A China e a UE fechan acordos sobre cambio climático e comercio e tratan de limar as diferenzas

A Unión Europea (UE) e a China, “dous tipos grandes” nun contexto internacional “cambiante”, “deben demostrar unha vez máis visión e liderado, e tomar as decisións estratéxicas correctas”, remarcou a quinta feira no Gran Salón do Pobo en Beijing o mandatario do país asiático, Xi Jinping, nunha xuntanza con Ursula von der Leyen, presidenta da Comisión Europea, e António Costa, líder do Consello Europeo. A reunión, a 25ª cimeira bilateral, produciuse no 50 aniversario do estabelecemento de relacións diplomáticas entre Bruxelas e Beijing, e, canda o encontro entre os equipos de negociación das dúas partes, liderados por von der Leyen, Costa e o primeiro ministro chinés, Li Qiang, respectivamente, permitiu fechar pactos sobre comercio e cambio climático. Neste último ámbito pactaron “liderar os esforzos globais” para reducir as emisións de gases de efecto invernadoiro e loitar contra a mudanza climática, informou a Comisión, que canda a China salientou a “cooperación bilateral positiva e produtiva”. Tamén se rubricou un entendemento para impulsar un tratado internacional “ambicioso e equilibrado” co fin de combater a contaminación por plásticos. Na véspera, o Tribunal Internacional de Xustiza, o máximo órgano xudicial da Organización das Nacións Unidas (ONU), emitiu unha sentenza consultiva que ratifica que a falta de compromiso para loitar contra a mudanza climática supón unha violación do dereito internacional, e que remarcou que os países máis desenvoltos deben asumir os seus compromisos internacionais neste campo ou terán que pagar compensacións aos países máis afectados. Isto coincide coa posición defendida pola China durante o litixio, á vez que a UE reiterou á maxistratura que debía ter “cautela” e non “determinar violacións estabelecidas”, ante o temor de Bruxelas a ter que asumir responsabilidades económicas pola contaminación emitida. Case 40% das emisións históricas que causaron o cambio climático (e permitiron o seu desenvolvemento) procederon dos Estados Unidos, a UE e o Reino Unido. Na actualidade, a China é o maior emisor, mais os seus plans de redución de emisións son dos máis ambiciosos do mundo e lidera as tecnoloxías renovábeis. Só este ano prevé a entrada en funcionamento de máis de 500 gigawatts de instalacións eólicas e solares, arredor de 60% da potencia eléctrica das renovábeis en toda a UE. Choques polo comercio Von der Leyen anunciou na comparecencia posterior ás reunións que “acordamos implementar un mecanismo mellorado de subministración das exportacións”, debullando que, “se xorden estrangulamentos, este soporte mellorado na cadea de subministración pode detectar e resolver de inmediato o problema ou inconveniente”. A UE volve baixar a cabeza fronte aos Estados Unidos e frea as represalias, xa moi limitadas Asemade, transmitiu que “recoñecemos os esforzos da China para axilizar a concesión de licenzas para materias primas críticas”, despois de que no marco das represalias polos aranceis estadounidenses Beijing incrementara as restricións sobre estes elementos, que no que atinxe ás terras raras causaron interrupcións nas liñas de produción de vehículos occidentais. Antes, cualificara como “excelente” a xuntanza con Xi, ao que demandou “presentar solucións reais” ao respecto do déficit comercial de Bruxelas con Beijing, que o ano pasado superou os 300.000 millóns de euros. En paralelo, ameazou con limitar o acceso dos produtos chineses á UE, insistindo en que se debe abordar o que considera un exceso de produción, as axudas públicas a varios sectores e as restricións chinesas ás importacións doutros mercados, que segundo a conservadora alemá implican que estes bens son redirixidos a Bruxelas. Sexa como for, o bloque comunitario foi repetindo múltiples medidas adoptadas polos Estados Unidos contra a China, como os aranceis aos seus vehículos eléctricos ou o veto a que Huawei participe nas licitacións de redes 5G. O socialdemócrata luso Costa, considerado amplamente como menos pro estadounidense que a teutoa, agradeceu á China por manter negociacións “francas”, e fixo fincapé en que unhas relacións beneficiosas para os dous territorios son posíbeis e deberían ser o obxectivo. Nesa liña, Li fixo énfase en que a UE e a China “non teñen conflitos fundamentais”, e amosou a súa disposición a resolver calquera diferenza por medio do diálogo. Ademais, comunicou que agarda que a UE proporcione unha contorna empresarial non discriminatoria e trasladou a vontade do Goberno de ampliar a cooperación en comercio, investimento e tecnoloxía verde. A China e os Estados Unidos pactan reducir os controis de exportación A cuarta feira, fontes diplomáticas sinalaron a medios internacionais que un acordo comercial entre a UE e os Estados Unidos estaría a ultimarse, e a quinta a Comisión ratificou que “está ao alcance da man”. Como nos cinco acordos sancionados por Washington até o de agora, este tamén sería moi favorábel aos seus intereses, pois implicaría un arancel de 15% á importación de mercadorías do bloque comunitario, que renunciaría a calquera medida de represalia. Incluso así todo indica que os membros da UE están dispostos a avalalo. Por se non se producise un entendemento, a quinta 26 estados (todos agás Hungría) apoiaron un paquete de represalias a 93.000 millóns de euros en produtos estadounidenses, que en todo caso é marcadamente inferior ao efecto das taxas que xa está a aplicar Washington, que afectan 530.000 millóns de euros de exportacións da UE. Pacto comercial India-Reino Unido Na súa visita ao Reino Unido, o primeiro ministro indio, Narendra Modi, asinou a quinta feira co seu homólogo británico, Keir Starmer, un acordo comercial que reduce os aranceis á exportación de produtos como a xenebra e o whisky escocés á India, da mesma maneira que aos alimentos e especias deste último país enviados a Londres. Trátase do “pacto comercial máis grande e economicamente significativo” feito polo Estado europeo desde a súa saída da UE en 2020, asegurou Starmer.