O sector do mar responsabiliza as eléctricas da alta mortaldade do marisco na Arousa

O marisqueo non levanta cabeza na Galiza. A intensa chuvia derivada das borrascas das últimas semanas e o baleirado dos encoros como consecuencia do incremento do nivel da auga están a provocar unha mortalidade masiva do marisco, que lembra a padecida en 2023. A este respecto, o patrón maior da confraría de Rianxo (O Barbanza), Miguel Ángel Iglesias, sinala a Nós Diario que "vimos de 2023, onde houbo a mortalidade máis grande. A Consellaría do Mar quedara de analizar as causas e hoxe estamos na mesma situación". A Confraría de Pescadores de Rianxo conta con máis de 600 socias e socios que se dedican na súa maioría á pesca coas tradicionais artes do xeito e do bou de vara e ao marisqueo, fundamentalmente do berberecho e da ameixa. Porén, a elevada mortalidade destas dúas especies nos últimos días pon en risco a actividade das 123 mariscadoras e mariscadores rexistradas no municipio en 2025, enfrontadas desde hai tempo a unha dura crise, que provocou que nos últimos cinco anos 15,2% delas abandonaran a actividade. Miguel Ángel Iglesias. Iglesias considera que "os encoros teñen moita responsabilidade na elevada mortalidade do marisco na rías porque baleiran cando lles peta buscando unicamente os beneficios do seu negocio". Neste punto, entende que "a Xunta ten que mirar por nós, obrigándoos a baleirar segundo os protocolos fixados" e denuncia que "os lombos do Ulla, emprazados entre Rianxo e Vilagarcía de Arousa, están arrasados, cando esta era unha zona que tiña os mellores bancos de berberechos da ría". A este respecto, Iglesias urxe a dragaxe dos mesmos. A Illa de Arousa (O Salnés) é unha das zonas máis castigadas nas últimas semanas pola mortalidade do marisco. A presidenta da Organización de Produtores Pesqueiros 20 (OPP-20) da Illa de Arousa, Inma Rodríguez, explica a Nós Diario, que "2023 foi un ano moi complicado para toda a ría de Arousa porque morreu moito marisco, pero daquela non lle afectou aos mariscadores de navalla. Porén, só a pasada sexta feira atoparon mortos máis de 250 quilogramos de navalla, algo que aquí nunca acontecera". A OPP-20 da Illa de Arousa agrupa perto de 900 persoas, nun concello onde o sector pesqueiro representa o 22,7% do produto interior bruto (PIB). Ao tempo, desta organización de produtores fan parte 165 mariscadoras e mariscadores, afectadas pola falta de produto nos bancos do concello. A localidade perdeu 55 mariscadoras desde 2020, pasando de 220 profesionais con licenza nese ano a 165 en 2025, o que representa unha caída de persoas ocupadas nesta actividade de 25% en só cinco anualidades. Inma Rodríguez. Rodríguez observa con moita preocupación a situación xerada, significando que "estes días fomos tomar mostras nas praias e atopamos moito berberecho morto". Nesta dirección, indica que "hai moita auga doce na ría, a maiores da que verten os encoros, que non fan caso ningún" e pon o foco na situación dos mariscadores de navalla "porque nós podemos sementar berberecho pero eles non poden sementar navalla". Ao tempo, incide que "as xentes do mar estamos sufrindo unha situación límite e precisamos apoio". Vilanova de Arousa (O Salnés) foi estes días a zona cero da mortalidade do marisco na Galiza. Segundo explica a Nós Diario o patrón maior da confraría da localidade, Rosalino Díaz, "a pasada sexta feira mariscadoras nosas foron mirar como estaban as praias e atoparon 120 quilogramos de ameixa morta. A segunda feira volveron a repetir a operación e sacaron das praias máis de 1.200 kg de ameixa morta ou coa lingua de fóra, que volvemos sementar na praia do Esteiro. Non sabemos que vai pasar con elas, pero a situación non é nada boa". Díaz responsabiliza da elevada mortalidade dos bivalvos a baixa salinidade da ría. A este respecto, desvela que "en Carril, no concello de Vilagarcía de Arousa, a salinidade estaba ás oito horas da segunda feira en 20, cando o marisco por baixo dese índice xa comeza a morrer. Porén, dúas horas máis tarde situábase en 0,067, o que amosa a gran cantidade de auga doce recibida". Neste punto, indica que "todo o mundo desconfía do impacto dos encoros na morte do marisco, ao incrementar a cantidade de auga doce cando baleiran as presas". O patrón maior da Confraría de Pescadores de Vilanova de Arousa destaca os prexuízos económicos que xera no concello a morte do marisco. Nesta dirección, apunta que "neste momento hai 195 persoas con licenza de marisqueo en Vilanova de Arousa, sendo o seu impacto moi importante na localidade, pois ao redor do marisco hai toda unha serie de actividades asociadas como as depuradoras, os cocedoiros ou as comercializadoras". Na mesma orientación, Rosalino Díaz advirte que "a caída de capturas está colocando as confrarías nunha situación límite, pois os ingresos destas dependen das vendas de marisco". Outro "ano negro" para o marisqueo na Galiza O marisqueo enfronta unha crise permanente na Galiza. Unha boa mostra disto é a constante destrución de emprego rexistrada nese sector nos últimos anos, cesando na actividade o paso exercicio 128 persoas e pasando de 3.307 ocupados e ocupadas en 2024 a 3.179 en 2025. Precisamente, os datos da última anualidade están en liña coa tendencia iniciada en 2020, destruíndose entre ese ano e 2025 até 545 empregos, o que significa un descenso porcentual de 14,7% e representa máis da metade dos postos de traballo perdidos nos últimos tres lustros. O sector do marisqueo marcou no último lustro perdas millonarias na ría de Arousa. A este respecto, os datos sinalan que as perdas económicas consecutivas entre 2021 e 2025 dos principais recursos de bivalvos agás o mexillón –sen ter en conta a inflación– foron de 10 millóns de euros en 2021 e 2022; de 8,5 millóns de euros en 2023, que sumados aos 30,8 millóns do bienio 2024-2025 xeraron unhas perdas totais para o período de 59,3 millóns de euros. O impacto económico provocado pola mortalidade do marisco en xaneiro e febreiro de 2025 está aínda por contabilizar, mais as primeiras estimacións apuntan a unhas cifras semellantes ás de 2023, o "ano negro" das mariscadoras e dos mariscadores galegos.