O sector do metal destruíu máis de 14.500 empregos na Galiza desde o ano 2008

O sector do metal fechou 2024 con 60.231 persoas ocupadas no país. Así o recolle o Informe anual do sector do metal da Asociación de industrias do metal e tecnoloxías asociadas da Galiza (Asime) presentado onte en Vigo polo secretario xeral da entidade, Enrique Mallón, quen destacou que "o empregou medrou en 3%" en relación coa anualidade anterior. Na mesma dirección, asegurou que "máis de 50% das nosas empresas teñen necesidades de persoal de maior ou menor urxencia que non están a ser capaces de cubrir". Mallón afirmou que as empresas do metal rexistraron "un incremento de facturación de 10%", o que significa unha caída de seis puntos porcentuais en relación ao exercicio de 2023, cando os ingresos das compañías do sector marcaron unha alza de 16%. Na mesma dirección, o relatorio elaborado pola patronal do metal recoñece a desaparición de 14 sociedades no sector en 2024, unha cifra moi inferior á de 2023 cando botaron o feche 265 compañías. A este respecto, conclúe que o metal conta con 3.478 empresas na Galiza que representan ao redor de 19% do produto interior bruto (PIB). As cifras achegadas polo relatorio de Asime confirman que o sector do metal continúa sen recuperar os niveis de actividade e de emprego previos á Gran Recesión iniciada á volta de 2008. Precisamente, nese ano existían na Galiza ao redor de 4.300 empresas no complexo do metal, o que significa que até 2024 perdéronse 822, nun proceso sostido que se mantivo após 2015, cando a economía galega volveu manifestar síntomas de reactivación. Neste sentido, a industria da construción naval e das construcións metálicas, estruturas e fechamentos presentaron o peor comportamento durante o período. O complexo do metal perdeu 14.569 empregos na Galiza desde o ano 2008. Se á volta desa anualidade traballaban no sector ao redor de 74.800 persoas, 16 anos máis tarde ocupaba 60.231 empregados e empregadas. A este respecto, o secretario nacional da CIG-Industria, primeira organización sindical do sector, Xoán Xosé Bouzas, apunta a Nós Diario que "o complexo do metal segue sen recuperar os niveis de emprego previos á crise e as cifras de ocupación teñen un carácter puntual". Nesta dirección, a dinámica das empresas do metal está en liña coa do conxunto do conglomerado industrial. Edelmiro López Iglesias e Xoán Carmona Badía: "Nas décadas recentes a economía galega é máis industrial que a española e isto reforzouse, ademais, no que levamos de século" Os datos achegados polo Informe anual do sector do metal de Asime inciden na cronificación da crise do complexo industrial galego, que debuxan outros traballos elaborados desde o ámbito académico. A este respecto, o Instituto Galego de Estatística (IGE) lembra que o sector industrial a finais de 2008 ocupaba 216.000 persoas en toda a Galiza, ficando en 189.800 ao remate de 2024. Neste sentido, a industria destruíu nese período 26.200 postos de traballo, ficando lonxe dos niveis de previos á crise. A caída de emprego na industria contrasta co acontecido no sector servizos. Mentres entre 2008 e 2024 o sector industrial perdeu na Galiza 26.200 persoas ocupadas, pasando de representar de 18% a 14,6% do emprego total, o sector servizos gañou 76.200 traballadores e traballadoras, ao aumentar de 735.400 ocupados en decembro de 2008 a 811.600 no mesmo mes de 2024. Neste sentido, 3.596 industrias fecharon no país desde o exercicio de 2008, pasando, segundo o IGE, de 17.190 empresas ao remate desa anualidade, a 13.594 a finais de 2022, último ano con datos. Os sindicatos alertan da evolución do mercado de traballo: "Medra a pobreza laboral" e os empregos son "de baixo valor engadido" A produción industrial está moi por baixo das cifras previas á Gran Recesión, non conseguindo recuperar en ningún dos exercicios os niveis anteriores á crise. Así, o índice de produción industrial (IPI) situábase a finais de 2024 en 90,3, isto é, 15,7 puntos por baixo dos niveis de decembro de 2008, cando marcaba 106. Ao tempo, algúns dos grupos empresariais que máis achegan en termos de produto interior bruto e emprego á industria galega están a vivir momentos de incerteza, mesmo con amezas de feche como acontece con Alcoa. Esta multinacional estadounidense do aluminio, cunha factoría emprazada no concello mariñao de Cervo, un dos principais complexos metalúrxicos da Galiza, que achega o 30% do PIB da provincia de Lugo e ocupa de modo directo e indirecto a máis de 1.500 persoas, alerta estas días con non retornar á actividade normal se o Executivo español non lle garante que non vai volver haber un apagamento eléctrico no Estado. Precisamente, sobre isto manifestouse onte o delegado do Goberno estatal na Galiza, Pedro Branco, asegurando que "estou convencido" que a empresa continuará coa actividade industrial. Alcoa e Ignis EQT crean unha empresa conxunta para impulsar a planta de San Cibrao A sección sindical da CIG na factoría alumineira acusou, tamén, onte a Alcoa de incumprir "o segundo dos puntos fundamentais do acordo" asinado coa representación social de "arrancar as cubas" de electrólise "despois de negarse a facer o forno de ánodos". Asime di que o sector do automóbil enfronta "un momento capital" O relatorio elaborado pola Asociación de industrias do metal e tecnoloxías asociadas da Galiza (Asime) recolle que en 2024 fabricáronse na Galiza 512.503 vehículos, o que representa un descenso de 1,6% en relación a 2023. Porén, a facturación e o emprego na industria do automóbil incrementouse en 1% en referencia á anterior a anualidade, nun sector que ocupa no país 19.850 persoas de modo directo. O secretario xeral de Asime, Enrique Mallón, recoñeceu unha desaceleración no sector do automóbil e apuntou que "estamos nun momento capital para esta industria, xa que a demanda de vehículo eléctrico a nivel mundial non remata de despegar ao ritmo que se prevía nos investimentos acometidos que agora son difíciles de recuperar". Na mesma dirección, afirmou que "a competencia feroz de China está a erosionar esta industria capital en Europa" e reclamou "seguir traballando en potenciar a competitividade real do noso sector e atopar nichos de valor engadido". A substitución do coche de combustión polo eléctrico preocupa á patronal europea do automóbil, quen advertiu que podería implicar a destrución de 63.000 empregos no Estado e 4.400 na Galiza no horizonte de 2040. Na mesma dirección, as organizacións sindicais están vixiantes diante do anuncio do novo director de Stellantis sobre a intención do grupo de deslocalizar parte da produción a países como Portugal, Marrocos, Turquía, Alxeria ou Polonia, o que afectaría a planta de Vigo.