Costa defende un crecemento económico que a poboación lusa non percibe

A economía portuguesa centrou esta quinta feira o discurso inaugural do primeiro ministro António Costa no debate sobre o Estado da Nação, que fechou a sesión lexislativa na Assembleia da República. “Portugal non se estancou, Portugal non entrou en recesión, Portugal non volveu á estanflación”, proclamou Costa, que fixo fincapé en que “Portugal non foi este ano o país que vaticinaba a oposición” e que “algúns anhelaban desde 2015”, en alusión ao ano no que volveu ao poder o Partido Socialista (PS) por medio da gerigonça, o acordo que implicou o apoio ao seu Goberno por parte do Partido Comunista (PCP) e do Bloco de Esquerda (BE). Xa en 2022 os socialistas obtiveron a maioría absoluta no lexislativo. O primeiro ministro defendeu que o “bo desempeño da economía portuguesa se debe principalmente a un cambio estrutural”, reiterando que na actualidade “somos unha economía moito máis cualificada, moito máis produtiva, competitiva e moito máis diversificada e máis aberta que en 2015”. Nese sentido, apuntou que as “contas xustas” permitiron ao Executivo “baixar impostos e seguirán permitindo baixar impostos ao longo da lexislatura”, recalcando que a súa xestión levou a un incremento do produto interior bruto (PIB) per cápita de 19% e de 50% no salario mínimo, xunta unha diminución de 6% na taxa de desemprego. Dificultades para a poboación Porén, admitiu que coñecen “as dificultades ás que se enfrontan os portugueses no seu día a día e somos conscientes de que moitos mozos se preguntan polo seu futuro en Portugal”, antes de ironizar coas palabras do actual líder do Partido Social Democrata (PSD), Luís Montenegro, durante o rescate económico do país e a tutela da Comisión Europea, o Fondo Monetario Internacional e o Banco Central Europeo sobre o último Executivo conservador, cando afirmara que “os portugueses poden non estar mellor, pero o país está moito mellor”. Asemade, Costa detallou que no resto da lexislatura pretenden modernizar o tecido produtivo, así como mellorar o sistema educativo, garantir o dereito á vivenda ou loitar contra a pobreza e o cambio climático. A pesar diso, delimitou como o “grande obxectivo” converxer cos países máis desenvoltos da Unión Europea e reducir a débeda pública por baixo de 100% do PIB. Empobrecemento O conservador PSD, que lidera a oposición, sinalou por medio do seu xefe parlamentario, Joaquim Miranda Sarmento, que “os portugueses sofren o empobrecemento socialista” e definiu o Executivo como “enredado en escándalos e leas, e que utiliza a maioría absoluta para manterse no poder”. Após incidir en que a súa formación é a alternativa ao Goberno do PS, inculpouno por provocar que as lusas e lusos estean “famentos, con dificultades, e o Goberno enchéndose os petos de cartos”. A líder parlamentaria comunista, Paula Santos, cuestionou que malia as palabras de Costa a maioría da poboación “está a facer contas co salario e a pensión”, e acusou o Goberno de limitarse a “medidas asistencialistas e puntuais” e de forzar a poboación a perder “poder adquisitivo”, todo isto nun contexto de “degradación dos servizos públicos”. “Portugal non é un país pobre, está a ser empobrecido”, resolveu, denunciando que a pesar da situación da maioría social “para algúns isto nunca estivo tan ben”, en referencia aos “lucros escandalosos” das grandes empresas. Un Goberno "liberal" “Lisboa é a cidade europea onde é máis caro arrendar un piso dunha habitación, parabéns polo éxito da súa política liberal”, espetou á Costa Joana Mortágua, do BE. Á vez, a coordinadora da formación, Mariana Mortágua, exixiu ao primeiro ministro que explique que “vai facer nesta macabra danza de substitución en substitución vinculada ao tema da corrupción”. No que atinxe ás outras dúas forzas progresistas con representación, Rui Tavares, do Livre, puxo o foco no prezo da vivenda, e nos seus efectos para funcionarios públicos como as persoas docentes, que nalgúns casos teñen que rexeitar prazas por non poder pagar onde vivir nos lugares aos que son asignadas. Amais, Inês Sousa, de Pessoas-Animais-Natureza (PAN), condenou que o Goberno obtivera máis de 4.000 millóns de euros a raíz do aumento da inflación. Por parte da Iniciativa Liberal (IL), o seu presidente, Rui Rocha, aseverou que Costa é o “presidente do sindicato portugués”, polos ingresos recibidos polo Estado na porcentaxe de impostos que pagan as empresas polos aumentos de salario ás persoas traballadoras, subliñando que o primeiro ministro é “rápido na propaganda e moi lento no combate á corrupción”. A formación é o aliado potencial do PSD no caso de obter maioría no Parlamento nos vindeiros comicios, tras advertir o presidente luso e ex líder do PSD, Marcelo Rebelo de Sousa, a Montenegro que non adiantaría as eleccións de preverse que o seu Gabinete dependería da extrema dereita. Ademais, o presidente da Assembleia, Augusto Santos Silva, censurou o líder do Chega, de extrema dereita, André Ventura, tras afirmar que o primeiro ministro “quere facer deste país o maior bordel de Europa” entre ataques á suposta permisividade coas persoas migrantes. A vivenda, a educación e a economía, as decepcións da maioría do país Se “o estado da nación dependera só dos indicadores da economía, das contas públicas ou do desemprego, o debate que se anuncia na Assembleia da República podería acabar con champaña e foguetes”, mantivo esta quinta feira o luso Público. Aínda así, a poboación non está a percibir esta mellora, como amosan as folgas constantes que se desenvolveron en múltiples sectores económicos, entre unha inestabilidade política que aumentou coa comisión parlamentaria de investigación sobre a xestión da empresa pública TAP Air Portugal, que contribuíu na ducia de baixas no Executivo desde os comicios de 2022. Un estudo demoscópico publicado polo Jornal de Notícias, Diário de Notícias e TSF concluíu que 59% da poboación considera que a situación do Estado é mala ou moi mala, con até 80% apuntando en dirección á vivenda como a maior decepción, seguida do ensino, con 62%, e da economía, opción que marcou 60% das persoas enquisadas. Ao respecto da vivenda, o paquete lexislativo Mais Habitação, a principal proposta do PS para lograr unha diminución do prezo dos inmobles, que medrou 20% en 2022, aínda foi aprobada a cuarta feira polo lexislativo, cinco meses despois de que o Conselho de Ministros lle dera luz verde. Unha enquisa de Intercampus feita pública este mes indica que as forzas conservadoras e a extrema dereita contarían no caso de eleccións con maioría para gobernar. O PS perdería arredor de 50 escanos e o BE podería multiplicar por catro os asentos que obtivo no último proceso electoral.