A II Gala do Turismo recoñece cinco proxectos e traxectorias a prol dun sector sostíbel

O sector turístico da Coruña celebrou esta quinta feira no Porto de Oza-Marina Varadero, na cidade herculina, a segunda edición da Gala de Turismo da Deputación da Coruña para entregar os seus premios. Alí encontráronse profesionais, entidades e iniciativas que desenvolven un turismo de calidade e, sobre todo, responsábel coa contorna que define a provincia da Coruña. Así o transmite o vicepresidente da Deputación, Xosé Regueira, quen ve esta iniciativa como “fundamental” para reforzar o modelo turístico que desexa para o conxunto da provincia e o seu futuro. Regueira cre que o avance do sector turístico coruñés é froito do "traballo diario" de proxectos que conseguen xerar unha dinámica positiva para a economía local e móstrase como un firme defensor da necesidade de preservar e de promover unha identidade propia, esa "esencia" que permite construír unha oferta diferencial e non artificiosa. Pola súa parte, o presidente da institución, Valentín González Formoso, salientou o papel do sector, que representa arredor de 13% do produto interior bruto (PIB) galego e mantén uns 130.000 empregos no país, como "motor de desenvolvemento económico e social" , especialmente nos concellos rurais. “O turismo non é un capricho nin un fenómeno pasaxeiro, é unha estratexia de futuro, capaz de xerar emprego, fixar poboación e dinamizar os nosos territorios”, apuntou. A Deputación da Coruña pon en valor en Fitur a Costa da Morte, "onde empeza todo" O presidente puxo tamén en valor o traballo da Deputación nos últimos anos para consolidar un modelo de turismo “sostíbel e desestacionalizado”, con accións como os Plans de Sostibilidade Turística en Destino (PSTD), a recuperación da Vía Verde de Compostela-Tambre-Lenguelle, a promoción do Camiño Inglés no Reino Unido, iniciativas como 'Os Fogóns do Anllóns' e a campaña 'A paisaxe que sabe'. Esta gala é froito dunha nova estratexia que para o vicepresidente da Deputación comezou en 2004 co Plan de Inmersión Turística da Costa da Morte, unha resposta ao desastre do Prestige. “Comezamos sen empresas especializadas e, ademais, as consultoras existentes eran de fóra”, lembra. Durante estes máis de 20 anos houbo persoas que iniciaron un labor intenso para pór en pé o que agora é un sector económico punteiro para o noso país. 22 anos do 'Prestige': máis medios na costa pero a decisión continúa en Madrid Cinco formas de fomentar un novo modelo de turismo A entrega dos Premios Turismo 2025 reflicte a filosofía detrás desta iniciativa da Deputación e do equipo que deseñou unha nova maneira de ver o desenvolvemento do sector: a busca da sustentabilidade, o respecto do territorio, a innovación con base na tradición e a economía circular. E todos eses esforzos e iniciativas condénsanse nas cinco categorías que reciben os premios. A primeira é a mellor iniciativa de innovación, calidade e sostibilidade turística, o recoñecemento a proxectos con capacidade innovadora, calidade nos seus servizos e compromiso co turismo responsábel. A gañadora foi a empresa Volta Montana, de Cristina Collazo e Pablo Conde, unha axencia de viaxes especializada en rutas de sendeirismo para todos os públicos, rutas en bicicleta e outro tipo de viaxes para levarnos “aos recunchos menos coñecidos" da Galiza. Recolleron o premio Micaela López e Cristina García Souto en nome de Collazo e Conde. A segunda categoría premia a mellor iniciativa de posta en valor da autenticidade do territorio. O que se busca é unha acción enfocada en elementos que reforcen a identidade, o arraigo e a singularidade dos concellos, xunto coa protección ambiental. Neste caso, o gañador foi a iniciativa Chichalovers, de Compostela, unha idea de Darío Capelo e Graciela Castro para fundir o legado gandeiro e o hostaleiro para pór en valor o produto de proximidade e o territorio. Ela Diz, Chichalovers e Toxo Telecom gañan os Manuel Beiras, premios que recoñecen o uso do galego no comercio e a empresa A terceira categoría é ao mellor proxecto de turismo emerxente. Este premio vai dirixido a empresas ou persoas que destacaron pola súa evolución e logros durante os últimos tres anos. A iniciativa recoñecida neste 2025 foi Espazo Nature, situada en Razo, en Carballo (Bergantiños). Unha idea de Luz Pardo e Antonio Vázquez coas súas fillas Ana e Laura e que oferta experiencias de aloxamento turístico sustentábel e de calidade. Recolleu o galardón unha das fillas, Laura Vázquez. En cuarta posición está o mellor proxecto de turismo enogastronómico, que recoñece as propostas dirixidas a difundir a cociña local, os produtos de proximidade e a tradición culinaria, integrando innovación e sustentabilidade. O galardón recaeu na Artesa da Moza Crecha de Betanzos (As Mariñas), unha iniciativa de Paula Martínez e Lolo Mosteiro con catro vértices: orixinalidade, cociña tradicional, cociña de autor e viños da IXP Viño da Terra de Betanzos. A Deputación da Coruña abre unhas xornadas de deseño e alimentación E, por último, o recoñecemento a toda unha vida dedicada ao turismo, un galardón honorífico que recoñece unha traxectoria exemplar de persoas ou entidades do ámbito turístico provincial. Nesta ocasión a persoa recoñecida foi o profesor CENP-Escola de Turismo da Coruña Carlos Rodríguez, cuxa traxectoria docente está vinculada á formación, á dignificación da profesión e a fortalecer relacións no sector. Na procura dun turismo fiel... mais que non "sature" o país O desexo do modelo turístico da Deputación da Coruña é fidelizar os e as visitantes dentro dun espazo económico moi competitivo. No caso desta provincia, Xosé Regueira considera que este territorio ten moita capacidade de crecemento, e por iso deben buscarse novos mercados que sintan o atractivo da Coruña e da Galiza. “Temos unha oferta cunha calidade extraordinaria e non só baseada na paisaxe ou na gastronomía”, apunta Regueira. Por iso naceu a Gala do Turismo, unha vía para construír un sector de calidade en base a un público respectuoso co territorio. Un territorio como é o da provincia da Coruña definido polos case 1.000 quilómetros de costa, tres das sete grandes cidades –A Coruña, Ferrol e Santiago– e un medio rural “onde aínda vive moita xente”. Isto necesita un turista que veña experimentar o país. Xosé Regueira, vicepresidente da Deputación da Coruña: "A identidade propia da Galiza centra a nosa política" Mais un turismo desordenado, sen límites á súa afluencia e capaz de saturar espazos non é un motor económico; ao revés. Un exemplo é a saturación do Camiño de Santiago, unha peza fundamental no turismo da Coruña, pois a perda da esencia espiritual e de experiencia persoal, convérteo nunha simple ruta. É por iso que Xosé Regueira fai moito fincapé na calidade, na sustentabilidade e nunha fidelización do turista que quere vivir unha experiencia, e a Galiza pode ofrecerlla.