Greenfiber: maior pressom eucaliptizadora

Di-nos Greenfiber (Altri e Greenalia) que vai consumir 1,2 milhons de metros cúbicos de eucalipto ao ano na primeira etapa que contempla no seu projeto industrial. Essa primeira fase na que quer produzir 250 mil toneladas de pasta solúvel e 60 mil de fibra têxtil. Um volume de eucalipto que, segundo eles, nom exigiria aumentar a superfície de plantaçons desta espécie. Argumenta que umha parte importante da produçom galega de eucalipto é exportada, mais de 2 milhons de toneladas, e que se trataria simplesmente de reorientar umha parte desta produçom cara à transformaçom em Palas. Certo é que umha parte importante da madeira de eucalipto é exportada (sem ir mais longe para a própria Altri em Portugal). Agora bem os atuais demandantes nom vam desaparecer pola apariçom dum novo ator no cenário. A nova demanda de Greenfiber somaria-se à já existente e à maior procura que já se vem dando nos últimos tempos por parte doutros agentes (por exemplo a de Navigator). É mais que provável, pois um incremento da superfície de eucalipto destinada a atender essa nova procura. Maior eucaliptizaçom Por outra parte, mesmo sem haver um incremento da superfície total também pode produzir-se um efeito deslocamento. A pressom da indústria da celulose para dedicar terras aptas para usos agrários à produçom florestal é muito forte. Os maiores rendimentos produtivos por hectare, também as possibilidades de mecanizaçom em muitos casos, som maiores, engordam os da indústria. Logicamente esta tentará abastecer-se minimizando o custo da sua principal matéria-prima. É certo que existe umha moratória às novas plantaçons (realmente se está cumprindo?), mas esta finaliza em Dezembro de 2025. Ademais, apesar das suas declaraçons, o PP na Xunta segue sem acometer umha ordenaçom real do território e desde o franquismo existe umha grande conivência entre a administraçom e a indústria celulósica. Umha falta de ordenaçom efetiva que favorece os interesses dos poderosos, daquelas empresas que tenhem capacidade para ter umha importante rede de agentes atuando nas zonas do seu interesse, procurando novas terras, facilitando a realizaçom de novas plantaçons. A pressom da indústria da celulose para dedicar terras aptas para usos agrários à produçom florestal é muito forte Todo isto pode impulsar, ainda mais, a eucaliptizaçom do território e mesmo de superfícies aptas para usos agrários. Falamos dumhas 60 mil hectares para produzir o volume de eucalipto que Greenfiber afirma que necessitaria nessa primeira etapa. Isto considerando um bom aproveitamento de todas e cada um desses hectares. Superfície agraria útil Isso aconteceria num país que se caracteriza polo escasso peso da superfície destinada a usos agrários. Segundo o último Censo Agrário (2020), apenas 20% do território galego é superfície agrária utilizada, frente a perto da metade no conjunto do Estado. Entre os dous últimos censos agrários a SAU caiu perto de 50 mil hectares, enquanto a superfície dedicada ao eucalipto nom deixou de crescer até superar os 400 mil hectares segundo o inventário florestal contínuo. Ademais, ao tempo que aumentou o peso do eucalipto no total de cortas reduziu-se a capacidade de gerar valor da produçom silvícola segundo os dados do Instituto Galego de Estatística. A competência dos usos florestais e a perda de superfície agraria é um problema que lastra a viabilidade de muitas exploraçons polas dificultades para aceder a terras, reduzindo custos e/ou ampliando as exploraçons, para assegurar um mínimo nível de renda. Agora bem, também é um problema para o conjunto da sociedade galega. Lembremos que a pesar da imagem da Galiza como um país agrário que existe, em realidade somos deficitários no abastecimento de produtos agroalimentares, fundamentalmente pola dependência exterior das produçons vegetais. É sabido que Galiza supom mais da metade das cortas de madeira do Estado, fundamentalmente polo eucalipto do que aportamos mais de 80% do volume de cortas. Porém, o nosso peso na geraçom de valor da indústria florestal é muito menor, menos dumha quinta parte da nossa aportaçom em madeira. Este projeto longe de mudar esta situaçom viria consolidá-la. Acentuaria a nossa especializaçom na produçom de eucalipto de ciclo curto para produzir pasta, pasta solúvel que se sumaria à pasta de papel. Mais umha vez sem fechar os ciclos produtivos. Mais umha vez pondo os nossos recursos naturais a disposiçom do capital transnacional para engordar a sua conta de resultados. Mais umha vez com o protagonismo do Partido Popular na defesa dos interesses dumha transnacional.