O sector mexilloeiro alerta do “perigo” da planaria, un verme invasor e depredador de moluscos

O achado na costa da Mariña da planaria, un verme que se alimenta de bivalvos como o mexillón, xera preocupación no sector produtor galego. Os seus representantes piden monitorizala e novas regulacións, mentres a Xunta da Galiza asegura que estuda o seu "risco real".

En declaracións a Europa Press, o presidente da organización de produtores de mexillón Opmega, Ricardo Herbón, e o secretario do Consello Regulador da Denominación de Orixe Protexida (DOP) Mexillón de Galiza, Joaquín Garrido, reclaman actuar á Consellería do Mar mediante a monitorización da especie e normas de control para o baleirado dos tanques de lastre dos mercantes nos portos.

Pola súa parte, o departamento que dirixe Alfonso Villares, consultado por Europa Press, avoga por estudar o "risco real" da planaria e rexeita un "alarmismo excesivo".

O biólogo Daniel Prieto, da confraría de pescadores de Ribadeo, localizou un exemplar de planaria ('Postenterogonia orbicularis') durante unha mostraxe realizada nas últimas semanas. Avisou de que é unha especie invasora e depredadora tanto deste molusco como da ostra.

Despois de ser localizado na costa de Asturias, profesionais como Prieto ou o seu compañeiro Juan Trigo, do Grupo de Estudo do Medio Mariño (GEMM), comezaron con estas mostras.

Pola súa parte, a Xunta afirmou hai 10 días, unha vez publicada a noticia do achado en prensa, que non existía constancia oficial da presenza na Galiza deste verme e engadiu que a especie "non está incluída en ningún catálogo de especies exóticas invasoras".

Preguntada de novo, ante a preocupación existente entre os mexilloeiros, entre outras cuestións pola falta de datos, a Consellaría advirte de que "a principal medida que se pode tomar nestes momentos é proceder á recollida da información dispoñíbel sobre a situación actual de distribución e abundancia da especie, e a súa avaliación a través dunha análise de risco rigoroso". "Non se debe fomentar o alarmismo excesivo sobre esta especie, e si é preciso actuar con rigor, prudencia e no marco do mellor coñecemento científico dispoñible", argumentan fontes de Mar a Europa Press.

Respecto diso, apunta de forma xenérica que a Xunta ten centros de investigación propios e técnicos que "están a realizar un seguimento do medio mariño e colabora en distintos proxectos coas universidades, centros de investigación da comunidade autónoma e outros grupos mediante convenios de colaboración, nos temas de interese".

Neste sentido, incide en que é preciso "realizar unha avaliación rigorosa do risco real que esta nova especie podería supor nos ecosistemas mariños Galiza e nos cultivos de bivalvos en particular.

"É un perigo"

O secretario do Consello, Joaquín Garrido, ve "claro" que este verme é "un perigo" para a produción de mexillón, polo que subliña que hai que monitorizala e esixe "responsabilidade" á Administración galega.

"Entendemos que algo pode fallar" e "hai que manter a vixilancia", resalta. E é que, segundo asegura, a presenza da planaria na costa galega "non é de antes de onte", senón que "vén de hai dous anos", cando "xa se puxo esta preocupación sobre a mesa".

Tendo en conta que "isto non é novo", descoñece o motivo polo cal nestes momentos se pon "máis de manifesto". En calquera caso, subliña que o cultivo de mexillón trae a colación "a importancia da circularidade" e de control de "especies indesexadas". "É crucial que se lle preste atención. Ver cando chegou, se está a ter un efecto no cultivo do molusco, se neses dous anos aumentou a poboación", insiste.

O presidente de Opmega, Ricargo Herbón, mostra a súa preocupación, aínda que afirma que "de momento" non hai constancia de que haxa presenza da planaria nas rías.

Así as cousas, expón, o sector traballa "con tranquilidade" e "pendente" do tráfico e das verteduras en portos, fronte aos que demanda "máis control". Noutros territorios "non che deixan baleirar os tanques de lastre" e hai "un control exhaustivo" nos portos, apunta. Iso, segundo indica, "aquí non está lexislado".