O verme que ameaza o mexillón e ao que a Xunta resta importancia espállase polo litoral: "Recollemos 38 nunha hora"

Persoal técnico do departamento de Bioloxía de Organismos e Sistemas da Universidade de Oviedo fixo nos últimos días até dez mostraxes en distintos puntos da costa galega na procura da presenza de Postenterogonia orbicularis, coñecida vulgarmente como 'planaria' ou 'verme plano' e detectado na Galiza por primeira vez a mediados de febreiro no litoral da Mariña. Ricardo López-Alonso, investigador predoutoral da universidade asturiana, sinala a Nós Diario que na pasada segunda feira, nunha destas mostraxes, recolleron "38 exemplares" deste verme en só unha hora en territorio galego. O principal problema deste verme é que se alimenta de gasterópodos e bivalvos. “É unha especie-praga e sobre todo afecta mexillóns, ostras, navallas, ameixas e vieiras”, advirte López-Alonso. E, segundo os estudos que está a realizar na Universidade de Oviedo, “un exemplar come até medio gramo diario de mexillón”. Estes científicos levan máis de dous anos “mapeando e estudando a presenza desta especie invasora”, e a pesar de que hai un mes a Consellaría do Mar recoñecía a detección de exemplares no país, aseguran que "ninguén da Xunta da Galiza" se puxo en contacto aínda con eles para analizar a situación. Ricardo López-Alonso, investigador da Universidade de Oviedo. (Foto: Nós Diario) Os técnicos da Universidade de Oviedo din estar “preocupados” polo inzamento de vermes tanto na costa asturiana como na galega. Contan xa con mostras de 350 exemplares atopados entre Galiza e Asturias en 600 quilos de mexillón que están a analizar para “identificar a densidade de poboación, bioloxía e tratamentos contra esta especie”. Os estudos oficiais sobre esta especie realizados por persoal científico de Nova Zelandia, precisa o investigador de Oviedo, evidencian que “os tratamentos que se están a aplicar non funcionan en 95% dos casos”. Unha serie de informes concretan, a respecto desta praga, que se trata dunha "enfermidade” cando as densidades son altas e que “non hai tratamentos axeitados para matar completamente a especie”. López-Alonso cuestiona diferentes informacións aparecidas en medios de comunicación da Galiza con "supostos expertos falan do tratamento" deste verme con hipoclorito sódico (lixivia). "Estamos investigando e en Nova Zelandia recoñecen que non existen tratamentos axeitados, non é científico nin serio facer estas afirmacións”, advirte. 'Postenterogonia orbicularis': o verme achado en Ribadeo é unha especie-praga en Oceanía Traballo coas confrarías O departamento de Bioloxía da Universidade de Oviedo leva meses traballando con persoal técnico do Ministerio para a Transición Ecolóxica (Miteco) para facer un seguimento da presenza desta especie na costa asturiana “nun plan conxunto para localizalo e determinar posíbeis impactos”. Están elaborando un “banco de mostras” no que identifican a especie, e decidiron desprazarse á Galiza na procura de máis exemplares logo do primeiro achado. “Levamos dez zonas analizadas da costa galega, e volveremos facer máis estudos”, explica. Na Galiza están a traballar canda as confrarías e asociacións de bateeiros, difundindo información sobre as características destes vermes e divulgando a forma de tomar as mostras e de conservalas para que poidan ser estudadas. “Non é cuestión de alarmar, non se trata dun problema cos consumidores, senón que é unha ameaza á produción marisqueira. O verme come o bivalvo”, destaca López-Alonso. Desde este departamento xa remitiron información aos distintos pósitos e están a colaborar en todo momento. “Seguimos a disposición da Xunta por se quere pórse en contacto con nós, que levamos anos con esta investigación”, reitera. Detectan por primeira vez na Galiza un exemplar dun verme invasor e depredador do mexillón A preguntas de Nós Diario, fontes da Consellaría do Mar apuntan que “a protección do patrimonio natural e a biodiversidade corresponden ao Estado" e que ven o verme como “un depredador oportunista sobre certos cultivos de bivalvos que tan só chega a ter efectos significativos cando acada infestacións severas en certas granxas de cultivo, pero non no resto dos casos". Aliás, salientan que a experiencia noutras zonas "suxire que esta especie non ten elevada capacidade de dispersión no medio natural", polo que consideran que só sería “un risco relativo” para cultivos de ostra rizada, "onde gran cantidade de ostras se acumulan dentro de bolsas de malla para o seu engorde". Mais non representa o verme, conclúen, "un risco significativo para os recursos mariños vivos da Galiza”. O traballo investigador da Universidade de Oviedo chegou xa ao Miteco, diante do cal López-Alonso pediu a inclusión da especie Postenterogonia orbicularis no Catálogo español de especies exóticas invasoras, un paso fundamental en caso de que aumente as perdas no sector marisqueiro até o punto de obrigalo a reclamar axudas polos danos ocasionados. O Ministerio iniciou xa o procedemento para esta declaración e confirmou que solicitará ao Comité Científico, como órgano consultivo, un ditame sobre a adecuación científica da proposta, dando un prazo de resolución máximo de seis meses. No lugar de orixe desta especie invasora –Nova Zelandia e Australia– está considerada como unha especie-praga, destaca Ricardo López-Alonso. A Universidade de Oviedo xa divulgou parte dos resultados das súas investigacións ao respecto na publicación científica Unha nova ameaza para o medio mariño europeo. Parlamento da Galiza Por outra parte, na Comisión de Pesca do Parlamento galego, reunida esta terza feira, o PP rexeitou dúas proposicións non de lei presentadas polo PSdeG e o BNG, respectivamente, relacionadas con esta situación. A moción socialista demandaba a elaboración de "plans e estratexias" para actuar contra o verme, mentres a formación nacionalista instaba a actuar ante a "crecente presenza de especies invasoras" no litoral galego. Crise marisqueira na ría de Noia: A Confraría anuncia unha querela contra Naturgy pola morte do marisco O deputado do PP Jesús María Fernández Rosende delegou a responsabilidade no Miteco, mentres a deputada do BNG Rosana Pérez e o socialista Julio Abalde destacaron que as competencias en materia de marisqueo e de acuicultura “son da Xunta da Galiza”. Pérez afeou ao grupo popular que presentase "unha emenda copiada con puntos e comas do texto da proposta do BNG, mudando só 'Xunta da Galiza' por 'Goberno do Estado'". “A Consellaría non pode tomar este tipo de perigos con calma, senón todo o contrario", engadiu. A frota perdeu 300 barcos en dez anos Xuntanza desta terza feira da Comisión de Pesca da Cámara galega. (Foto: Parlamento da Galiza) A Comisión de Pesca do Parlamento galego aprobou esta terza feira dúas proposicións non de lei do PP demandando ao Goberno español un rexistro especial para a frota pesqueira de altura, con incentivos e beneficios fiscais para os tripulantes inscritos, así como a inclusión no Real Decreto que prepara o Ministerio de Consumo de tres ou máis racións de produtos do mar nos menús escolares. Na última década descenderon na Galiza en 300 as embarcacións rexistradas, e caeu 24% o consumo de peixe nos fogares. O BNG votou a favor destas iniciativas –coa abstención do PSdeG–, aínda que as nacionalistas reprocharon á Xunta que “non está a exercer as súas competencias”. De feito, na mesma comisión parlamentaria, e a pesar do “alarmante” descenso da produción marisqueira na ría de Ferrol, o PP rexeitou unha iniciativa do BNG para rexenerala.