Fruga e Sindicato Labrego cualifican de "parches" as medidas do Ministerio para o agro mentres que UUAA cre que son "positivas"

A presentación por parte do ministro de Agricultura, Pesca e Alimentación, Luis Planas, dun paquete de 43 medidas para frear o malestar no agro non foi acollido da mesma maneira por todos os sindicatos. Até o de agora, déronlle a súa aprobación, asinándoo a semana pasada, dúas organizacións estatais: a Unión de Pequenos Agricultores e Gandeiros (UPA) e a Unión de Unións de Agricultores e Gandeiros. Desde a Galiza, a Federación Rural Galega (Fruga) e o Sindicato Labrego Galego (SLG) critican algúns dos puntos da iniciativa estatal que consideran importantes e só Unións Agrarias (UUAA) considerouna positiva e froito das mobilizacións que levou a cabo o sector. Continúa vixente a xestión telemática O primeiro desencontro coas medidas aparece xa no primeiro bloque dedicado á simplificación e flexibilidade da Política Agraria Común (PAC). En declaración a Nós Diario, o coordinador xeral da Federación Rural Galega (Fruga), Manuel da Cal, entende que a diminución da carga administrativa ten que contar de maneira evidente coa “eliminación da barreira telemática”, unha circunstancia que, asegura, “non figura en ningunha parte do documento feito público polo que continúa a obriga de ter que presentar todo exclusivamente por internet, até o punto de ter sancións se non se fai así”. Lembra que na Galiza “aínda temos problemas de infraestrutura en todo o territorio e, ademais, unha parte importante deste sector é poboación envellecida que ten problemas para facelo desta maneira”. Desde UUAA, o seu coordinador sectorial, Félix Porto, discrepa. "A entrega de documentación por vía telemática entendemos que tamén está aprazada", explica a Nós Diario, "mais en todo caso fica pendente de saber como quedará de maneira definitiva polo que será outro tema a negociar máis adiante co Ministerio". A Fruga exixe a posta en marcha da Mesa de Interlocución Láctea ante a "especulación" da industria Cadea alimentaria “A Lei da Cadea Alimentaria segue a ser insatisfactoria”, asegura Manuel da Cal. Defende esta afirmación por entender que o Ministerio “non quere aceptar a posibilidade de que existan métodos para determinar de maneira obxectiva e como referencia os custos efectivos da produción”. Sinala que nas medidas “falan de Observatorio da Cadea Alimentar, mais a Galiza non o ten e, en todo caso, o que marcara debería ser de obrigado cumprimento, algo que non presenta”. Neste apartado, a secretaria xeral do Sindicato Labrego galego (SLG), Isabel Vilalba, indica a Nós Diario que "non compartimos a idea de que sexa un exemplo para a directiva europea de prácticas desleais, se funcionara tan ben non teriamos a situación actual de baixos prezos". Lembra que o Índice de Prezos en Orixe e Destino (IPOD) marcou en marzo 433% de media de diferenza entre o que se paga cando sae das explotacións até o final que pagan ás persoas consumidoras, algo que considera "inaceptábel". Nesta cuestión, o SLG considera que a Consellaría do Medio Rural tamén ten un papel importante. "Igual que o Ministerio, ten a capacidade de proporcionar informes sobre custos de produción e funcionamento da cadea". O sector gandeiro pide rematar co sacrificio de animais sans “Prorrogar no noso caso non é solucionar” En opinión da secretaria xeral do SLG, Isabel Vilalba, “moitas das medidas que son lesivas para o sector en realidade son prórrogas”. Pon como exemplo a Nós Diario como rematará o decreto de nutrientes, a flexibilidade do decreto de bovinos ou o tema de contar con persoal veterinario nas explotacións. “Hoxe todo o mundo admite que por custos é imposíbel que se poida cumprir e tampouco habería posibilidade de contar con persoal abondo para que se faga polo que, en realidade, habería que modificalo non pospoñelo”, asegura. Por último, este sindicato cre que as medidas internacionais "son mínimas e claramente insuficientes". Neste sentido, Vilalba indica que nas medidas "só se fala de exixir manter as producións por debaixo dos límites máximos de residuo nas substancias autorizadas na Unión Europea e de residuo cero nas substancias prohibidas", polo que "non se mellora en nada, o que se pide é o cumprimento das medidas xa existentes". UUAA denuncia o uso de leite portugués como galego "Era moi necesario asinar agora estas medidas para avanzar e o aprazamento das cuestións fundamentais, como o tema de veterinario ou tamén o das inspeccións ás explotacións de menos de 10 hectáreas, permítenos que non se poñan en marcha a partir do 1 de xaneiro", defende Félix Porto, de Unións Agrarias. "Agora temos uns meses para continuar as negociacións e conseguir vantaxes como un ecorréxime para o país", engade. Desde UUAA poñen énfase ademais nas mesas sectoriais nas que se sentará co Ministerio de Agricultura, Pesca e Alimentación (MAPA). "É nelas onde se teñen que decidir estas cuestións de maneira definitiva", conclúe este sindicalista.