Estados Unidos insiste na extradición de Assange cun novo recurso xudicial
Amnistía Internacional (AI) reclamou esta terza feira, 10 de agosto, ao presidente dos Estados Unidos, Joe Biden, que sexan retirados os cargos contra o fundador de WikiLeaks, Julian Assange, polos que Washington reclama a súa extradición desde o Reino Unido.
O Tribunal Superior de Londres acollerá esta cuarta feira unha vista preliminar sobre o recurso que presentou a xustiza estadounidense contra a decisión da corte británica de rexeitar o traslado de Assange ao considerar que existe risco de suicidio.
"Este intento do Goberno estadounidense para que o tribunal mude a súa decisión [...] alegando novas garantías diplomáticas é un descarado xogo de prestidixitación xurídica", para tratar de reverter un ditame sustentado basicamente na delicada saúde mental de Assange, afirmou nun comunicado AI.
"Dado que o Goberno estadounidense se reservou o dereito de recluír a Julian Assange nun centro de máxima seguridade e de sometelo a medidas administrativas especiais", Washington ofrece garantías "pouco fiábeis", sinalou o director de AI para Europa, Nils Muiznieks.
Por este motivo, solicitou que a apelación sexa desestimada e instou a Biden a "aproveitar a oportunidade" e retirar uns cargos que considera "de motivación política". Cargos que, segundo Muiznieks, "sentaron no banco á liberdade de prensa e a liberdade de expresión"..
175 anos de cárcere
A xustiza británica decidiu en xaneiro non extraditar a Assange, sobre o que pesan 18 cargos por espionaxe e intrusión informática que lle poden supor até 175 anos de cárcere en EUA.
As revelacións de WikiLeaks sacaron á luz segredos sobre as accións estadounidenses no Iraq e no Afganistán, información acerca das detencións extraxudiciais na prisión de Guantánamo (na illa de Cuba) e cables diplomáticos que desvelaron abusos de dereitos humanos en todo o mundo.
O activista australiano permanece recluído na prisión de alta seguridade de Belmarsh, no sueste de Londres, dado que a xuíza Vanessa Baraister denegou a petición de liberdade condicional mentres se dirime a apelación presentada por EUA.
Assange "aínda non gañou o seu caso", advertiu a maxistrada no momento de ditar sentenza. "Por xustiza, EUA debe poder cuestionar o meu ditame, e se Assange foxe durante o proceso, perderá a oportunidade de o facer", sostivo a xuíza, que denegou a extradición por motivos de saúde mais rexeitou previamente o resto de argumentos presentados pola defensa.