A Xunta coñecía desde 2021 que Altri non tiña encaixe nos fondos Next Generation

Esta cuarta feira reúnense responsábeis de Altri e técnicos do Ministerio de Industria para analizar as posibilidades de financiamento da factoría de viscosa proxectada en Palas de Rei a cargo dos fondos Next Generation. O encontro producirase unha semana despois de que a vicepresidenta primeira do Goberno do Estado, Nadia Calviño, fechase a porta a unha liña de axuda extraordinaria para esta iniciativa por considerar que “incumpre” os criterios marcados pola Comisión Europea. A posición de Calviño e as demandas da Xunta da Galiza confirman que a fábrica proxectada por Altri en Palas de Rei non ten encaixe dentro do programa comunitario. A posta en marcha dunha factoría para producir viscosa a partir do eucalipto é o proxecto industrial estrela da Xunta da Galiza nesta última lexislatura. A iniciativa arrancou na segunda metade de 2020, tras aprobar a Unión Europea (UE) o plan Next Generation, e foi presentada en novembro dese ano polo daquela presidente galego, Alberto Núñez Feixoo. Recollía un investimento de 950 millóns de euros, para producir un total de 250.000 toneladas de fibra de celulosa e para crear 1.000 empregos na fase de montaxe do complexo e arredor de 700 postos de traballo directos unha vez entrase en funcionamento. Altri incumpre os criterios do programa Next Generation As dúbidas empresariais A proposta xerou dúbidas desde o primeiro momento no sector téxtil e forestal da Galiza. Malia a tentativa do Goberno galego de sumar a este proxecto Inditex e despois Ence, desmarcáronse da proposta, ao non verlle posibilidades nin encaixe nas liñas definidas pola Comisión Europea para o programa Next Generation. Precisamente, a falla de socia industrial e as dificultades para atopalo levou a Xunta da Galiza canda a multinacional portuguesa Altri, un grupo cun volume de negocio máis de 650 millóns de euros, titular de tres fábricas de pasta de papel en Portugal e coñecida no mercado galego do eucalipto a través da súa filial Celbi. A ausencia de encaixe nas liñas de axuda previstas nos fondos Next Generation, a contradición cos eixes de política industrial da Unión Europea, a falla de concreción do proxecto, o emprazamento escollido e as debilidades técnicas e económicas do grupo promotor son as principais pexas que enfrontan a iniciativa. Nesta dirección, o propio Goberno galego vén recoñecendo desde hai ano e medio o seu difícil encaixe dentro dos Proxectos Estratéxicos para a Recuperación e Transformación Económica (Perte) e demanda un perte específico para a compañía, malia estaren prohibidos pola propia normativa comunitaria. O Parlamento solicita ao Estado "garantías" de apoio á planta de Altri O profesor da Facultade de Económicas da Universidade de Compostela (USC) e especialista en fondos comunitarios Diego Sande Veiga explica a Nós Diario que “en ningún dos Perte presentados polo Goberno do Estado tiña acollida específica o sector téxtil". Ademais, sinala que o proxecto de Altri "non cumpría coas características para ser financiado a cargo do Perte da economía circular como pretendeu nun primeiro momento a Xunta, porque esta iniciativa non se movía no campo da economía circular e, ademais, deixaba para o final toda a parte ligada á reciclaxe”. Sande considera que “a improvisación na proposta e a falla dun proxecto claro é evidente”. A este respecto, lembra que “as cifras foron cambiando desde o comezo". Tamén mudou, di, a proposta, "dando a sensación de que se buscaba un encaixe nalgunhas das liñas formuladas”. Nesta dirección, entende que “a solicitude da Xunta dun perte específico para Altri implica recoñecer dalgún modo as dificultades para ser financiado pola vías ordinarias recollidas nas diversas ordes de axuda”. A decisión da UE Altri acudiu a Bruxelas a presentar a súa proposta, porén a Comisión Europea non viu con bos ollos unha iniciativa que contradí as súas liñas básicas en materia de política industrial. Nese caso, as autoridades comunitarias obxectaron que non se trataba dunha proposta sustentábel e alertaron de que o seu consumo de auga incumpre os estándares requiridos. A empresa consumiría anualmente case 500 millóns de metros cúbicos de auga, unha cantidade que a poboación de Palas de Rei (3.414 habitantes) tardaría máis de 3.200 anos en consumir. Asemade, temen o seu impacto no ecosistema mariño e moi particularmente na área da ría de Arousa. A rede eléctrica non dispón de potencia para fornecer enerxía suficiente a Altri Unha escolla polémica O emprazamento elixido para erguer a factoría tampouco axuda á hora de captar fondos comunitarios. Neste sentido, a súa localización fóra da provincia da Coruña impídelle acceder á parte dos 111 millóns de euros de financiamento procedentes dos fondos de transición enerxética que vai repartir a Xunta da Galiza para compensar aquelas zonas afectadas polos procesos de reconversión ao abeiro da loita contra o cambio climático. A escolla de Palas de Rei para construír a fábrica de viscosa nunca foi tecnicamente explicada. A este respecto, desde algúns sectores viuse na decisión unha manobra política dirixida a mellorar os resultados do Partido Popular na comarca da Ulloa, unha zona chave para mudar a correlación de forzas na Deputación de Lugo. A maiores, os terreos elixidos fan parte da área de expansión da Rede Natura 2000, contando con especies de flora propias en perigo de extinción. A fábrica de Altri non crearía máis de 200 empregos directos en Palas de Rei A falla de concreción do proxecto de Altri para a factoría de viscosa de Palas de Rei obsérvase en diferentes aspectos do mesmo. Un dos máis relevantes é a diverxencia no número de empregos a crear pola factoría, chegando a cifrar a súa contía a Xunta da Galiza nalgúns dos momentos do proceso en 2.500 postos de traballo directos. Estes números, corrixidos posteriormente polo propio Goberno galego, fican moi lonxe das estimacións da maioría dos economistas e dos empregos reais creados en factorías análogas. Altri quere axudas especiais para o seu proxecto en Palas de Rei e confirma Greenalia como socio A profesora da USC María do Carme García-Negro foi unha das primeiras expertas en cuestionar estes datos hai máis dun ano. A este respecto, sinalaba a Nós Diario en maio de 2022 que “nun proxecto axustado de 200.000 toneladas, empregará inicialmente moito menos de 200 persoas” e aseguraba que “as contas máis próximas á realidade non casan coas cifras astronómicas do número futuro de emprego. Poden seguir poxando ilusións, mais Altri, que en Portugal produce máis dun millón de toneladas, emprega 774 persoas”. García-Negro defende “a vixencia” das súas cifras e apunta que “despois de revisar todas as normas comunitarias en relación cos fondos Next Generation e coa dirección da política económica comunitaria teño claro que o proxecto de Altri non cumpre con ningún dos requisitos fixados no programa susceptíbel de ser financiado". Nesa mesma dirección, avanza que “non se poden facer traxes a medida dentro dos Next Genaration” e asegura que “a proposta do PP para Altri está fóra da legalidade”.