Malestar no cerco polo recorte de 21,5% na sardiña que propón o Estado

S en data aínda para o inicio da campaña da sardiña, o ano pasado adiantouse ao mes de marzo, a frota galega do cerco olla con incerteza este 2024. Ademais de como e cando será o comezo, preocupa a rebaixa dun 21,5% que, segundo o sector, pensan aplicar desde o Estado español e Portugal nesta especie para as embarcacións do noroeste. Os dous países apuntan cara un máximo de 44,45 millóns de quilos con respecto aos 55,60 millóns de quilos de 2023. A parte que lle correspondería ao Estado español serían 14,89 millóns de quilos distribuídas en 8,13 millóns de quilos no cerco, piobardeira e racú para a Galiza, Asturias, Cantabria e Euskal Herria; para a frota artesanal do xeito galega serían 406.663 quilos; e para a frota de Andalucía quedaría en algo máis de 6,3 millóns de quilos. O cerco galego debe comprar cota noutros territorios para poder pescar sardiña A razón desta decisión viría pola recomendacións do Consello Internacional para a Exploración do Mar (ICES, polas súas siglas en inglés) o pasado mes de decembro no que insistían en reducir a cota en 10%, até chegar ás 39.000 toneladas. Segundo os seus análises, a biomasa desta especie diminuíu nos últimos anos polo que sería necesario adoptar esta medida. “Desastre total” para o cerco e o xeito Desde a Federación Galega de Confrarías, o seu presidente, José Antonio Pérez Sieira, considera que se se confirman as medidas que apunta o borrador que lles facilitou a Secretaria Xeral de Pesca do MAPA sería “un desastre total” para os sectores do cerco e do xeito. Confirma a Nós Diario que están “facendo alegacións polas toneladas que nos reducen” e posibilitar “que non se leven a cabo”. Recoñece que “será difícil, só quedaría facer intercambios con outros países” como aconteceu o ano pasado con Portugal. A pesca tradicional resiste a pandemia Pérez Sieira asegura que, falando coas persoa responsábeis das diferentes embarcacións, “a xente di que ve moita sardiña”. Porén, recoñece que “hai que confirmar o tamaño do que hai, moitos son para o ano vindeiro e non para este polo seu tamaño”. Aínda así, discrepa das análises do ICES e pregúntase “onde fixeron ese estudo técnico?”. Neste sentido, as alegacións que presentarán terán esta base. “Hai sardiña e se non temos cota para o xurelo por estar vedado, non nos queda outra arte”, advirte o responsábel das confrarías galegas que, ademais, alerta que a situación "aínda pode empeorar segundo vaia a campaña da cabala que o ano pasado foi fatal". Esta circunstancia reforza o malestar dun sector que, asegura Pérez Sieiro, "estará presente nas protestas do día 26 de febreiro en Madrid. Tamén a Asociación de Armadores do Cerco da Galiza (Acerga) presentará alegacións ao documento. Confirmouno esta sexta feira a Nós Diario o seu presidente, Manuel Suárez. "Non estamos conformes con esa rebaixa malia que aseguren que se debe ao tamaño", considera, "os científicos non fan as catas nin na época que deben nin onde deben como levamos anos dicindo", engade. En opinión do responsábel do cerco galego "as campañas do ICES deberían estar focalizadas onde realmente hai que facelas e non agardar ao momento en que non hai sardiña". Tamén esta sexta feira, Suárez mantivo varias reunións nas que, asegura que o MAPA se comprometeu "a traballar con Portugal para paliar esta caída mediante intercambios entre os dous estados". O sector do cerco e a Xunta demandan a imposición dun paro biolóxico do xurelo Sen diálogo co Ministerio de Transición Ecolóxica Alén da problemática das cotas pesqueiras, o sector tamén bota en falta máis diálogo co Estado español en relación a temas que preocupan, como poden ser a eólica mariña. Esta sexta feira mesmo, a Plataforma en Defensa da Pesca e dos Ecosistemas Mariños criticou o que consideran "total desprezo" da vicepresidenta terceira e ministra para a Transición Ecolóxica e o Reto Demográfico, Teresa Ribera, cara aos mariñeiros, ao rexeitar reunirse tras dous anos da primeira petición. A través dun comunicado, a entidade que representa profesionais do mar da Galiza, Canarias e Asturias, lamentou que aínda non tiveran resposta á solicitude de xuntanza que enviaron o 1 de febreiro. O obxectivo da mesma era abrir unha vía de diálogo tras a demanda que interpuxo a Plataforma ante o Tribunal Supremo en relación aos plans do Goberno español sobre a eólica mariña, explicando á ministra os motivos e as preocupacións dos mariñeiros sobre como pode afectar o sector. "Imos pasalo mal": o sector pesqueiro galego alerta sobre o veto á pesca do xurelo A plataforma denuncia que "despois de dous anos desde a nosa primeira petición de reunión, e a pesar das manifestacións públicas de Teresa Ribera tras a aprobación dos Plans de ordenación do espazo marítimo (POEM), da súa vontade de reunirse co sector pesqueiro representado pola Plataforma en Defensa do Mar, a día de hoxe a nosa última petición non recibiu ningún tipo de resposta, mentres se anuncia a inminente aprobación do marco regulatorio para a adxudicación de polígonos de eólica mariña en augas españolas, todo iso de costas totalmente aos pescadores afectados". Así, lamentaron o "total desprezo" de Ribera co sector pesqueiro, mentres asiste " a diferentes congresos e encontros patrocinados polo lobby das industrias enerxéticas".