84 grupos da sociedade civil exixen un embargo comercial aos colonos israelís

Oxfam, a Coordinadora Europea de Comités e Asociacións por Palestina e 82 entidades máis, entre elas sindicatos, organizacións humanitarias, de dereitos humanos e centradas no desenvolvemento, pola xustiza económica ou relixiosas, reclamaron a sexta feira un embargo comercial aos asentamentos coloniais israelís no territorio palestino de Cisxordania, denunciando que “fragmentaron” o territorio e “destruíron a economía palestina, causando unha pobreza e un sufrimento xeneralizados”. A afirmación é parte do informe Comercio coas colonias ilegais: Como os estados e as empresas estranxeiras permiten que Israel leve a cabo a súa política de colonización ilegal, lanzado en paralelo á campaña Deteñan o Comercio cos Asentamentos, que aspira a forzar os gobernos a lexislar para impedir que as empresas locais comercien ou invistan nas colonias, así como vetar que as institucións financeiras dean préstamos a compañías que participen en proxectos dentro delas. A mensaxe vai dirixida especialmente á Unión Europea (UE), principal socio comercial israelí, alcanzando 32% do comercio total do réxime sionista. Ao respecto, o texto demanda a suspensión do acordo de asociación con Israel, algo que a Comisión Europea propuxo parcialmente, acabando co acceso preferente das súas mercadorías, sen que fique claro se Alemaña e Italia lograrán bloquear a súa implementación. Amais, critícase que Bruxelas importa 15 veces máis bens dos asentamentos coloniais que das e dos produtores palestinos. Neste contexto, 35% das persoas palestinas en Cisxordania está sen traballo, e a pobreza roza 30%. Todos os asentamentos israelís en Cisxordania son ilegais segundo o dereito internacional, o que ratificou o pasado ano o Tribunal Internacional de Xustiza (TIX), máximo órgano do sistema xudicial da Organización das Nacións Unidas (ONU), que advertiu aos estados que comercian cos arredor de 365 asentamentos e postos de avanzada, como granxas, que poderían ser cómplices dos crimes de Israel, concluíndo que instaurou un réxime de apartheid no territorio palestino. Da mesma maneira que do xenocidio en Gaza, tamén hai empresas que se están a lucrar coa colonización sionista de Cisxordania, subliña o informe, mencionando como a alemá TUI ofrece visitas turísticas aos asentamentos e ás localidades palestinas que queren arrasar os colonos, ou a tamén teutoa Siemens prové de equipos a infraestrutura de transporte colonial. Á vez, a francesa Carrefour ten tendas nunha asociación cunha compañía israelí. A violencia dos colonos Á fragmentación de Cisxordania, con muros para impedir que saian das súas localidades as e os palestinos, os postos militares para restrinxir os seus movementos, as incursións das tropas sionistas ou a destrución arbitraria de vivendas e infraestruturas hai que engadir a “violencia dos colonos contra comunidades palestinas”, que o documento cualifica de “xeneralizada” e que inclúe “ataques físicos, acoso, destrución de terras de cultivo e ataques contra oliveiras e outros cultivos que sustentan milleiros de familias”, que acotío se producen con “impunidade”. Israel acepta unha tregua e bombardea o liderado de Hamás mentres a organización estuda a proposta en Qatar Nos anos anteriores ao comezo do xenocidio na Faixa de Gaza, a violencia de colonos e militares israelís contra o pobo palestino en Cisxordania fora en aumento, constituíndo un dos motivos da operación da resistencia palestina do 7 de outubro de 2023. Desde xaneiro dese ano até esa data os colonos e militares sionistas mataron unha quinta parte das máis de 1.000 palestinas e palestinos que asasinaron desde 2008, revelan os datos da ONU. Con todo, a situación escalou en paralelo ao devir do xenocidio, e nestes case dous anos xa mataron 993 palestinas e palestinos no territorio. Máis de 20% eran nenas e nenos. Asemade, só o pasado ano demoleron case 1.800 estruturas. As ambicións coloniais dos sionistas están moi lonxe de rematar no río Xordán, que separa Cisxordania de Xordania, pois abranguen desde o río Nilo en Exipto até o Éufrates, que baña Siria e o Iraq no seu curso baixo. Non obstante, a anexión de Cisxordania, só freada polos límites que nas décadas pasadas lle impuxera neste sentido o seu principal aliado e provedor de armas, os Estados Unidos, é agora unha das principais prioridades do Goberno de extrema dereita israelí encabezado polo primeiro ministro Benjamin Netanyahu, que está a acelerar a creación de novos asentamentos. Un deles é especialmente polémico, o situado na zona E1, que bloquearía o acceso a Xerusalén desde a Cisxordania ocupada, e acabaría coa continuidade territorial entre Belén e Ramallah. Xa hai máis de medio millón de colonos israelís por toda Cisxordania, e o Executivo sionista admite publicamente con cada vez máis énfase que busca impedir a existencia dun Estado palestino independente, e está a tentear a anexión parcial ou total de Cisxordania como resposta ao recoñecemento do Estado de Palestina por un número cada vez maior de aliados occidentais, un paso que a segunda feira anunciou que daría Portugal, nun debate que se produce no contexto da impunidade que até o de agora lle garantiron eses mesmos aliados. En última instancia, Washington non fechou a porta en ningún momento a avalar a anexión. Os países árabes condenan a agresión a Qatar A segunda feira rematou en Doha, a capital de Qatar, a cimeira de dous días de países árabes e de maioría de poboación islámica que tratou o ataque israelí contra a urbe, nunha tentativa sen éxito de matar o liderado de Hamás no exilio, que estaba a estudar unha proposta de tregua. As condenas, con demandas dunha resposta unificada, multiplicáronse entre os líderes que participaron, mais non se traduciron en medidas concretas. A pesar diso, Netanyahu admitiu que están a entrar "nunha especie de illamento". Entrementres, o presidente dos Estados Unidos, Donald Trump, insistiu en que Qatar é un “grande aliado”, instando Israel a ser “moi, moi coidadoso”, mais pouco despois Marco Rubio, secretario de Estado, proclamou o seu “apoio inquebrantábel” a Israel logo de reunirse alí con Netanyahu. Eurovisión No Estado español, transcendeu que a terza feira José Pablo López, presidente de Radiotelevisión Española (RTVE), proporá ao Consello de Administración converterse no quinto participante en Eurovisión en anunciar que non formará parte da vindeira edición no caso de que si o faga Israel. Ademais, o presidente, Pedro Sánchez, reclamou que Israel sexa vetado de competicións deportivas até a fin do xenocidio en Gaza.