A desigualdade na distribución da riqueza na Galiza: 10% máis rico posúe 56,7%

O español é un dos Estados máis desiguais da Unión Europea en termos de renda, segundo os datos de Eurostat, a oficina estatística da UE, e a Galiza é unha das comunidades na que se cumpre esa realidade. Estudos recentes apuntan a que a distribución da riqueza nos países occidentais presenta unha tendencia crecente ao longo dos últimos anos e a Galiza non é unha excepción. Catro investigadores de tres universidades estatais publicaron en setembro A desigualdade da riqueza por comunidades autónomas, un informe que analiza os activos —financeiros e non financeiros— que teñen os fogares e a súa distribución, para así ter unha fotografía real da situación da riqueza nos diferentes territorios e no Estado. A riqueza media dos fogares na Galiza é de 325.100 euros. Unha cantidade moi afastada de quen lideran a clasificación —Madrid (687.000 euros), Illes Balears (477.000) e Catalunya (433.600)— e que fica 58.000 euros por baixo da media estatal (383.000 euros). A industria protagoniza a nova entrega de 'A Riqueza da Galiza' Desigualdade Este dato compleméntase con outro, o coeficiente de Gini, que reflicte a desigualdade na distribución. Oscila entre 0 e 100. Se se aproxima a 100, encamiñámonos a unha perfecta desigualdade. Se se aproxima a 0, teriamos unha perfecta igualdade. A Galiza ten un valor de 69,8, moito máis próximo da desigualdade que da igualdade. Datos: INE / Gráfico: Nós Diario O mencionado traballo rexitra como na Galiza hai unha distribución da riqueza "bastante desequilibrada", ao compaxinar "riqueza media por baixo da media e niveis altos de desigualdade". Madrid recada 47% do total dos imposto do Estado malia representar 19% do PIB Así, 1% da poboación máis rica posúe 28,6% da riqueza da Galiza. En ningunha outra comunidade agás Madrid ese 1% de máis ricos acumula tanto. De ampliarmos o abano a 10% da poboación galega con máis riqueza resulta que aglutinan 56,7% do total. Pola contra, 50% da sociedade con menos capacidade económica ten só 7,5% da riqueza da Galiza. Composición da riqueza A desigualdade da riqueza por comunidades autónomas debulla a composición da riqueza dos fogares galegos por tipo de activos. 25% está asignado á vivenda principal; 8,9% a outras vivendas en propiedade; case 11% ao investimento en inmóbeis; 12,7% aos activos de negocios; 19,5% ás contas bancarias; 18,1% aos valores cotizados; e 4,3% aos seguros de vida e pensións. Destaca, en comparación co Estado, a alta porcentaxe en contas bancarias, confirmando a tendencia ao aforro dos galegos e galegas, algo que non sempre repercute en beneficio do país. As entidades de crédito con actividade na Galiza expatriaron 36.121 millóns de euros durante 2024. Segundo os datos publicados polo Banco de España, a succión do aforro galego marcou máximos históricos no pasado exercicio, fechando o ano cunha cifra superior a toda a serie estatística. Pola contra, o crédito fornecido na Galiza polas entidades financeiras en 2024 ficou en 48.124 millóns de euros. A débeda galega sobe e supera xa os 12.880 millóns, mais Rueda rexeita que se condone 32% A política fiscal Temos pois un país onde existe unha desigualdade na distribución da riqueza. Ferramentas como a política fiscal, que poderían conducir cara á reverter, ou polo menos mitigar, esa realidade non se aplican nesa dirección por parte do Goberno galego no marco das súas competencias. As rendas elevadas son as máis beneficiadas pola política fiscal da Xunta da Galiza, mentres que as máis baixas soportan unha presión fiscal superior á da media estatal. A isto engádese a política de bonificacións fiscais que —segundo cálculos da propia Consellaría de Facenda— farán que este ano se 'renuncie' a ingresar ao redor de 450 millóns de euros. O informe do Consello Xeral de Economistas de España sobre o que se paga de media de Imposto sobre a Renda das Persoas Físicas (IRPF) nas diferentes comunidades en 2023 [último exercicio fiscalizado] situaba a Galiza como un dos territorios onde ter máis renda sae máis barato. Así, e por tramos de renda, a Galiza figuraba no podio das tres autonomías onde as persoas contribuíntes con ingresos entre 220.000 e 600.000 euros menos teñen que pagar; e para aquelas cunha renda de 160.000 Galiza é a cuarta autonomía máis 'barata'. Así, para o tramo de 600.000 euros, a comunidade onde máis barato sae o IRPF é Madrid (abonarían 251.900 euros), seguida de Castela e León (257.000) e a Galiza (263.000). Pagar menos No caso galego, son 27.000 euros menos que os que as persoas contribuíntes con ese nivel de ingresos terían que pagar no País Valencià, ou 17.000 menos dos que esas persoas con ingresos de máis de 600.000 euros abonarían no territorio de Nafarroa. A situación repítese nos segmentos con ingresos de 220.000, 300.000 e 400.000 euros. Neste último, os contribuíntes na Galiza pagan ao redor de 169.000 euros, como en Castela e León. Só en Madrid terían que desembolsar menos (case 162.000). No País Valencià abonarían máis de 190.000 e na gran maioría do resto dos territorios do Estado o que pagarían estas persoas estaría por riba dos 175.000 a 180.000 euros, máis do que eses tramos teñen que pagar na Galiza.