A inflación segue á alza e os alimentos son 12,9% máis caros que hai un ano

O Índice de Prezos de Consumo (IPC) subiu na Galiza 0,7% en abril en relación co mes anterior, aumentando a súa taxa interanual até 4,1, segundo os datos publicados onte polo Instituto Nacional de Estatística (INE). A inflación segue sen dar tregua no cesto da compra: os alimentos encareceron 12,9% Desta maneira, o IPC queda no país igualado coa taxa interanual rexistrada a nivel estatal, onde os prezos se incrementaron tamén 4,1% en abril respecto ao mesmo mes de 2022, após un aumento de 0,6% o último mes, polo encarecemento dos carburantes e unha diminución menos intensa dos prezos da electricidade. A inflación non subía tanto nun só mes desde maio de 2022. No que vai de ano, o índice xeral sumou na Galiza 1,5% mentres que no Estado español foi de 1,7%. En opinión da profesora de Economía Aplicada da USC, María Cadaval, confírmase que se mantén a inflación en aumento, aínda que de maneira diferente ao ano pasado. “Agora xa non temos un efecto base tan amplo, a suba maior xa tivo lugar en 2022”, sinala en declaracións a Nós Diario, “o chanzo é menor e por ese motivo explícase que aumentara a inflación xeral en sete décimas”, engade. O IPC rexistra en abril a súa maior suba desde maio de 2022 Na súa valoración, Cadaval entende que hai que remitirse ao que aconteceu o ano pasado para avaliar a situación actual. “En marzo de 2022, fundamentalmente, o prezo da electricidade e dos carburantes aumentaba de maneira significativa tras o inicio da guerra en Ucraína”, indica, “agora mesmo, a moderación deses prezos en marzo deste ano, comparadas coa gran suba de 2022, foi o que fixo baixar esa inflación xeral até o 3,4%”, segundo os datos do mes pasado facilitados polo INE. Partindo desta análise, a economista indica que ese é o motivo polo que en abril “volvemos ter un efecto chanzo no que se refire ao prezo dos produtos da alimentación”, mais a suba importante "xa tivo lugar en 2022". Alimentación no 12,9% En abril, o prezo dos alimentos e as bebidas non alcohólicas mantivéronse na Galiza cun pequeno descenso de -0,1% con respecto ao mes de marzo (a nivel estatal medraron 0,3%) mais continúan a marcar un encarecemento nos últimos 12 meses de 12,9%, coincidindo, neste caso, coa mesma porcentaxe a nivel estatal. Desde o Ministerio de Asuntos Económicos atribúen o aumento do IPC neste último informe tamén ao "efecto base" que supón comparar a inflación de abril deste ano cos primeiros meses do inicio da guerra en Ucraína. A pesar da suba de seis décimas a nivel estatal, o departamento que dirixe Nadia Calviño subliñou que o dato de abril "é menos da metade" do rexistrado un ano antes. Os alimentos encarecen 16,6% no último ano, a maior repunta desde 2002 Neste comportamento influíu, segundo fontes do Ministerio de Asuntos Económicos, o abaratamento de legumes e hortalizas. Ademais, tamén tivo que ver o feito de que os prezos da carne, o pan e os cereais, os aceites e as graxas, e leite, queixo e ovos aumentaron de prezo menos que en mensualidades anteriores. En taxa interanual (abril de 2023 sobre o mesmo mes de 2022), os alimentos que máis subiron de prezo a nivel estatal foron o azucre (+49,6%), a manteiga (+31,2%), o leite enteiro (+27,7%), o leite desnatado (+27,5%), salsas e condimentos (+26,3%), cereais e derivados (+18,2%), produtos lácteos (+17,6%), outros preparados alimenticios (+16,6%), patacas (+16,5%) e carne de porcino (+16,1%). Ademais, outros moitos alimentos tamén rexistraron subas interanuais de dous díxitos nos seus prezos, como no caso da auga mineral, refrescos e zumes (+15,9%), ovos (+15,8%), preparados de legumes e hortalizas (+13,3%), outras carnes (+12,6%), aceites e graxas (+12,3%), legumes e hortalizas frescas (+11,2%), bebidas alcohólicas (+10,4%) e crustáceos, moluscos, preparados de peixe e café, cacao e infusións, que encareceron en 10,3%. A inflación na Galiza fica en xaneiro por riba da estatal Encarece a roupa e o calzado Os elementos que máis afectaron ao Índice de Prezos do Consumo mudaron o mes pasado en relación aos que veñen causando importantes subas no índice anual e foron protagonistas durante o ano pasado. Segundo o Instituto Nacional de Estatística, en abril do ano 2023, incrementouse na Galiza 10,7% o apartado relacionado co vestido e co calzado (7,5% a nivel estatal), seguido do que está relacionado cos hoteis, cafés e restaurantes, con 1,3% (1,5% a nivel estatal), como consecuencia de contar co período das vacacións de Semana Santa. Pola contra, baixaron os gastos en vivenda en 1,8%, que conta con compoñentes como electricidade, quedando nunha redución de 12,6% a nivel interanual.