Macau, unha oportunidade para Galiza gañar relevancia no mercado asiático

Representantes do Centro Científico e Cultural de Macau (CCCM) están a realizar desde antonte unha visita á Galiza, que durará até esta sexta feira, acompañados polo Instituto Galego de Análise e Documentación Internacional (Igadi). A visita prodúcese nun momento de especial relevancia para o comercio e a economía galegas. O achegamento entre Galiza e a China, mediado polo vínculo lusófono, abre novas oportunidades de cooperación internacional dentro dun escenario global interdependente, mais que ofrece algunha dificultade, por exemplo, sobre as relacións Unión Europea (UE) e a China. Porén, durante as dúas últimas décadas, Galiza foi abrindo camiño para consolidarse como unha das comunidades máis abertas do Estado cara ao exterior. Sectores como a automoción, o téxtil e o marítimo-pesqueiro permitiron fortalecer as relacións con mercados tan competitivos como o chinés. Desde a sinatura da Asociación Estratéxica Integral entre o Estado Español e a China en 2005, o diálogo bilateral avanzou en intercambio comercial, investimento directo e cooperación tecnolóxica. A día de hoxe, a cidade de Vigo mantén o liderado industrial e loxístico galego, sendo o porto desta cidade o de maior entrada no país de produtos chineses. Isto tradúcese en investimentos nos ámbitos da automoción, a eólica e a biomasa. Como curiosidade, Lugo destaca, moito, nas exportacións agroalimentarias cara á China —principalmente leite, ovos e carne porcina—, mentres Ourense e Pontevedra son as maiores receptoras de maquinaria e compoñentes industriais chineses (semicondutores, sobre todo). Daniel González Palau: "A potencialidade de interferencia das políticas da UE nas relacións Galiza-China é total" A outra cara da moeda é a guerra comercial entre China e a UE que introduce incerteza nas relacións comerciais galego-chinesas. Os aranceis aos vehículos eléctricos asiáticos benefician parcialmente Stellantis Vigo ao mellorar a súa competitividade, mais pola contra, a suba nos prezos dos compoñentes electrónicos e doutro tipo de importados desde o país asiático afecta os custos de produción na Galiza. Isto sucede igual coas retencións chinesas a produtos da Unión Europea en xeral, por tanto, Galiza atópase nun momento en que é crucial diversificar mercados e reforzar as cadeas de subministración enerxética e industrial. Macau, territorio chave da lusofonía Neste contexto, a Rexión Administrativa Especia de Macau (RAEM) emerxe como unha plataforma decisiva para conectar Galiza co mundo chinés. Isto último, máis a súa herdanza lusófona, fan dela unha ponte estratéxica entre Europa e Asia. As raíces lingüísticas que Galiza comparte con Portugal permiten a integración do país dentro deste diálogo euroasiático. É por iso que a visita dunha delegación do CCCM, coordinada por Daniel González Palau —investigador e secretario executivo do Igadi—, responde a esa aposta estratéxica por fortalecer a cooperación académica, cultural e económica. Esta iniciativa encádrase no programa Erasmus+ e coincide co 50 aniversario das relacións diplomáticas entre a Unión Europea e China. O Centro Científico e Cultural de Macau, inaugurado en 1999 e con sede en Lisboa, é a plataforma perfecta para que os tecidos económico e social galegos poidan dispor dunha xanela aberta a Macau e de aí cara á China. Por iso vese imprescindíbel o aproveitamento desta visita organizada polo Igadi e que pode tecer poderosas relacións de cara ao futuro económico galego, se cadra, en todo o continente asiático. En 2024 o produto interior bruto (PIB) de Macau superou os 73.000 euros por habitante e ocupa o posto 95 entre as principais economías do mundo. Se se ten en conta o poder adquisitivo, esta rexión autónoma chinesa sería o cuarto país máis rico do mundo. A inflación foi de 1,10% fronte á media da UE de 2,60%. A maior fortaleza da economía é o sector servizos. Dentro deste apartado destacan as grandes áreas de xogo (a cidade recibe o nome de “casino de Asia”), mais as autoridades chinesas tentan diversificar economicamente a cidade. Tamén o turismo é outra das grandes entradas de diñeiro á metrópole, boa parte del ligado ao xogo. Todo isto fai que Macau sexa un punto fundamental para a recepción de produtos galegos, moitos deles alimentarios. Macau, entre vellos e novos rumbos A aposta na lusofonía A aposta na lusofonía como vehículo para a proxección internacional da Galiza ofrece múltiples oportunidades. A conexión con Macau converte esta orientación lingüística nunha ferramenta económica e diplomática de primeira orde. Así, o itinerario académico e institucional que o Centro Científico e Cultural de Macau está a realizar estes días na Galiza supón moito máis que unha serie de encontros: representa unha oportunidade para situar Galiza no mapa euroasiático da cooperación lusófona, reforzando ao tempo a súa identidade como actor internacional propio. Palestras dos campus: Unha xira con fondo académico e institucional O traxecto que segue a comitiva do CCCM inclúe as cidades de Pontevedra, A Coruña, Ferrol, Santiago e Vigo, desenvolvendo obradoiros, encontros e sesións nas tres universidades galegas. Entre as actividades programadas, na segunda feira foi 'What’s Igadi?' en Pontevedra e esta terza feira na Coruña decorreu a palestra 'Da Lei Paz Andrade ás relacións da lusofonía con Macau', moderada por Gabriela Alexandra Oanta, directora do Instituto de Estudos Europeos Salvador de Madariaga da Universidade da Coruña (UDC). Esta cuarta feira no Campus de Ferrol Christoph Schreimonser, profesor de Dereito Internacional da UDC, abrirá o obradoiro 'Chibérica?: As relacións de Portugal e España con China'. A quinta feira en Santiago será a palestra 'A UE e China no século XXI: a Eurorexión Galiza-Norte de Portugal e Macau', introducida por Diego Sande Veiga, profesor de Economía da USC e colaborador de Nós Diario, ademais de director do Diploma de Especialización en Economía e Política Chinesa da USC e secretario e coordinador da Liña de Investigación en Economía do Igadi. Intervirán polo Centro Científico e Cultural de Macau Carmen Mendes, André Alves, Thaysa Cunha, Haozhe Ma, Xuheng Wang. O día 31 a xira fecharase na cidade de Vigo.