O Euribor marca un novo máximo desde decembro de 2008 e alcanza a taxa de 3,862%

O Euribor a 12 meses, índice de referencia para a maioría das hipotecas a tipo variábel na Galiza, fechou o mes de maio nunha taxa diaria media de 3,862%, o que supón un novo máximo mensual do índice desde decembro de 2008. A pesar de que o Euribor non parou a súa escalada, a revisión de hipotecas que tomen o dato de maio como referencia experimentarán o menor incremento do que vai de ano polo efecto base, é dicir, porque se toma como referencia o mesmo mes do ano pasado, no que a alza continuada deste índice hipotecario xa tiña comezado. O BCE sobe 0,5% os xuros co Euribor en récord desde 2008 As revisións nos catro meses anteriores foron de máis de 3,8 puntos porcentuais non só polo encarecemento do Euribor, senón pola comparativa cos mesmos meses de 2022, cando a taxa estaba en niveis negativos e practicamente en cero no caso de abril. En cambio, en maio de 2022 o Euribor elevouse até 0,287%, polo que a alza actual é de 3,58 puntos porcentuais. Isto tradúcese en que unha persoa que teña contratada unha hipoteca variábel de 150.000 euros a 30 anos e cun diferencial de 0,99% máis Euribor que deba revisar o seu tipo de xuro no mes de maio, rexistrará un aumento da cota hipotecaria de 290 euros ao mes. En termos absolutos, pasaría de pagar 500 euros a algo máis de 790 euros por mes. Este encarecemento da cota hipotecaria suporía un desembolso adicional para as familias de 3.480 euros máis ao ano. Para o director de Hipotecas de iAhorro, Simone Colombelli, o dato de maio supón que "a curva do Euribor estase aplanando". Segundo o experto de iAhorro, "o máis lóxico sería que a estabilización que vimos durante os últimos catro meses deste índice de referencia das hipotecas variábeis se manteña tamén durante os próximos meses". Para os próximos meses, a cofundadora de HelpMyCash, Olivia Feldman, descartou que baixen os tipos de xuro ou o Euribor. "Para que isto sucedese teriamos que entrar en recesión. Aínda que desde hai pouco máis dun ano moitos analistas prognostican que os Estados Unidos de América (EUA) entrará en recesión e que a Unión Europa (UE) lle seguirá os pasos, o certo é que até o momento isto non ocorreu e non se cumpriron estas previsións", explicou. Espérase que os tipos de xuro volvan subir 0,25% en xuño Pola súa parte, para XTB, o Euribor continuará subindo durante os próximos meses, aínda que o seu percorrido á alza será cada vez máis limitado. A pesar da caída no crédito, desde a entidade esperan que o Banco Central Europeo (BCE) incremente os tipos de xuro en 0,25% nas reunións de xuño e xullo. Inestabilidade financeira O endurecemento das condicións de financiamento como consecuencia das subas dos tipos de xuro para conter a elevada inflación porá a proba a familias, empresas, gobernos e segmentos do mercado como o inmobiliario, o que podería chegar a revelar vulnerabilidades no sector financeiro, segundo advertiu esta cuarta feira o BCE. O FMI alerta da vulnerabilidade do sector financeiro non bancario pola suba de tipos As perspectivas de estabilidade financeira seguen sendo fráxiles, segundo o BCE Segundo o informe semestral sobre a estabilidade financeira da zona euro, o BCE conclúe que as perspectivas de estabilidade financeira da rexión monetaria "seguen sendo fráxiles", no contexto das recentes tensións bancarias. Neste sentido, a institución considera que, aínda que as condicións económicas melloraron levemente, as perspectivas de crecemento incertas, xunto coa inflación persistente e o endurecemento das condicións financeiras continúan pesando sobre os balances de empresas, dos fogares e dos gobernos. Ademais, alerta de que unha deterioración inesperada nas condicións económicas ou maiores restricións financeiras podería conducir a axustes de prezos desordenados nos mercados financeiros e inmobiliarios. "A medida que endurecemos a política monetaria para reducir a alta inflación, isto pode revelar vulnerabilidades no sistema financeiro", advertiu o vicepresidente do BCE, Luis de Guindos, na presentación do informe, subliñando a importancia "fundamental" de controlar as vulnerabilidades e implementar completamente "a unión bancaria para mantelas baixo control". No caso dos mercados financeiros e os fondos de investimento, o BCE sinala que estes seguen sendo vulnerábeis aos axustes de prezos dos activos, subliñando que as altas valoracións, as condicións de financiamento máis estritas e a menor liquidez do mercado poderían aumentar o risco de que calquera axuste se volva desordenado, especialmente se hai temor de recesión. Ademais, apunta o banco central, xa hai sinais de deterioración da calidade dos activos nas carteiras de préstamos expostas a inmóbeis comerciais, empresas máis pequenas e préstamos ao consumo, o que podería obrigar aos bancos a reservar máis fondos para cubrir perdas e administrar os riscos crediticios. Así mesmo, sinala que o sector inmobiliario continúa en recesión, enfrontando condicións de financiamento máis estritas e unha perspectiva económica incerta, así como unha demanda máis débil. Un efecto que se está a notar na Galiza, pois segundo os últimos datos, as licenzas para novas vivendas caeron 47,9% en febreiro con respecto ao mesmo mes do ano 2022. Até 82% das empresas teñen problemas de financiamento A alza nos tipos de xuro causou impactos significativos nas empresas estatais, xa que 82% delas (sen datos por autonomías) indica que a súa capacidade para financiarse viuse afectada en menor ou maior medida pola política monetaria, segundo o estudo da xestión do risco de crédito no Estado publicado por Iberinform. O crédito ao consumo encareceu 34% en 2022 pola suba dos tipos de xuro En concreto, para 17% das empresas o impacto da suba de tipos sobre a súa capacidade de financiamento foi alto, para 33% moderado, para 32% resultou baixo, e só o 18% afirma non sufrir impactos. Consecuencias para o tecido produtivo Iberinform sinalou que a suba dos tipos de xuro está a provocar "un impacto significativo na estrutura de custos do tecido produtivo que pode afectar as súas capacidades para operar de forma rendíbel". Ademais, a consultora indicou que a volatilidade dos custos financeiros e o endurecemento da política monetaria no último ano están a ter varios efectos sobre o tecido empresarial. Un dos principais efectos adversos sobre actividade das empresas é a suba dos tipos de xuro no financiamento da súa actividade ou o endurecemento, asociado ás turbulencias financeiras, das condicións de concesión de novo financiamento.