Incèndios, abandono e falta de ordenaçom territorial efetiva

No último artigo publicado por este jornal valoramos o custo de oportunidade do abandono de terras aptas para usos agrários. Um custo de oportunidade calculado a partir da produçom agrária que chegava a germinar. Estas últimas semanas assistimos a outro dos custos desse abandono do rural, um custo dramático, o derivado dos incêndios. Em 2017, a raiz da vaga de lumes desse ano (mais umha), um grupo de mais de 130 professoras/es e investigadoras/es das três universidades galegas e de distintos centros de investigaçom, demos a lume um manifesto titulado "por unha nova politica para o rural galego". Com efeito, no título nom há nengumha referência à polícia florestal, nem aos incêndios, mas à política rural. Essa era umha primeira ideia força das assinantes e dos assinantes desse manifesto: qualquer intento de abordar com êxito o recorrente problema dos incêndios na Galiza deve abandonar a visom sectorial, centrada na produçom florestal, e abordar as políticas territoriais, o conjunto de políticas que incidem no rural. Poucos meses depois, representantes das e dos assinantes do manifesto, comparecérom no Parlamento Galego na comissom especial criada a raíz dessa vaga de lumes. Umha comissom que, a pesar do chamado do manifesto, centrava-se na política florestal e de prevençom e extinçom de incêndios. Umha comparecência na que se expujo um informe encarregado pola própria comissom. Um informe que lembrava a profunda desagragarizaçom que sofreu o país nas útlimas décadas. Processo que foi acompanhado dunha perda continuada de populaçom e do envelhecimento do rural, enquanto a populaçom se concentrou nas cidades e vilas. Mais das três quartas partes da populaçom está em menos do vinte por cento do território. A diferença doutros países comunitários nos que também se produziu esse fenómeno de desagragarizaçom, na Galiza nom houvo umha política de ordenaçom territorial efetiva que permitisse reduzir os desequilíbrios territoriais. "Un exemplo é a inexistencia a dia de hoxe, e a pesar de todo, dun marco claro e consistente de ordenación de usos agroflorestais nin de actuacións fronte as consecuencias do abandono do rural", sinalava o informe. A desapariçom de exploraçons e a reduçom da superfície agrária utilizada (fenómenos que nom necessariamente vam unidos) que se produziu no nosso país dérom lugar a um câmbio na gestom do território, propiciando modelos que requerem um baixo ou nulo investimento no controlo da coberta vegetal, favorecendo a extensom dos incêndios. Umha olhada pola superfície queimada este ano permite-nos ver perfeitamente essa ligaçom entre essa Galiza cada vez com menos habitantes e mais velhos e o lume. Emprego e populaçom Por outra parte, o modelo florestal impulsado, forte expansom da superfície arvorada com espécies alóctones de crescimento rápido, tem unha escassa capacidade de criar emprego e renda no território e polo tanto de fixar populaçom no rural. No informe sinalava-se a necessidade de reformular o papel das massas arvoradas de espécies de crescimento rápido na socioeconomia do rural. O rural nom é só a atividade primária. Num artigo anterior publicado neste mesmo jornal vimos como os ingressos derivados da venda de madeira das zonas rurais beneficiava numha parte importante a proprietários residentes nas áreas urbanas. Se bem, como digemos, a política florestal nom é a única área que deve ser abordada, nem deve conceber-se apenas com umha focagem setorial, urge umha mudança radical na mesma: assegurando a ordenaçom do território florestal desde umha visom multifuncional o mesmo, diversificando os usos e aproveitamento das superfícies florestais, procurando fórmulas de gestom em comum de superfícies particulares... Um conjunto de recomendaçons entre as que, sem dúvida, a dia de hoje, haveria que incluir a prorroga da moratória do eucalipto. Agora bem, o rural nom é só a atividade primária. Embora é fundamental fomentar e diversificar a produçom agrária, recuperando e expandindo a superfície agrária utilizada, e mudar o modelo florestal, também o é impulsar o desenvolvimento doutras atividades econômicas nas áreas rurais, para criar emprego e fixar populaçom. Ao tempo que se investem recursos públicos para garantir infraestruturas e serviços públicos no território rural, superando o leque entre os espaços urbanos e os rurais. Também isso é previr incêndios. Do contrário nom será possível frear o abandono.