O porcino galego perdeu este mes 6 millóns de euros pola caída dos prezos pola peste

Hai pouco máis dun mes, o 27 de novembro, declarábase en Catalunya a alerta por epidemia de peste porcina, doenza detectada en varios xabarís en Barcelona. Un mes despois e a pesar de non aparecer caso ningún na cabana porcina nin do resto do Estado español nin da Galiza, o sector do porcino galego está a padecer taamén os efectos económicos. A Federación Galega de Porcino (Fegapor) alerta dunha perda económica semanal de 1,5 millóns de euros no sector. Ao termo do mes de decembro a mingua alcanza xa os 6 millóns de euros e desde Fegapor alertan da necesidade de “buscar alternativas” para reverter a tendencia en 2026. Desde comezos de decembro, as perdas económicas no porcino galego mídense por semanas. Segundo os datos do presidente de Fegapor, Pablo Meijomín, os prezos de referencia comezaron a súa caída este mes, a razón de 20 céntimos por porco, o que en función do peso do animal supón entre 25 e 30 euros menos por animal no mercado. O sector produce na Galiza arredor de 60.000 porcos á semana, o que sitúa as perdas semanais desde comezos de decembro en arredor de 1,5 millóns de euros que no que vai de mes chegaría a 6 millóns ao feche de decembro. O sector do porco alerta que a Xunta aínda "non tomou medidas" fronte á peste porcina En conversa con Nós Diario, Meijomín asegura que no consumo de carne de porco “non se notou o descenso” e mesmo sinala que o ritmo de matanzas neste mes superou a media anual normal. En todo o Estado “sacrifícanse 1 millón de porcos cada semana, e este ano chegamos aos 1,3 millóns”, di. A explicación a estas cifras segundo o presidente de Fegapor é que “a xente entrou en pánico e quixo sacar adiante os porcos que tiña preparados cando saltou a alerta en Catalunya”. Porén, malia o aumento da oferta, “a industria absorbeuna toda e nese sentido non houbo problema”. A respecto do comportamento do mercado porcino, o presidente de Fegapor destaca que “a carne ten saída e o consumo é moi alto". "Consúmese, de feito, máis, pero o problema para os produtores é que o prezo é máis baixo”. En cifras, a tradución deste mes de decembro para os produtores de porcino galegos foi pasar de recibir no verán 1,72 euros de media por quilo aos actuais 1,04 euros: “Son case 70 céntimos menos e cada semana que pasa é unha lousa para os produtores”, afirma. Mantense o consumo pero baixan os prezos Desde Fegapor insisten en que logo de máis dun mes da alerta pola peste porcina en Catalunya “non hai un impacto negativo sobre o consumo”, pero a baixada dos prezos fixados para a venda de porco en todo o Estado español “cada semana que pasa é unha lousa máis sobre os produtores, e se se alonga moito máis no tempo vai ser unha situación complicada”. O sector porcino alerta: "Se hai un surto de peste na Galiza estamos perdidos" Desde o sector galego valoran “positivamente” os acordos aos que alcanzou o Goberno español a nivel internacional para asegurar as exportacións. “Seguen negociando, pero en xeral non queda ningún país que non aceptase a rexionalización das exportacións” de porcino, apunta, e destaca que tamén benefician o sector do Estado os aranceis dos EUA á China, que acabarán por “desviar as compras exteriores da China ao Estado español”, augura Meijomín. Na situación actual desde Fegapor móstranse “optimistas”, logo de que Catalunya anunciase o levantamento da alerta pola peste porcina para comezos de febreiro de 2026, e agardan “que en tres ou catro meses poidamos ter unha mellor situación”. Lembra que son 14 os países no mundo con casos detectados desta peste “e 99% son en xabarís”. A peste porcina introduce máis incertezas nun momento de crise pola caída dos prezos: este é o panorama do sector ante un novo problema Preguntado por se é unha ameaza real a aparición de algún caso de peste porcina na cabana galega, o presidente de Fegapor é moi claro e considera “moi complicado que entre un xabaril nunha explotación en intensivo”. Outro suposto é o dos porcos criados en extensivo, como o ibérico ou no caso da Galiza o porco celta. No caso das granxas de porco celta e en ecolóxico do país afirma Meijomín que “son poucas e de detectarse algún caso poderían confinarse sen problema”. Serxio Boado é copropietario das Granxas de Lousada na Irixoa (As Mariñas), con explotación porcina en extensivo. Afirma que en casos coma este “faise complexo o equilibrio entre coexistencia, bioseguridade e sustentabilidade económica”. Recoñece preocupación “por se chega aquí ou pola desconfianza”. Boado explica a Nós Diario que “tivemos que facer enquisa de biosegudridade” e di non ter claro "que todas as granxas poidan arranxar as deficiencias para poder continuar”. O sector porcino, en cifras Os últimos datos fechados do Instituto Galego de Estatística –relativos ao ano 2023– cifran en máis de 1,6 millóns de animais a cabana porcina galega e falan dun valor engadido bruto do sector primario galego de 3.788 millóns de euros a prezos correntes actualizados ao ano 2024. Segundo os datos do censo de porcino do Ministerio de Agricultura, Pesca e Alimentación (MAPA), o Estado español é o primeiro produtor na Unión Europea de carne de porco –con 24,2% da produción comunitaria– e o terceiro do mundo, só por detrás de China e dos EUA. A peste porcina preocupa o sector Na última década as cifras do sector porcino no Estado están en descenso, pero en casos como o galego o censo de porcos aumentou o ano pasado 9%. Cos datos do Ministerio, Galiza representa 22,7% das explotacións porcinas do conxunto estatal. Polo miúdo, son 47 explotacións en extensivo, 14.369 en intensivo e outras 37 no chamado sistema mixto que combina extensivo e intensivo nunha mesma explotación. A cifra total ascende a 14.453 explotacións de porcino do país, do total de 63.477 que hai en todo o Estado. Unha das derivadas máis importantes do sector porco son as vendas ao exterior. Segundo os datos da Interprofesional Agroalimentaria de Porcino (Interporc), até o pasado mes de setembro as exportacións galegas de porcino alcanzaron un valor de 163 millóns de euros, logo de crecer 5,8% a respecto do mesmo período de 2024. As exportacións de porcino galego van en 86% dos casos aos mercados da 'eurozona'. De feito, un dos principais clientes do porcino galego é o veciño Portugal, por valor de 138 millóns de euros -até setembro-. Tamén o mercado asiático é destino dos cárnicos de porcino da Galiza: até setembro foron 7,5 millóns de euros rumbo a Corea do Sur, 7,1 millóns no Xapón e 2,4 millóns na China. Récord de facturación na Central Agropecuaria da Galiza en Silleda No sector bovino, a Central Agropecuaria de Galiza en Silleda (O Deza) fechou esta segunda feira o ano 2025 cunha sesión especial centrada nas categorías de becerros carniceiros e vacún maior para asegurar o abastecemento nestas datas. Rematada a poxa desta segunda feira, desde a Central fixeron balance do ano 2025, cunha asistencia total de 55.309 animais no conxunto das poxas e unhas transaccións totais por valor de 59.167.953 euros, até 49,3% máis a respecto de 2024.