A economía da zona euro entra en recesión técnica

A zona euro entrou oficialmente en recesión. O produto interior bruto (PIB) da rexión rexistrou unha contracción de 0,1% no primeiro trimestre de 2023, o que supón a entrada en recesión técnica da economía da eurozona, despois da caída da actividade tamén de 0,1% no cuarto e último trimestre de 2022, segundo a última revisión do dato publicada onte pola oficina estatística da Comisión Europea, Eurostat. A zona euro encadea desta maneira dous datos seguidos co mesmo descenso e entra nunha recesión técnica. A volatilidade dos prezos da enerxía, a crise inflacionista e a caída do consumo nos fogares combínanse para facer retroceder a actividade na área monetaria. A oficina estatística comunitaria revisou dúas décimas á baixa a súa anterior estimación, publicada a mediados de maio, que apuntaba a unha expansión do 0,1% do PIB da zona euro entre os meses de xaneiro e marzo. Trátase da primeira recesión rexistrada na economía da zona euro desde que o PIB sufrira unha contracción de maneira consecutiva no primeiro e no segundo trimestre de 2020, como consecuencia do impacto da pandemia da Covid-19 e das restricións implantadas. No conxunto da Unión Europea (UE) a economía conseguiu medrar 0,1% entre xaneiro e marzo, despois da contracción de 0,1% observada entre outubro e decembro de 2022. En comparación co primeiro trimestre de 2022, a economía da eurozona e do conxunto da UE aumentou 1% en cada caso. Durante o primeiro trimestre de 2023, o PIB dos Estados Unidos de América (EUA) aumentou 0,3% en comparación co trimestre anterior, despois do avance de 0,6% no cuarto trimestre de 2022. Da mesma maneira, en Xapón o PIB medrou 0,7% fronte a 0,1% dos tres meses anteriores. Segundo as cifras desestacionalizadas de Eurostat, os volumes do PIB na zona euro e a UE foron 2,2% e 2,9%, respectivamente, superiores ao nivel rexistrado no cuarto trimestre de 2019, antes da pandemia da Covid-19. No caso dos EUA, o PIB foi 5,4% superior ao nivel do cuarto trimestre de 2019. Entre os Estados da UE cuxos datos estaban dispoñíbeis, o maior crecemento do PIB no primeiro trimestre do ano correspondeu a Polonia (+3,8%), por diante de Luxemburgo (+2%) e Portugal (+1,6%). Pola contra, a peor evolución económica observouse en Irlanda (-4,6%, un retroceso moito máis pronunciado que o calculado inicialmente por Eurostat, que o cifraba en -2,7%), Lituania (-2,1%) e nos Países Baixos (-0,7%). Entre as maiores economías da UE, Alemaña entrou en recesión cunha contracción do PIB no primeiro trimestre de 0,3%, após a caída de 0,5% nos tres meses anteriores. Que a primeira economía da UE está en recesión xa é coñecido desde hai un par de semanas, após unha revisión dos primeiros datos coñecidos do instituto estatístico alemán, Destatis. Mentres, o PIB de Francia aumentou 0,2%, despois de estancarse no cuarto trimestre de 2022, e o de Italia aumentou 0,6%, despois dunha contracción de 0,1% entre outubro e decembro do ano pasado. No Estado español, o PIB medou 0,5% no primeiro trimestre de 2023, fronte ao crecemento de 0,4% rexistrado nos tres meses anteriores, isto é, no último trimestre de 2022. A Galiza non logra recortar a fenda con Europa no que vai de século Variación interanual En termos interanuais, o maior crecemento do PIB rexistrouse no Estado español (+3,8%), por diante de Chipre (+3,4%) e de Malta (+3,2%), mentres que as maiores contraccións observáronse en Estonia (-3,7%), Lituania (-2,7%) e Hungría (-1,1%). Os datos publicados onte por Eurostat foron analizados con urxencia por economistas do banco holandés ING, que concluíron que "a significativa revisión á baixa debeuse principalmente a que Alemaña revisou á baixa as súas cifras a medida que ían aparecendo novos datos. Isto reforza a idea de que a actividade de marzo foi moi débil, o que fai improbábel unha rápida repunta no segundo trimestre". Os números achegados polas enquisas de maio indicarían, para estes expertos, que só se logre "unha modesta repunta" despois de dous trimestres de caída. As previsións económicas globais alcanzan o peor dato desde 1990 Datos da Galiza Así, se ben non todos os Vinte e sete viron como a súa actividade caía entre outubro de 2022 e marzo de 2023, considérase que o conxunto da zona euro si está en recesión. Destaca o caso do Estado español ao ser o Estado membro cun maior crecemento en variación interanual, 3,8%. Non obstante, os datos para a Galiza non son tan positivos. As cifras de PIB relativas ao noso país máis recentes son as publicadas a comezos de maio pola Autoridade Independente de Responsabilidade Fiscal (Airef), organismo independente de control fiscal que busca garantir o principio de estabilidade orzamentaria e a sostibilidade financeira do Estado español. A estimación da Airef do PIB das autonomías para o primeiro trimestre de 2023 sitúa a Galiza cunha taxa interanual de 2,9%, só por diante de Asturias (+2,2%), Cantabria (+2,3%), Estremadura (+2,5%) e A Rioxa (+2,7%). Así, o país galego sitúase entre as cifras máis baixas do Estado español, cun crecemento de 0,9 puntos por baixo da media estatal. Non obstante, a propia autoridade fiscal recoñece que estas estimacións foron feitas nun contexto "de elevada incerteza no ámbito territorial". Así, tal e como o propio Instituto Nacional de Estatística (INE) vén advertindo e como certificaron as revisións de Eurostat, os datos da Airef serán revisados a unha maior magnitude do que é habitual. Se os datos das comunidades seguen a mesma tendencia após as revisións, o crecemento da economía na Galiza non sería tal, senón inferior ao estimado pola autoridade fiscal. O PIB da Galiza medrará 2,9% en 2023, entre as cifras máis baixas do Estado Máis indicadores de contracción Os datos publicados onte por Eurostat relativos ao PIB non son os únicos coñecidos esta semana que indican un retroceso da economía estatal. A compravenda de vivendas no Estado afundiuse 20,7% en abril segundo datos do Consello Xeral do Notariado publicados esta cuarta feira. Na mesma xornada, o Instituto Nacional de Estatística (INE) anunciou que o prezo da vivenda libre de nova creación aumentou no Estado español 6%, e a de segunda man, 3%. Na Galiza estas cifras son superiores no primeiro caso (9,1%) e lixeiramente inferiores no segundo (2,3%).