O avogado xeral do Tribunal de Xustiza da UE avala a legalidade da Lei de amnistía

O avogado xeral do Tribunal de Xustiza da Unión Europea (TXUE), o luxemburgués Dean Spielmann, manifestouse na xornada desta quinta feira de modo favorábel ao texto da Lei de Amnistía aprobado polo Congreso dos Deputados en xuño de 2024, co voto negativo da oposición de dereitas. A resolución é unha resposta ás consultas formuladas diante da xustiza comunitaria polo Tribunal de Contas e a Audiencia Nacional, que cuestionaban a legalidade do texto lexislativo nun relatorio co que pretendían impedir a aplicación da amnistía aos dirixentes nacionalistas cataláns condenados en relación co referendo de autodeterminación de outubro de 2017. Dean Spielmann afirma que a Lei de Amnistía "cumpre os estándares xurisprudenciais estabelecidos polo Tribunal Europea de Dereitos Humanos (TEDH)". Neste sentido, apunta que, " por unha parte, parece aprobarse nun contexto real de reconciliación política e social e non constitúe unha autoamnistía. Pola outra, non inclúe violacións graves de dereitos humanos, entre as cales hai, en primeiro lugar, as violacións do dereito da vida e da integridade física. A Lei de Amnistía estabelece unha exclusión explícita dos actos que causasen de maneira intencionada estas violacións". Neste sentido, invalida os razoamentos achegados pola Audiencia Nacional. O Supremo español négase a cumprir coa lei de amnistía e rexeita o recurso de Puigdemont Os argumentos empregados polo avogado xeral do TXUE destacan que "a directiva [europea contra o terrorismo] non inclúe ningunha disposición que prohiba expresamente o uso de mecanismos de extinción da responsabilidade penal, como a amnistía". Nesta dirección, subliña que "o criterio determinante para avaliar esta compatibilidade radica na súa conformidade coas esixencias mínimas derivadas do dereito internacional, en particular co dereito humanitario e cos estándares xurisprudenciais estabelecidos, en particular, polo Tribunal Europeo dos Dereitos Humanos". A resolución avala, tamén, a amnistía aos 13 integrantes dos Comités de Defensa da República (CDR), organización da sociedade civil creada para defender os resultados do referendo de 2017, acusados de terrorismo pola Audiencia Nacional no marco da denominada policialmente "Operación Xudas". A este respecto, indica ao tribunal español que o feito de aplicarlles a Lei de amnistía "non se opón de ningún modo á directiva europea contra o terrorismo", xa que a norma non implica deixar impunes delitos que "vulneran gravemente os dereitos humanos". Neste sentido, exprésase de modo categórico, afirmando que "a Lei de Amnistía non rompe o principio de igualdade". Spielmann cuestiona os argumentos trasladados polo Tribunal de Contas español ao TXUE para denegar a amnistía a máis de 30 militantes nacionalistas cataláns, entre eles o antigo presidente exiliado, Carles Puigdemont, por un presunto delito de malversación, ao entender que os seus actos "non implican ningún prexuízo para os intereses financeiros da Unión Europea". Neste punto, asegura que "non hai ningún vínculo directo entre estes actos [amnistiados] e a redución, actual ou potencial, dos ingresos postos ao dispor do orzamento da UE", desmontando un dos principais razoamentos xurídicos utilizados polo Tribunal Supremo desde xuño de para non aplicar a Lei de amnistía. As conclusións dos informes do avogado xeral non son vinculantes para o Tribunal de Xustiza da Unión Europea, mais as sentenzas deste órgano adoitan ir na mesma liña. Neste sentido, as fontes xurídicas consultadas por Nós Diario explican que "hai casos onde TXUE resolveu en contra da posición do avogado xeral pero son moi poucos. O normal é que o alto tribunal europeo siga as súas indicacións" e consideran que "todo apunta a que sentenza definitiva chegue a comezo do ano que vén". Ao tempo, apuntan que "o Tribunal Constitucional terá moi en conta a sentenza do TXUE á hora de resolver recursos e peticións de amparo que ten pendentes en relación coa amnistía". Puigdemont e o Governo espanhol O informe de Spielmann e a previsíbel sentenza na mesma dirección Tribunal de Xustiza da Unión Europea sitúan nunha posición moi complicada ao Tribunal Supremo e á maioría da xudicatura do Estado. Sen ir máis lonxe, o alto tribunal español négase a aplicar a amnistía ao ex presidente exiliado de Catalunya Carles Puigdemont, mantendo unha orde de busca e captura contra el, ou aos antigos integrantes do seu Goberno acusados de malversación. Carles Puigdemont referiuse esta quinta feira na súa valoración da resolución do avogado xeral do TXUE a este sector do poder xudicial que se nega a cumprir o disposto na Lei de Amnistía. Neste sentido, afirmou que "a última palabra téñena uns xuíces que se sentiron chamados a salvar a patria", aseverando que "non se aplica non porque non sexa democrática, constitucional e de acordo co dereito europeo". Na mesma orientación, manifestáronse os CDR, que destacaron que "Luxemburgo dá unha labazada monumental a España: o avogado xeral do Tribunal de Xustiza da Unión Europea deixa en evidencia a xudicatura española e destapa a perversión do sistema xudicial español".