Preocupación no sector da ría de Arousa polo incremento dos roubos de cría nas bateas de mexillón
A principal organización de produtores, Opmega, advirte do importante prexuízo económico que causan uns roubos que afirman que son “cada vez máis frecuentes”.
Esta fin de semana roubáronse en dúas bateas na zona de Viláxoán máis de 100 cordas de mexilla, a cría do mexillón. Unha acción que non é illada, pois vén a se sumar a outros roubos en bateas que ao longo destes meses decorreron en augas da ría de Arousa. A principal organización do sector produtor, Opmega, fala de roubos “cada vez máis frecuentes”, lembra que causan importantes prexuízos económicos e anima a denunciar estes casos.
“Os roubos afectan a todos os polígonos e o prexuízo económico é moi importante, poden implicar a perda da colleita enteira, supoñendo anos de traballo”, explica a Organización de Produtores de Mexillón de Galiza. Opmega anuncia que se dirixirá á administración galega para pedir que adopte medidas.
Na Galiza hai 3.337 bateas de mexillón. A produción en 2017 foi de 260.000 toneladas, cun valor de 122 millóns de euros. O sector dá emprego directo a 11.000 persoas e indirecto a máis de 7.000, segundo dados do Consello Regulador do Mexillón.