahu, ignorounas e considerouno un problema de relacións públicas, aseverando que puido ser o “maior golpe” desde a fundación do Estado en 1948 (ligado coa limpeza étnica que expulsou boa parte do pobo palestino) ao provocar “un inmenso dano á imaxe” dos militares e do réxime. Os torturadores están imputados mais seguen en liberdade, e unha decisión xudicial obrigou a non desvelar a súa identidade. A segunda feira, catro deles leron encapuchados un texto no que se presentaban como “loitadores pola patria” e pedían a axuda do "Goberno e do sistema". Logo de facerse público o vídeo e cando ían ser interrogados a mediados de 2024, un grupo de ultradereitistas, entre eles varios ministros, asaltaron o lugar para intentar evitalo.