O Estado condiciona a OPA do BBVA a manter durante tres anos Sabadell como banco separado

A agardada decisión do Consello de Ministros a respecto da OPA lanzada por BBVA sobre o Banco Sabadell chegou onte. O titular de Economía, Carlos Cuerpo, deu conta tras a reunión semanal do Executivo estatal das condicións estabelecidas por Moncloa para a operación, que alteran de forma substancial as fixadas pola Comisión Nacional do Mercado de Valores (CNMV). Neste sentido, obriga o BBVA a non efectuar despedimentos, a conservar a actual rede de sucursais e a manter as entidades separadas durante un prazo de tres anos. "Discutimos sobre a operación e acordamos aprobala coa condición de que nos próximos tres anos BBVA e Sabadell manteñan a personalidade xurídica, os patrimonios separados e a xestión do día a día de forma autónoma. Son condicións de interese xeral e habilítanos a normativa", dixo Cuerpo, en referencia á Lei da competencia, que faculta o Executivo a endurecer as condicións dunha OPA impostas pola CNMV cando esta ten a consideración de hostil. Precisamente onte, a presidenta da CNMV, Cani Fernández, negou "inxerencias" do Goberno do Estado durante o proceso. O ministro de Economía xustificou a posición do Executivo en base a que se "poida asegurar o financiamento a pemes por parte de ambas as entidades; protexer os traballadores co mantemento dos cadros de persoal [o BBVA non poderá facer un ERE] e conseguir a continuidade das políticas de inclusión financeira e da rede territorial de ambas as entidades", e, "en definitiva, maximizar o valor de ambas as entidades con esta xestión autónoma das dúas". Cuerpo incidiu na importancia de garantir que o sistema financeiro continúe fornecendo crédito a particulares e mais a empresas. Os riscos que a concentración bancaria representan para o crédito estiveron detrás das críticas á OPA desde o primeiro momento. A entidade resultante da fusión sería a primeira do Estado en activos e contaría con máis de 30% da cota de mercado, colocándose como o segundo banco da Galiza só por detrás de Abanca, que dispón de 41,2% da cota de mercado galega e 435 sucursais. Pola súa parte, a entidade financeira xurdida da unión do BBVA e Sabadell, actualmente o cuarto e o quinto operador bancario do país, respectivamente, pasaría a abranguer 19% do mercado bancario do país e 18,3% das sucursais. O nivel de concentración bancario da Galiza xa está hoxe por riba da media do Estado. Segundo os datos achegados polo Banco de España para 2024, as primeiras seis entidades en presenza no mercado galego son titulares de 94,7% das sucursais operativas; porén esta cifra para a media estatal fica en pouco máis de 75%. A este respecto, o profesor da Universidade de Vigo e colaborador de Nós Diario Albino Prada apunta que "a concentración bancaria na Galiza desde hai anos sitúase moi por riba da media europea ou mesmo española, pois se disparou desde a crise financeira do ano 2008". Prada, citando un traballo sobre a concentración bancaria no Estado elaborado polo catedrático de Análise Económica da Universidade de València, Joaquín Maudos, conclúe que "a principal consideración que debe facerse de acordo cos datos elaborados por este experto é que todas as provincias galegas xa se situaban por riba do nivel de concentración que se considera excesivo", e que "non sucedía isto en Madrid naquela altura, pero si en Barcelona". Manter os empregos A OPA do BBVA ao Sabadell está asociada a un expediente de regulación de emprego (ERE) que implicaría o despedimento de ao redor de 2.000 traballadores e traballadoras de ambas as entidades no conxunto do Estado. Precisamente este foi un dos aspectos da operación que levou os sindicatos a reclamar ao Goberno estatal que vetase a fusión, e que Moncloa atende nas condicións divulgadas onte. A este respecto, Cuerpo lembrou que os dous bancos incrementaron o seu cadro de persoal desde 2022, polo que se impón que non haxa mudanzas na política de recursos humanos. O BBVA conta con 789 persoas empregadas na Galiza e o Sabadell con 373, polo que o banco resultante da fusión sumaría 1.162 traballadoras e traballadores. A experiencia do proceso de reconversión bancaria comezado após a crise financeira de 2008 sinala que os maiores axustes de persoal se concentran na entidade absorbida, polo que os sindicatos advertiron de que os postos de traballo destruídos no país equivalerían ao emprego da entidade menor, cifrándoos en máis de 300 e alertando do seu impacto sobre o persoal de 40 a 50 anos. Mais o Goberno condiciona a OPA ao mantemento de todas as sucursais bancarias en funcionamento. Neste momento, o BBVA ten activas na Galiza 122 oficinas e o Sabadell, 60, que en moitos casos se duplican en espazos rurais e vilegos. Atendendo a esta consideración, a Confederación de Empresarios da Galiza (CEG) rexeitou a operación argumentando que nos últimos anos "perdéronse xa máis de 30% de oficinas bancarias na Galiza, e unha fusión suporía unha nova redución de oficinas e de persoal". BBVA e Sabadell enfrontan un futuro incerto As condicións impostas polo Goberno do Estado ao BBVA para seguir adiante coa súa OPA sobre o Sabadell abren un novo escenario na operación. A falta de que os responsábeis de ambas as entidades se manifesten oficialmente sobre a proposta do Executivo, semella que o novo marco fixado fortalece a posición do Sabadell e resta forza á alternativa do BBVA. Tanto é así que o presidente desta última entidade abriu na segunda feira a posibilidade de "retirar OPA se o Goberno pon máis condicións". BBVA e Sabadell teñen por diante un camiño complexo. No caso de non ir adiante a OPA, o BBVA terá que agardar para converterse na primeira entidade de crédito do Estado, como pretendía lograr con esta operación. Pola súa parte, Sabadell ten moi complicado continuar en solitario dada a súa composición accionarial e no contexto do proceso de concentración bancaria impulsado desde o Banco Central Europeo (BCE). Neste sentido, a entidade catalá busca socios no Estado, mantendo conversas nos últimos anos con grupos como o galego Abanca. As declaracións de onte do vicepresidente do BCE, Luis de Guindos, criticando a decisión do Goberno estatal de "pór obstáculos" á OPA, son un síntoma dos movementos de concentración bancaria que veñen por diante.