A produción renovábel supera en 37% as necesidades de consumo eléctrico do país

Rede Eléctrica Española (REE) vén de publicar os datos de xeración e de consumo eléctrico no primeiro cuadrimestre de 2025. Segundo os mesmos, a xeración eléctrica chegou entre xaneiro e abril deste ano a 8.676.393 megawatts por hora (MWh), o que representa unha caída da produción de 13,7% en relación co mesmo período de 2024. A electricidade de orixe non renovábel sumou 1.060.768 MWh, rexistrando un incremento en referencia ao mesmo período do exercicio anterior de 2,7%. Galiza xerou 7,6 millóns de MWh de orixe renovábel no primeiro cuadrimestre de 2025. As enerxías 'limpas' representaron un 87,8% do total da produción eléctrica galega, destacando 4,1 millóns de MWh de tecnoloxía hidráulica, 3,2 millóns de MWh de procedencia eólica e 130.175 MWh doutras fontes renovábeis. Un ano máis, a tecnoloxía hidráulica é o primeiro fornecedor da electricidade de orixe renovábel. Este tipo de xeración alcanzou nos catro primeiros meses de 2024 un total de 8.977.429 MWh, o que representa 15,2% máis que no mesmo período de 2025. As subas máis elevadas tiveron lugar na electricidade de tecnoloxía hidráulica, mais tamén é relevante no caso da eólica. Nesta liña, as enerxías limpas aumentaron a súa participación no pool eléctrico galego en 7,3 puntos neste período. Caída do consumo Fernando Branco, membro do colectivo de debate enerxético Bidán, sinala a Nós Diario que "era normal que nestes primeiros catros meses de 2025 caera a produción eléctrica en relación co primeiro cuadrimestre de 2024, un período en que a xeración, sobre todo a de orixe hidráulica, foi moi elevada". A este respecto, asegura que o que máis lle preocupa "é a caída do consumo". "Galiza é a comunidade do Estado onde máis caeu o consumo eléctrico na última década e iso vai máis alá do efecto Alcoa", afirma Branco, quen explica isto porque "a economía galega e a industria non están no seu mellor momento". Na mesma dirección, apunta que "estes datos queren dicir que a transición enerxética se encuentra nunha fase moi inicial e é moi débil no país, porque o proceso de transición enerxética e a descarbonización obrigan a maiores consumos eléctricos, e iso non se está dando". O consumo de electricidade na Galiza nos primeiros catro meses deste ano colocouse en 4,8 millóns de MWh, o que representa 63% do total da produción renovábel galega. Neste sentido, aséntase a tendencia da suficiencia eléctrica do país en base ás enerxías limpas malia a falta avances en materia de descarbonización e de transición enerxética. A exportación A produción de orixe renovábel vén superando as necesidades de consumo eléctrico da Galiza desde 2020. No primeiro cuadrimestre de 2024 superou en 46,2% as necesidades de consumo das persoas físicas e xurídicas residentes na Galiza. Así, continuouse coa liña comezada en 2020, 2021, 2022 e 2023, cando a electricidade de fontes renovábeis superou o consumo interno en 26%, 15,6%, 7,8% e 54,1%, respectivamente. Galiza exportou no primeiro cuadrimestre deste ano 3.645.907 MWh de electricidade, até 42% do total xerado na Galiza. O principal destino é Madrid, que no mesmo período consumiu 9.552.084 MWh, dos cales só xerou 431.267 MWh, sendo só 212.152 MWh de orixe renovábel. Madrid é a única comunidade do Estado español que non conta con ningunha instalación eólica e que, por tanto, non xera electricidade procedente do vento.