Onde é máis difícil atopar vivenda? O mercado de 44 municipios estivo tensionado durante tres anos seguidos

Un total de 44 municipios galegos acumulan tres anos co seu mercado da vivenda tensionado (2020, 2021 e 2022), segundo o estudo Zonas tensionadas por concellos 2023, publicado polo Observatorio da Vivenda da Galiza, organismo dependente do Instituto Galego de Vivenda e Solo (IGVS). Cinco das sete principais cidades galegas sufriron a situación de tensión de mercado (aquelas nas que os prezos da vivenda se disparan nun curto período provocando que as familias teñan problemas para acceder) durante os últimos tres anos: A Coruña, Santiago de Compostela, Pontevedra, Lugo e Ferrol. No caso da Coruña, a situación estendeuse na comarca (Culleredo, Arteixo, Oleiros e Cambre), así como nas veciñas das Mariñas (Betanzos, Curtis e Miño) e de Bergantiños (Carballo, Malpica, Ponteceso e A Laracha). Da mesma maneira aconteceu na comarca de Compostela (Brión, Teo e Ames), así como nas súas fronteirizas de Noia (Noia, Outes e Porto do Son), da Barcala (Negreira), do Deza (Lalín) e de Ordes (Oroso). No caso de Noia, a comarca do litoral máis próxima á capital, todos os municipios costeiros (tres dos catro da comarca) sumaron tres anos co mercado tensionado. Joan Sales, doutor en Demografía: "Non por vir camiñando, o turismo é menos perigoso" Aínda que Vigo non entra neste conxunto de concellos (sumou dous dos tres últimos anos co mercado tensionado), si o fan tres da súa comarca (Soutomaior, O Porriño e Gondomar). Na veciña comarca do Condado, ficaron dentro os casos de Ponteareas, Mondariz e Salvaterra, tres dos cinco municipios desta área. Na comarca de Pontevedra, alén da capital do Lérez, Poio entra na terna, da mesma forma que o fan municipios das comarcas veciñas do Morrazo (Moaña e Cangas), O Salnés (Sanxenxo) e Caldas (Caldas de Reis). Tamén hai localidades na mesma situación nas comarcas da Mariña (Pontenova e Ribadeo), de Ortegal (Cariño), da Fonsagrada (A Fonsagrada), de Sarria (Sarria), de Lemos (Monforte) e da Terra Chá (Vilalba). Ademais, 48 municipios galegos acumularon dous dos últimos tres anos (2020, 2021 e 2022) co mercado da vivenda tensionado (sen incluír os que sumaron tres), entre estes Vigo e Ourense, polo que as sete grandes cidades galegas acumularon como mínimo dous dos anos nesta situación. Son moitas as comarcas do país nas que hai municipios que tiveron o mercado da vivenda tensionado por dous dos últimos tres anos: O Salnés (A Illa de Arousa, Meaño, Ribadumia, Vilanova de Arousa, Cambados e Vilagarcía de Arousa); A Mariña (Foz, Mondoñedo, Burela e Viveiro); A Coruña (Abegondo, Bergondo, Carral e Sada); Vigo (Baiona, Vigo, Mos e Redondela); O Barbanza (Boiro, Rianxo e A Pobra do Caramiñal); Baixo Miño (A Guarda e O Rosal); Pontevedra (Ponte Caldelas e Barro); Fisterra (Muxía e Fisterra); Ourense (Coles e Ourense); O Morrazo (Marín), Ordes (Ordes); Caldas (Moraña); Ferrol (Valdoviño); O Sar (Rois), Deza (Silleda); Terra de Soneira (Vimianzo); A Ulloa (Palas de Reis); Chantada (Chantada); Ortegal (Ortigueira); A Paradanta (A Caniza); Arzúa (Arzúa); Eume (Pontedeume); Muros (Muros); Terra de Celanova (Celanova); Caldas (Pontecesures); O Carballiño (O Carballiño); A Terra Chá (Castro de Rei) e a comarca de Compostela (Boqueixón). O Sermos analiza os problemas da xentrificación, agravados coa Covid-19 Alén dos municipios que tiveron como mínimo dous dos últimos tres anos co mercado da vivenda tensionado (92), hai outros 48 que estiveron nesta situación nalgún dos tres exercicios. Desta maneira, segundo os datos do estudo, 140 concellos galegos (44,7% do total), tiveron o mercado da vivenda tensionado nalgún momento do período entre 2020 e 2022. 29% dos concellos poden ser declarados en tensión Case un terzo dos concellos podería ser declarado zona tensionada Neste caso con datos de 2021 e segundo a análise do criterio de accesibilidade á vivenda -que a carga media do custo da hipoteca ou do aluguer, máis os gastos e subministracións básicos supere 30% da renda media dos fogares-, o observatorio sinala que 92 dos 313 concellos da Galiza (29,4%), perto dun terzo dos municipios galegos, cumprirían este requisito fixado para seren declarados como zonas tensionadas, o que permitiría impor topes ao prezo do aluguer de vivendas. Ademais, o pasado ano 2022 foi A Illa de Arousa (comarca do Salnés) o municipio da Galiza que viviu unha maior tensión do mercado da vivenda, cun incremento de prezo de 67,7% no período 2018-2022.