Dixitalización, utilidade ou negocio millonario

Segundo a Axencia para a Modernización Tecnolóxica de Galicia (Amtega), o primeiro ano da Estratexia Galicia Dixital 2030 mobilizáronse máis de 187 millóns de euros de diñeiro público na transformación dixital. A Plataforma Dixital Agroforestal en particular contou cun orzamento de 5,4 millóns de euros e dispón de distintos módulos, entre os que se encontra o sistema de Xestión de Explotacións Agrarias (Xeaga), que supostamente ofrecería a posibilidade de cubrir ou xestionar o caderno de explotación dixital, no que se poderían rexistrar as tarefas de fertilización, os tratamentos fitosanitarios ou prácticas gandeiras. Fitosanitarios Recentemente o Consello de Ministros, aproveitando a flexibilización aprobada pola Comisión Europea, aprobaba un real decreto no que se indicaba que as persoas agricultoras disporán ata o 1 de xaneiro de 2027 para rexistrar o uso de produtos fitosanitarios en formato electrónico. Para que un produto poida comercializarse debe estar inscrito necesariamente no Rexistro Oficial de Produtos Fitosanitarios, que se modifica de xeito constante, e autorizado previamente para un determinado cultivo. A diferenza do Sativum, caderno dixital público desenvolvido polo Instituto Tecnolóxico Agrario de Castela León, o caderno galego non permite seleccionar os produtos fitosanitarios autorizados para cada cultivo e praga, e carece tamén do buscador de produtos comerciais autorizados con información práctica sobre os usos, número de rexistro, a materia activa e a dose de aplicación. As persoas agricultoras e gandeiras en xeral están realmente desanimadas pola crecente burocracia e complexidade administrativa O Consello de Ministros aprobou así mesmo unha modificación da normativa sobre nutrición sostible dos solos agrarios que obriga, con certas excepcións, a rexistrar os labores de fertilización a partir do 1 de xaneiro do 2026, a dispor dun plan de fertilización desde esta data para os cultivos de regadío e do 1 de setembro do 2026 para o resto. Contar cun asesor técnico en materia de fertilización será obrigatorio un ano despois nas zonas vulnerables a contaminación por nitratos e dous anos despois fóra desas áreas. O caderno Sativum, unha vez máis a diferenza do caderno galego, dispón dun asistente para elixir unha combinación óptima de fertilizantes tanto orgánicos como inorgánicos que se adapte ás necesidades de cada parcela. O Ministerio de Agricultura adoptou ademais unha aplicación denominada FertiliCalc como software de referencia para o cálculo da necesidade de nutrientes e de fertilizantes para 150 cultivos. Mentres o Instituto Tecnolóxico Agrario de Castela León asinaba un convenio co Fondo Español de Garantía Agraria para, entre outros, empregar o FertiliCalc, que lles permitirá non ter que contar con asesor técnico, dende a Consellería do Medio Rural non se lles coñece ningunha iniciativa ao respecto. Máis burocracia Nas escasas xuntanzas que houbo para mellorar o caderno Xeaga da Xunta detectáronse numerosos fallos na aplicación e a resposta dalgunha das persoas que presentaban a aplicación foi que, se non funcionaba ben, para isto xa había outros cadernos dixitais privados. Cómpre dicir, en primeiro lugar, que as persoas agricultoras e gandeiras en xeral están realmente desanimadas pola crecente burocracia e complexidade administrativa, que a maioría das veces carece de utilidade para a mellora produtiva, a calidade nutritiva dos alimentos e menos aínda a mellora da vida das persoas labregas, que moitas veces teñen unha idade elevada, están sobrepasadas polo traballo e mesmo carecen da cobertura e medios para realizar eses trámites telematicamente. A Administración multiplica trámites e dificultades incapaz de ofrecer unha aplicación única que sirva como porta de entrada aos diferentes organismos (Seguridade Social, Catastro, Facenda, Xunta de Galicia, Ministerio) unificando procedementos e simplificando os procesos. Os vindeiros 27 e 28 de novembro terá lugar na Ribeira Sacra o Foro de Emprendemento Ultreia Galicia organizado pola Xunta, no que supostamente presentarán a 'Estratexia de emprendemento ligado ao territorio'. Ultreia Galicia, segundo recolle a Xunta na súa páxina, son unha serie de "encontros revolucionarios para dinamizar a escena emprendedora galega, cun desenvolvemento simultáneo en dúas áreas: o campus startups e retos e solucións para un territorio intelixente". Como intelixentes e listos non son sempre sinónimos perfectos, o tempo dirá se a estratexia é para que as solucións tecnolóxicas faciliten a vida da xente ou para alimentar un negocio millonario.