As prestacións de 403.735 pensionistas están por baixo do limiar da pobreza

Galiza rexistraba a finais do mes de xullo 785.478 persoas que recibían algún tipo de pensión contributiva. Segundo os datos achegados polo Instituto Nacional da Seguridade Social (INSS) do Ministerio de Inclusión, Seguridade Social e Migracións nun informe que vén de facer publico neste mes de agosto, os seus ingresos medios situábanse en xullo en 1.127,0 euros mensuais, presentando entre eles unhas diferenzas notábeis en función do réxime de cotización das persoas perceptoras e dos diversos territorios. As cifras ofrecidas polo Instituto Nacional da Seguridade Social debuxan unha realidade económica moi precaria para o colectivo de pensionistas galegos. Neste sentido, indican que a contía das pensións na Galiza está 184,9 euros por baixo da media estatal, situada en 1.311,9 euros, só cobrando unha contía inferior á poboación galega a cidadanía estremeña, cunha percepción mensual de 1.108,9 euros. Porén, a pensión media en Ourense e Lugo atópase á cola de todo o Estado, alcanzando 975,4 euros e 1.028,1 euros respectivamente. 557.046 persoas perciben na Galiza unha pensión por baixo do salario mínimo interprofesional (SMI). A este respecto, os ingresos de 70,9% das e dos pensionistas son inferiores ao SMI aprobado polo Goberno do Estado para 2025 e que se sitúa en 1.184 euros mensuais, 50 euros máis que a contía fixada en 2024. Neste sentido, as retribucións por este concepto percibidas no Estado continúan lonxe das recomendación recollidas na Carta Social Europea, que estipulan un salario mínimo interprofesional de 1.320 euros ao mes. A Organización para o Desenvolvemento e Cooperación Económica (OCDE) sitúa o limiar da pobreza en 60% da renda media. Estando esta no Estado en 2025 perto dos 1.790 euros mensuais, o limiar da pobreza fica en 1.072 euros ao mes, polo que ao redor de 403.735 pensionistas da Galiza perciben uns ingresos cun importe inferior ao mínimo considerado para non ser pobre. A este respecto, os datos achegados polo Instituto Nacional da Seguridade Social conclúen que 51,4 % das persoas que perciben pensións contributivas na Galiza son pobres. As diversas clases de pensións deixan rendas moi diferentes que dan unha imaxe máis axustada da situación económica e social deste colectivo. Nesta liña, os ingresos medios das 23.369 persoas que na Galiza perciben unha pensión de orfandade sitúanse en 524,1 euros ao mes e os ingresos medios das 183.324 persoas que teñen pensión de viuvez sitúanse en 796,8. Ao tempo, os ingresos medios das 82.752 persoas que perciben unha pensión de incapacidade permanente están en 1.095,8 euros e, finalmente, os ingresos medios das 489.081 persoas cunha pensión de xubilación sitúanse en 1.291,0 euros mensuais. O Réxime Xeral As contías das pensións presentan diferenzas en función do réxime de cotización das persoas perceptoras. Así, as 472.173 adscritas ao Réxime Xeral no país perciben uns ingresos de 1.277,4 euros ao mes. A retribución das persoas pensionistas na Galiza que cotizaron por este réxime está 149,9 euros mensuais por baixo da media do conxunto do Estado, situada en 1.427,3 euros, presentando uns rexistros peores ademais da Galiza, Andalucía, Canarias, Estremadura e a Rexión de Murcia. Ourense volve rexistrar as cifras máis negativas de todo o Estado español. Os 51.895 pensionistas galegos e galegas que cotizaron durante a súa vida laboral polo Réxime Especial de Traballadores do Mar perciben uns ingresos medios mensuais de 1.233,0 euros, sendo 108,6 inferiores á media estatal e estando á cola do conxunto do Estado. Aliás, nesta anualidade, as pensións por este réxime na Galiza seguiron diverxendo coas do Estado, nunha dinámica que as levou en 2024 a ser superadas na súa contía polas andaluzas. As pensións máis baixas do Estado percíbenas 230.818 persoas que cotizaron durante a súa vida laboral polo Réxime Especial de Traballadores Autónomos (RETA). Segundo os datos fornecidos polo Ministerio de Inclusión, Seguridade Social e Migracións, en abril de 2025 percibían unha contía media para o conxunto da Galiza de 797,6 euros mensuais.