Que é a "Unión Europea da defensa"? Bruxelas aposta por "converter" o gasto militar no "motor da nosa economía"

Andrius Kubilius, o comisario da Unión Europea de Defensa e Espazo, apostou esta terza feira por "converter" o gasto militar "no motor da nosa economía". Seguindo coa retórica a prol do investimento en armamento por riba doutras materias, o lituano afirmou que "Europa enfróntase a unha decisión decisiva en materia de defensa". "Así que dicimos aos Estados membro que se coordinen e estabelezan prioridades", non só a nivel estatal, senón tamén comunitario, "e en total sintonía coa OTAN", agregou concluíndo con que a UE é "un xigante económico", mais que a nivel militar é "un xigante durmido". "Espertemos xuntos o xigante durmido de Europa", dixo o comisario incidindo na súa aposta militarista. Rusia aposta pola extensión "formal" do control das capacidades nucleares e Kallas abre a porta a un programa atómico ofensivo da UE Con todo, Kubilius admitiu que "ás veces parece" que a industria militar comunitaria "non está aínda preparada para facer fronte ao inminente aumento da demanda", algo que implica que o aumento deste gasto pase polas compras realizadas aos Estados Unidos. Neste sentido, apoiou "firmemente" o chamamento do presidente de Francia, Emmanuel Macron, á industria, para que "aumenten o seu potencial" e "a súa capacidade de produción". "Producir, producir, producir", insistiu sobre unha industria militar comunitaria que, el mesmo recoñeceu, non pode agora mesmo alimentar a escalada militarista liderada pola presidenta da Comisión Europea, Ursula von der Leyen, a cal suporá recortes nas políticas agraria e pesqueira en favor das empresas dos EUA. "A responsabilidade europea en materia de defensa exixe un marco institucional para a nosa cooperación, unha Unión Europea de defensa", reivindicou neste punto. Con todo, aclarou que isto, a pesar das ameazas dos Estados Unidos sobre a soberanía da Unión Europea, "non significa prescindir da OTAN", xa que, segundo o comisario, é "a base" da defensa colectiva da UE e é "esencial" para garantir a seguridade transatlántica. Así, na súa opinión, que Bruxelas redobre a súa aposta militarista non supón gañar en independencia con respecto aos Estados Unidos de América, senón que "significa fortalecer a OTAN". Reestruturación militar O anuncio militarista do comisario lituano coincide con outro por parte dos EUA, o dunha "reestruturación" da OTAN. Fontes do Pentágono trasladaron que se acordou a transferencia a mans europeas do Centro de Mando Conxunto da OTAN en Norfolk, en Virxinia (EUA), e do Centro de Mando Conxunto na cidade italiana de Nápoles. Mobilizacións nas sete cidades chaman a frear o "rearmamento" "Esta decisión reforza a alianza ao mostrar liderado europeo na defensa europea e fortalecer as capacidades defensivas europeas", sinalaron desde os Estados Unidos, facendo ver o seu papel de influencia dentro da aposta militarista da Unión Europea. Os EUA faranse co control do mando estratéxico da OTAN por terra, mar e aire Porén, os EUA incrementarán o seu control en terra, mar e aire, así como no continente europeo. Segundo informa o diario francés La Lettre, Washington asumirá o mando das forzas marítimas (Marcom), con sede en Northwood (Inglaterra), mentres que xa controla o Landcom, con sede en Izmir (Turquía), para as forzas terrestres, e o Aircom, en Ramstein (Alemaña), para as forzas aéreas. Ademais, os Estados Unidos tamén conservarán o control do Shape, o mando supremo das forzas da OTAN en Europa, que ten sede en Casteau (Bélxica). Con estes cambios, os EUA envían unha clara mensaxe: Europa debe incrementar o gasto militar, mais o control da estratexia seguirá nas súas mans. Neste sentido, a asunción do mando por parte dos Estados Unidos do Marcom supón un golpe para o Reino Unido, que perde o control da mariña. Unha presión á que non escapa o Estado español, como proban as declaracións do embaixador dos EUA en Madrid, Matt Whitaker. "A nosa expectativa son os obxectivos de capacidades. Se poden facelo máis barato, fantástico. Non cremos que poidan, mais se poden, por favor que ensinen a todos como facelo", indicou o diplomático, engadindo que aos EUA, que teñen "unha idea bastante clara de canto custan" artillaría ou tanques, non lle cadran as contas españolas, facendo un claro requirimento de aumento do gasto militar neste Estado. Macron nega que a China ou Rusia sexan unha ameaza para Groenlandia Pola súa parte, o presidente de Francia, Emmanuel Macron, recoñeceu esta terza feira que as ameazas sobre a soberanía da UE en Groenlandia non chegan por parte da China ou de Rusia, senón por parte do aliado da OTAN que, en boa medida, marca a estratexia militar comunitaria, os Estados Unidos. "Que ninguén se engane pensando que a verdadeira intención dos EUA era simplemente facer fronte a unha ameaza xeopolítica. Non eran os rusos nin os chineses quen a ameazaban [a Groenlandia]". Así, explicou que os servizos de intelixencia comunitarios fixeron un balance da presenza naval de Moscova e Beijing nesta zona e concluíron que é "insignificante". O antimilitarismo galego Ademais, o galo insistiu esta terza feira na necesidade de que a UE retome o diálogo con Rusia. "A súa situación xeográfica non cambiará; gústenos ou non, Rusia está ás nosas portas", dixo. Tanto o francés como o portavoz do Kremlin, Dimitri Peskov, recoñeceron esta terza feira que Moscova e París retomaron os contactos "a nivel técnico", o que podería levar á apertura dun diálogo "ao máis alto nivel" entre os presidentes ruso e francés, Vladimir Putin e Emmanuel Macron. O Kremlin chama a evitar unha nova carreira nuclear Dimitri Peskov, o portavoz do Goberno ruso, fixo esta terza feira un chamamento ás potencias nucleares a evitar unha nova carreira nuclear, días despois da expiración do último tratado para o control das armas atómicas entre os Estados Unidos e Rusia. O chamamento de Peskov chega ademais un día despois das palabras do ministro de Exteriores turco, Hakan Fidan, quen sinalou en declaracións a CNN Türk que Ankara podería verse "inevitabelmente" nunha carreira nuclear. "No futuro, poderiamos ver máis países buscando armas nucleares, e non se tratará de Irán nin de ningún país de Oriente Medio. Serán da rexión de Asia-Pacífico e de Europa", algo que, segundo Fidan, podería obrigar Turquía a unirse a esta carreira. Non dar motivos As palabras de Fidan súmanse ás da alta representante da Unión Europea para Asuntos Exteriores e Política de Seguridade, Kaja Kallas, que a pasada semana suxeriu a posibilidade de que a UE desenvolva o seu propio arsenal nuclear, alén do que xa posúe Francia. Neste contexto, Peskov pediu aos países con armas atómicas un comportamento "responsábel para non dar o máis mínimo motivo [ao resto] e non permitir ningunha manifestación de carreira nuclear".