Naturgy anuncia beneficios récord explotando os recursos na Galiza e tributando en Madrid

Naturgy comunicou esta cuarta feira á Comisión Nacional do Mercado de Valores (CNMV) os datos do seu último resultado bruto de explotación, correspondentes ao primeiro semestre do ano –até xuño de 2025–. A empresa enerxética obtivo un beneficio neto de 1.147 millóns de euros no citado período, 10% máis que no mesmo de 2024, e a modo de previsión apunta que ao feche deste ano obterá unhas ganancias "récord" de máis de 2.000 millóns de euros. "Nun contexto económico e sectorial moi complexo, o grupo superou as expectativas do mercado, mantendo sempre o foco de investimento con visión de longo prazo e a disciplina financeira nas súas decisións, características que nos permiten manter un balance robusto e unha xestión adecuada dos riscos do negocio", dixo o seu presidente, Francisco Reynés. Os resultados de Naturgy proceden, en boa medida, da explotación dos recursos de xeración de enerxía que a compañía –a antiga Fenosa– ten na Galiza. É o segundo operador hidráulico nos encoros do país e o primeira en produción eólica mais, a pesar diso, Naturgy paga os seus impostos en Madrid. Segundo os últimos datos dispoñíbeis a eléctrica abonou en concepto de Imposto de Sociedades en Madrid no exercicio de 2022 un total de 300 millóns de euros. Segundo os datos presentados pola compañía ao feche do mes de xuño, desde xaneiro o grupo investiu 897 millóns de euros, principalmente en renovábeis e redes. A capacidade instalada de xeración renovábel acadou segundo os datos da compañía os 7,7 xigawatts (XW), con 1,4 XW de capacidade adicional que Naturgy di que ten actualmente en construción. E este semestre fechou tamén unha auto-OPA para chegar ao 10% de accións propias encamiñada a mellorar a liquidez da súa acción e voltar aos índices bolsistas internacionais. Ao feche do semestre Naturgy recoñeceu á CNMV unha débeda neta de 13.689 millóns de euros, fronte aos 12.201 millóns de euros que tiña ao termo do exercicio de 2024. A ratio de débeba neta sobre o Ebitda –beneficio antes de xuros, impostos, depreciacións e amortizacións– dos 12 últimos meses da empresa situouse en 2,6 veces, o que reflicte o impacto da recompra de accións propias na auto-OPA por 2.332 millóns de euros completada en xuño. Naturgy, con 12 encoros na Galiza, dispara o beneficio 10% no primeiro semestre e apunta a un récord de 2.000 millóns en 2025 O negocio na Galiza Naturgy dispón de 1.120 MW de potencia instalada nos 12 encoros galegos que explota hidroelectricamente. A empresa ten como principais accionistas CriteriaCaixa, ligada a CaixaBank; o fondo británico CVC, e BlackRock. Na xeneración hidroeléctrica do país Naturgy é o segundo operador dos tres que aproveitan os 12 encoros galegos para producir electricidade –ademais de Endesa e Iberdrola–. Entre as tres operadoras obtiveron dos ríos galegos ingresos de 633 millóns de euros en 2024. Iberdrola, Naturgy e Endesa, que posúen 81,6% da potencia hidroeléctrica galega, pagan os seus impostos fóra da Galiza. É tamén unha das catro maiores operadoras no sector da xeración eléctrica na Galiza, con 487 MW de potencia eólica instalada nun total de 18 parques situados por todo o país. A súa presenza na rede de comercialización abrangue 285 dos 313 concellos, o que a converte na maior rede eléctrica con 1,3 millóns de clientes. Crise marisqueira na ría de Noia: A Confraría anuncia unha querela contra Naturgy pola morte do marisco O encoro que axudou a recuperar a luz no apagamento xeral Un dos encoros galegos nos que Naturgy ten actualmente a concesión do aproveitamento hidroeléctrico, o de Portodemouros, foi no apagamento do pasado 28 de abril un dos encargados de levantar a xeración eléctrica en todo o Estado español. Ao carón deste encoro están as comarcas do Deza, Arzúa a Terra de Melide. Veciñanza dos concellos afectados critica que, a pesar de "sufrir a diario os prexuízos de ser veciños dun encoro e ter soportado a escasos quilómetros as turbinas das hidroeléctricas que devolveron a luz ao Estado español, no centro de Madrid soubemos que volveu a luz ese mesmo día ás 18 horas, mais en Brocos (Agolada, O Deza), a 500 metros do encoro, non chegou até o día seguinte ás 21 horas, e marchou outra vez 20 minutos despois”.