Repsol ampliou 70% os seus beneficios nun 2022 marcado polo récord no prezo dos combustíbeis

Repsol, a multinacional española de carburantes, obtivo un resultado neto de 4.251 millóns de euros en 2022, o que supón un incremento de 70% respecto ao ano anterior, saíndo beneficiada da de crise enerxética que golpeou a cidadanía durante o pasado ano. A marxe de beneficio por barril que obtivo Repsol en 2022 é un factor clave para entender a súa rendibilidade durante o ano 2022. Dita marxe multiplicouse por 6,5 até alcanzar os 15,6 dólares por barril, unha cifra sen precedentes que máis que triplica a media dos dez anos anteriores, de algo máis de 5 dólares. A CNMC investiga tres petroleiras por prácticas anticompetitivas Desta forma, a multinacional obtivo beneficios récord por cada barril vendido xusto no momento no que máis sufría a sociedade pola crise enerxética e mentres o Goberno español fixaba a bonificación de 20 céntimos por litro de combustíbel nas estacións de servizo estatais. A pesar destas circunstancias, o conselleiro delegado da compañía, Josu Jon Imaz, descargou a culpa dos altos prezos para as persoas usuarias nas decisións tomadas pola Unión Europea (UE). "Os prezos altos non son 'caídos do ceo', son consecuencia das incorrectas decisións adoptadas no seo da UE", afirmou. Ademais, Imaz tachou de "populistas" a quen falan de "beneficios extraordinarios" e apostan polo gravame dos mesmos. Así, cualificou de "inxusto" o feito de "considerar extraordinario un beneficio que se obtén dun grande esforzo investidor e penalizalo". "As mensaxes populistas só serven para dificultar a actividade empresarial", puntualizou. Imaz gañou máis de catro millóns de euros en 2022 Precisamente, Josu Jon Imaz, percibiu unha remuneración de 4,13 millóns de euros en 2022 polas súas funcións en Repsol, un incremento de 3,5% respecto dos 3,99 millóns que gañou en 2021. Pola súa parte, o presidente non executivo da multinacional, Antonio Brufau, gañou 2,81 millóns de euros, 1,37% máis. En total, o consello de administración de Repsol, composto por 15 membros (un executivo, 10 independentes e catro externos) percibiu unha remuneración total de 11,67 millóns en 2022, 13,3% máis que os 10,30 millóns percibidos en 2021. Unhas cifras que contrastan cos prezos aos que chegaron os carburantes durante o ano 2022. En xullo a gasolina alcanzou os 2,141 euros e o gasóleo os 2,1 euros, marcando o seu máximo histórico. Naquela altura o encarecemento con respecto ao mesmo mes de 2021 era de 23,9% no caso da gasolina e de 35% no do gasóleo. Previamente, en marzo de 2022, as estatísticas chegaron a indicar unha suba interanual de 45,6% do prezo do gasóleo e de 33,6% do da gasolina. O gasóleo acumula case dous anos, un total de 23 meses desde marzo de 2021, de incrementos interanuais do seu prezo. Pola súa parte, a gasolina, cuxo custo caeu en decembro de 2022 con respecto ao do mesmo mes de 2021, acumulou 21 meses consecutivas de alzas interanuais. Oposición aos impostos Repsol terá que abonar este ano ao redor de 450 millóns de euros polo imposto estabelecido polo Goberno do Estado español para gravar en 1,2% as vendas das enerxéticas cuns ingresos superiores a 1.000 millóns anuais. Esta cifra supón 10,6% do resultado neto da compañía. Subir os impostos a eléctricas e grandes fortunas: as propostas do BNG para recadar 180 millóns de euros A pesar de supor menos de 11 de cada 100 euros dos altos beneficios que conseguiu a multinacional no contexto dunha crise enerxética que elevou o custo dos combustíbeis para as persoas usuarias, Imaz afirmou que "esta taxa é discriminatoria e desincentivará o negocio". Neste sentido, a patronal eléctrica española, da que forma parte Repsol, interpuxo un recurso contencioso-administrativo ante a Audiencia Nacional contra este gravame extraordinario ao sector, ao consideralo "discriminatorio e inxustificado". Naturgy aumenta 35,8% o beneficio neto en 2022 Por outra parte, a multinacional eléctrica española Naturgy obtivo un beneficio neto de 1.649 millóns de euros no ano 2022, o que supón un aumento de 35,8% respecto ao exercicio anterior. Así o fixo nun ano que pasará á historia como o máis caro até o momento. O prezo da luz para a clientela de tarifa regulada vinculada ao mercado almacenista fechou 2022 en 209,4 euros por megawatt hora (MWh) de media, polo que se situou como o ano máis caro da serie histórica, que aporta datos desde 1998. A compañía aproveitouse dos 5,5 xigawatts (XW) de potencia operativa no Estado español, cunha trintena de parques eólicos [boa parte na Galiza] e plantas fotovoltaicas en construción, equivalentes a máis de un XW adicional, que pretenden facer funcionar nos próximos meses. Naturgy explota os recursos galegos A baixa salinidade na ría acaba con 81% do berberecho en Noia Naturgy é o segundo produtor hidráulico da Galiza con 1.120 megawatts e 12 encoros. A mercantil, xurdida da absorción de Fenosa por Gas Natural, explota parte das centrais erguidas no seus momentos por Pedro Barrié de la Maza, como a do Tambre, que foi sinalada nos últimos días pola súa influencia na mortalidade do marisco da ría de Muros e Noia. Ademais, a multinacional proxecta novos parques eólicos no país, como é o caso dos proxectados nas comarcas da Mariña e de Ordes.