A inflación cae por baixo de 2% en maio e alcanza o seu valor máis baixo desde outubro
O Índice de Prezos de Consumo (IPC) recortou tres décimas a súa taxa interanual en maio, até 1,9%, rexistrando así o seu valor máis baixo desde o pasado mes de outubro, cando se situou en 1,8%, segundo os datos avanzados esta sexta feira polo Instituto Nacional de Estatística (INE). Coa moderación do IPC interanual no quinto mes do ano, a inflación encadea tres meses de descensos na súa taxa interanual.
O organismo explicou que a moderación do IPC até 1,9% débese ao abaratamento do lecer e a cultura, así como á baixada dos prezos no grupo de transporte e ao feito de que a electricidade subiu en maio menos que en igual mes de 2024. De feito, fontes do Ministerio de Economía, Comercio e Empresa subliñaron que neste descenso da inflación "tiveron especial importancia a favorábel evolución dos servizos relacionados co turismo e o bo comportamento dos prezos da electricidade".
O Departamento que dirixe Carlos Cuerpo destacou ademais que a inflación se mantén por baixo do nivel de referencia de 2% marcado polo Banco Central Europeo (BCE). "A economía española segue mostrando unha gran capacidade de conxugar unha redución continuada da inflación cun dos maiores crecementos entre os países desenvolvidos, especialmente relevante no actual contexto de elevada incerteza internacional", engadiu Economía.
A subxacente tamén frea
O INE incorpora no avance de datos do IPC unha estimación da inflación subxacente (sen alimentos non elaborados nin produtos enerxéticos), que en maio caeu tamén tres décimas, até 2,1%, dúas décimas por riba do índice xeral.
Con este descenso da taxa en maio, a subxacente volve á senda da moderación despois de que en abril experimentase unha repunta de catro décimas.
Prezos estancados
En termos mensuais (maio sobre abril), o IPC non experimentou variación, poñendo fin á corrente de incrementos mensuais do últimos sete meses. Pola súa parte, o IPC harmonizado (IPCA) reduciu tres décimas a súa taxa interanual en maio, até 1,9%, e rexistrou un descenso mensual de 0,1%. A inflación subxacente do IPCA estímase nun 2,1% para o mes de maio, segundo apunta Estatística.
O INE publicará os datos definitivos do IPC de maio o próximo 13 de xuño.