A desregulación das rebaixas e a inflación prexudican as vendas do pequeno comercio

O gasto medio das galegas e galegos nas rebaixas de inverno situouse en 163 euros, fronte aos 339 euros rexistrados o ano pasado, o que supón un descenso de 52% das vendas por parte do sector comercial, segundo o último Zoom da entidade de crédito Cetelem que se deu a coñecer esta sexta feira. O sector do comercio retallista pide retomar a regulación das rebaixas Esta cifra tamén supón un gasto medio inferior ao da media do Estado español, que se situou en 276 euros. En xeral, segundo o estudo, realizado sobre unha mostra de 6.000 enquisas en liña, 42% das galegas e galegos gastou menos nas rebaixas deste ano. Tamén descende, en sete puntos, a porcentaxe de persoas compradoras que realizaron o mesmo desembolso que nas rebaixas do ano anterior (34%), e cae tres puntos o daquelas que manifestan gastar máis que no mesmo período de 2021 (24%). 34% das persoas enquisadas que desembolsaron menos nestas rebaixas manifesta conter o seu gasto como consecuencia da inflación. En calquera caso, os produtos máis adquiridos foron roupa (73%), calzado e complementos (37%), téxtil e calzado de deportes (25%), perfumes (14%), e libros (13%). O presidente da Federación Galega do Comercio, José María Seijas, pronunciouse este mes sobre a campaña de descontos. "Foron unhas malas rebaixas, porque se vendeu de antemán e só houbo movementos os dous ou tres primeiros días", dixo Seijas, que neste contexto reclamou ao Goberno estatal que "dunha vez por todas volva fixar as datas máis convenientes". "Isto é a guerra" Pola súa parte, César Lago, xerente de Espadela, con tres tendas de roupa e produtos artesáns en Compostela, sinala a Nós Diario que a baixada das vendas é unha situación "que xa se vén notando desde o mes de outubro de 2022". No período, sitúa "entre 20 e 30%" a perda de facturación no seu negocio. O valor do comercio local "Supoño que ten que ver coa pandemia e a crise derivada da mesma, mais tamén coa actual suba da inflación, dos tipos de xuro e dos transportes, e ademais, en Santiago sen o turismo baixan moito as vendas", explica o xerente de Espadela. "Por algunha razón que a min se me escapa, as institucións non queren que haxa consumo", opina. Porén, o que máis indigna o comerciante é a carencia de regulamento das rebaixas. "Tiña que ser como era antes, un período acoutado, que era o lóxico, cunha temporada en inverno e outra en verán, non se pode competir coas grandes superficies que teñen rebaixas todo o ano", denuncia o empresario. Ademais, afirma o comerciante compostelán, "na campaña de inverno a partir do Black Friday pásase a comprar moi pouco e afecta o comercio, e tamén hai unha falla da vontade individual das persoas usuarias a este respecto". "Sen regularizar o período de rebaixas isto é a guerra, e nunha guerra sempre perdemos os pequenos", acrecenta Lago. "Levo tres décadas co meu negocio e os últimos 14 anos desde 2009 foron de crise continuada, cando parece que te recuperas un pouco chega a pandemia, despois a crise enerxética, a suba dos tipos de xuro...", láiase. "Seguimos con esta propaganda mediática de guerra e entrementres imos para 15 anos de crise", conclúe o empresario. "A caída é descomunal" Neste sentido, Alejandro Martínez, xerente de Atmosfera Sport, no municipio de Noia, sinala a este xornal sobre a caída das vendas na época de rebaixas que "a partir do 10 de xaneiro houbo unha baixada de arredor de 30 ou 35%". "Acabo de chegar dunha reunión de empresas galegas do sector e o sentir xeral é que as rebaixas tal e como eran antes xa non existen", explica. É Galiza un país para emprender? Cada día pérdense sete autónomos, máis da metade no comercio "As rebaixas agora son todo o ano, o Black Friday, o Sábado Negro, o Pink Fashion, a Semana Fantástica, o día de non sei que... A xente xa non se cre iso dun mes e medio de rebaixas de xaneiro a marzo e outro mes e medio de xullo a agosto, iso xa non existe, cada ano nestes períodos baixan as vendas 30% con respecto ao ano anterior, se miramos cinco anos atrás, a caída é descomunal", afirma. Sobre a necesidade de regular os descontos, o xerente de Atmosfera Sport opina que "é fundamental para a vida do pequeno comercio, que non é capaz de aplicar os prezos que hai nas tendas en liña e nas rebaixas". "Se non se regulan os prezos tanto en liña como nas tendas físicas, pouco a pouco os pequenos comercios van desaparecer, non é viábel estar todo o ano con descontos para poder igualar os prezos de internet", denuncia. "É primordial que se adopte unha norma para que o custo en liña sexa similar ao prezo de venda ao público e para que as rebaixas sexan en períodos concretos", demanda Martínez. "Moita xente aproveita as rebaixas" Isabel Méndez, presidenta da Asociación Galega de Xerencia de Centros Comerciais Abertos, en conversa con Nós Diario, explica que "desde que se modificaron os períodos comerciais pódense facer rebaixas cando se queira". Porén, di, "os pequenos comercios seguen respectando os períodos tradicionais, mais vense afectados polos descontos o resto do ano". Non obstante, aclara, "a xente segue aproveitando as rebaixas para adquirir artigos de calidade, mais a inflación fixo que as compras baixaran".